ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵏⵖⵍⴰⴼ ⵏ ⵓⵡⴰⵏⴰⴽ, ⴰⵏⵖⵍⴰⴼ ⵏ ⵓⵥⴰⵔⵓ ⴷ ⵜⵎⴰⴷⵏⵉⵡⵉⵏ, ⵎⵓⵃⴰⵎⴻⴷ ⴰⵔⴽⴰⴱ, ⵢⴻⵙⵜⴻⵇⴱⴻⵍ ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⴰⵎⵙⴻⵍⵡⴰⵢ ⵏ ⵜⵜⴻⵛⴰⵔⵉⴽⴰ ⵏ ⵙⵙⵄⵓⴷⵉⵢⴰ "Abunayyan Holding" ⵉ ⵢⴻⵅⴷⴻⵎ ⴷⴻⴳ ⵓⵃⵔⵉⵛ ⵏ ⵜⵣⵎⴻⵔⵜ ⴷ ⵡⴰⵎⴰⵏ, ⵜⵓⵔⴽⵉ ⴱⵉⵏ ⵙⴰⵄⵉⴷ ⴰⵍ-ⵄⴰⵎⴰⵔⵉ. ⴷⴻⴳ ⵜⵎⵍⵉⵍⵉⵜ-ⴰⴳⵉ, ⵙⵙⴰⵡⵍⴻⵏ ⵖⴻⴼ ⵜⴳⵏⵉⵜⵉⵏ ⵏ ⵓⵎⵢⴻⵍⵍⴻⵍ ⴷ ⵓⵙⵓⵎⴻⵔ ⴷⴻⴳ ⵓⵃⵔⵛ ⵏ ⵓⵙⴰⵣⵣⴻⴳ ⵏ ⵡⴰⵎⴰⵏ ⵏ ⵍⴻⴱⵃⴻⵔ.
ⵜⵉⵎⵍⵉⵍⵉⵜ-ⴰⴳⵉ ⵜⴻⵍⵍⴰ-ⴷ ⵙ ⵏⵏⵡⴰⵢⴰ ⵏ ⵓⵙⴼⵉⵔ ⵏ ⵙⵙⵄⵓⴷⵉⵢⴰ ⴷⴻⴳ ⵍⵣⵣⴰⵢⴻⵔ, ⵄⴻⴱⴷⵓⵍⵍⴰⵀ ⴱⵉⵏ ⵏⴰⵚⴻⵔ ⴰⵍ-ⴱⵓⵚⴰⵢⵔⵉ, ⴰⴽⴽⴻⵏ ⴷⴰⵖⴻⵏ ⴷ ⵢⵉⵎⵙⴻⵍⵡⴰⵢⴻⵏ ⵏ ⵎⵎⵓⵊⵎⵎⵓⵄ ⵏ "ⵙⵓⵏⴰⵟⵔⴰⴽ" ⴷ ⵜⵜⴻⵛⴰⵔⵉⴽⴰ ⵜⴰⵣⵣⴰⵢⵔⵉⵜ ⵏ ⵡⴰⵎⴰⵏ. ⵙⵍⴰⵢⴻⵏ ⵖⴻⴼ ⵡⴰⵎⴻⴽ ⴰⵔⴰ ⴷ-ⵢⵉⵍⵉ ⵓⵙⵊⴻⵀⴻⴷ ⵏ ⵓⵎⵢⴻⵍⵍⴻⵍ ⵉ ⵡⴰⴽⴽⴻⵏ ⴰⴷ ⴱⵏⵓⵏ ⵡⴰⵍⵍⴰⵍⴻⵏ ⵏ ⵓⵙⴰⵣⵣⴻⴳ ⴷⴻⴳ ⵜⵎⵓⵔⵜ, ⴰⵢⴰ ⴷⴻⴳ ⵡⴰⵏⵏⴰⵔ ⵏ ⵜⴷⵓⴽⴽⵍⵉ ⴷ ⵜⴳⵎⴰⵜ ⵉⵊⴻⵀⴷⴻⵏ ⴳⴰⵔ ⵍⵣⵣⴰⵢⴻⵔ ⴷ ⵙⵙⵄⵓⴷⵉⵢⴰ.
ⴰⵏⵖⵍⴰⴼ ⵎⵓⵃⴰⵎⴻⴷ ⴰⵔⴽⴰⴱ ⵢⴻⴼⴽⴰ-ⴷ ⵢⵉⵡⴻⵏ ⵓⵙⴻⴼⵔⴻⵯ ⵖⴻⴼ ⵓⵡⴰⵀⵉⵍ ⴰⵖⴻⵍⵏⴰⵡ ⵉ ⵢⴻⵔⵔⴰ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ. ⵉⵙⵡⵉ ⵏ ⵓⵡⴰⵀⵉⵍ-ⴰⴳⵉ ⴷ ⴰⵢⴰⵡⴻⴹ ⵖⴻⵔ 62 ⵏ ⵜⵎⵉⴹⵉ (62%) ⵏ ⵡⴰⵎⴰⵏ ⵏ ⵜⵉⵙⵙⵉⵜ ⵉ ⴷ-ⵢⴻⵜⵜⴻⴼⴼⵓⵖⵓⵏ ⵙⴻⴳ ⵓⵙⴰⵣⵣⴻⴳ ⵏ ⵍⴻⴱⵃⴻⵔ, ⵉ ⵡⴰⴽⴽⴻⵏ ⴰⴷ ⵜⴻⴹⵎⴻⵏ ⵜⵎⵓⵔⵜ ⴰⵎⴰⵏ ⵏ ⵜⵉⵙⵙⵉⵜ ⵉ ⵎⴰⵕⵕⴰ ⵉⵎⴻⵣⴷⴰⵖ, ⵍⴰⴷⵯⴰ ⵡⵉⴷ ⵢⴻⵍⵍⴰⵏ ⴷⴻⴳ ⵢⵉⴷⵓⵔⴰⵔ ⴷ ⵡⴰⵣⴰⵖⴻⵏ ⵢⴻⵍⵍⴰⵏ ⴷⴻⴳ ⵜⵍⴻⵎⵎⴰⵙ ⵏ ⵜⵎⵓⵔⵜ.
ⵙⵍⴰⵢⴻⵏ ⴷⴰⵖⴻⵏ ⵖⴻⴼ ⵜⵎⵓⵙⵏⵉ ⵏ ⵜⵜⴻⵛⴰⵔⵉⴽⴰ "WETICO" ⵉ ⵢⴻⵅⴷⴻⵎ ⵢⴰⴽⴰ ⴷⴻⴳ ⵍⵣⵣⴰⵢⴻⵔ, ⵍⴰⴷⵯⴰ ⴷⴻⴳ ⴱⴳⴰⵢⴻⵜ, ⵟⵟⴰⵔⴼ ⴷ ⴽⴰⴱ ⵊⴻⵏⵏⴰⵜ. ⴰⵎⵙⴻⵍⵡⴰⵢ ⵏ ⵜⵜⴻⵛⴰⵔⵉⴽⴰ ⵏ ⵙⵙⵄⵓⴷⵉⵢⴰ ⵢⴻⴱⵢⴻⵏ-ⴷ ⵍⴻⴱⵖⵉ-ⵙ ⴰⴽⴽⴻⵏ ⴰⴷ ⵢⴻⵙⵏⴻⴼⵍⴰⵢ ⵙⵙⴻⵏⵄⴰ ⵏ ⵡⴰⵍⵍⴰⵍⴻⵏ ⵏ ⵓⵙⴰⵣⵣⴻⴳ ⴷⴰⴳⵉ ⴷⴻⴳ ⵍⵣⵣⴰⵢⴻⵔ ⵢⴻⵔⵏⴰ ⴰⴷ ⴷ-ⵢⴻⵙⵙⴻⴽⵛⴻⵎ ⵜⵜⴻⴽⵏⵓⵍⵓⵊⵢⴰ ⵜⴰⵎⴰⵢⵏⵓⵜ ⵉ ⵡⴰⴽⴽⴻⵏ ⴰⴷ ⵙⵊⴻⵀⴷⴻⵏ ⵜⴰⴷⴰⵎⵙⴰ ⵜⴰⵖⴻⵍⵏⴰⵡⵜ.
ⴷⴻⴳ ⵜⴰⴳⴳⴰⵔⴰ, ⴷⵉ ⵙⵉⵏ ⵢⵉⴷ-ⵙⴻⵏ ⴹⴻⵎⵎⵏ-ⴷ ⴱⴻⵍⵍⵉ ⴰⵎⵢⴻⵍⵍⴻⵍ-ⴰⴳⵉ ⴰⴷ ⴷ-ⵢⴰⵡⵉ ⵢⵉⵡⴻⵏ ⵓⴱⵔⵉⴷ ⵢⴻⵍⵀⴰⵏ ⵉ ⵡⴰⴽⴽⴻⵏ ⴰⴷ ⵜⴰⵡⴻⴹ ⵍⵣⵣⴰⵢⴻⵔ ⵖⴻⵔ ⵍⴰⵎⴰⵏ ⵏ ⵡⴰⵎⴰⵏ ⵢⴻⵔⵏⴰ ⴰⴷ ⵜⴻⵙⵊⴻⵀⴻⴷ ⵜⵉⵎⴷⵓⴽⴽⵍⵉ-ⵙ ⴷ ⵜⵎⵓⵔⵜ ⵏ ⵙⵙⵄⵓⴷⵉⵢⴰ.
ⴰⵔⵏⵓ ⵖⴻⵔ
