ⴼⵓⴽⴽⴻⵏⵜ ⵍⴻⵇⴷⵉⵛⴰⵜ ⵏ ⵓⵙⴰⵔⴰⴳ ⴰⴼⵔⵉⵇⵉ ⵏ ⵜⵙⴻⵔⵜⵉⵢⵉⵏ ⵏ ⵜⵣⴻⵎⵎⴰⵔ, ⵉ ⵢⴻⵅⵜⵎⴻⵏ ⴰⵙⵙ-ⴰ ⵏ ⵍⴰⵔⴻⴱɛⴰ ⴷⴻⴳ ⵡⴻⵀⵔⴰⵏ, ⵙ ⵓⵙⵖⴻⵣⴻⴼ ⵏ 29 ⵏ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⵉ ⵢⴻⵜⵜⴻⴽⴽⴰⵏ ɣⴻⴼ "ⵡⵓⵍⵖⵓ ⵏ ⵡⴻⵀⵔⴰⵏ ɣⴻⴼ ⵢⵉⵎⴰⵍ ⵏ ⵜⵣⴻⵎⵎⴰⵔ ⴷⴻⴳ ⵜⴰⴼⵔⵉⵇⵜ", ⵉ ⴷ-ⵢⴻⵙⴱⴻⴷⴷⴻⵏ ⵜⴰⵎⵓⵖⵍⵉ ⵜⵓⵛⵔⵉⴽⵜ ⵉ ⵓⵙⵊⴻⵀⴻⴷ ⵏ ⵓⵎⴻⴷⵀⴻⵍ ⴰⵎⴻⵏⵥⴰⵡⴰⵏ ⴷ ⵓⵙⵙⴰⵍⵉ ⵏ ⵓⵙⵉⵍⴻɣ ⴷ ⵓⵙⴻⵍⵎⴻⴷ ⴰⵎⵙⴰⴷⵓⵔ, ⵉⵎⵉ ⵍⵍⴰⵏ ⴷ ⵜⵉⵔⴻⴳⵡⴰ ⵜⵉⴳⴻⵊⴷⴰⵏⵉⵏ ⵉ ⵓⴱⴻⴷⴷⴻⵍ ⴰⴷⴰⵎⵙⴰⵏ, ⵜⴰⵎⵙⵉⵣⵡⴻⵔⵜ ⴷ ⵜⵏⴻⴼⵍⵉⵜ ⵜⵓⵏⵣⵉⴳⵜ, ⴰⴽⴽⴻⵏ ⵉ ⴷ-ⵢⴻⴷⴷⴰ ⴷⴻⴳ ⵡⵓⵍⵖⵓ ⵏ ⵜⵏⴻⵖⵍⴰⴼⵜ ⵏ ⵓⵙⵉⵍⴻɣ ⴷ ⵓⵙⴻⵍⵎⴻⴷ ⴰⵎⵙⴰⴷⵓⵔ.
ⵢⴻⵙⵙⴻⴱⴷⴰⴷ-ⴷ ⵡⵓⵍⵖⵓ-ⴰ ⴰⵞⵃⴰⵍ ⵏ ⵜⵓⵣⵡⵉⵔⵉⵏ ⵜⵉⵙⵏⵓⴷⴷⵙⴰⵏⵉⵏ, ⵉ ⵢⴻⵍⵍⴰⵏ ⴷⴻⴳ ⵓⵙⴻⵜⵔⴻⵔ ⵏ ⵢⵉⵏⴰⴳⵔⴰⵡⴻⵏ ⵏ ⵓⵙⵉⵍⴻɣ ⴰⵎⵙⴰⴷⵓⵔ ⴷ ⵓⵙⵏⵉⵔⴻⵎ ⵏ ⵢⵉⵙⴰⴷⵓⵔⴻⵏ ⵏ ⵢⵉⵎⴰⵍ, ⴷ ⵓⴹⴼⴰⵔ ⵏ ⵢⵉⴱⴻⴷⴷⵉⵍⴻⵏ ⵓⵎⴹⵉⵏⴻⵏ, ⵉⵙⵏⴰⵜⵡⵉⵍⴰⵏⴻⵏ ⴷ ⵢⵉⵥⴻⵡⵔⴰⵏⴻⵏ, ⵔⵏⵓ ɣⴻⵔ ⵓⵙⵊⴻⵀⴻⴷ ⵏ ⵜⵣⴻⵎⵎⴰⵔ ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ ⴷ ⵓⴷⵀⴰⵍ ⵏ ⵓⵙⵏⵓⵍⴼⵓ ⴷ ⵓⵕⵎⴰⵙ ⴷ ⵓⵙⵏⴻⵔⵏⵉ ⵏ ⵜⵣⴻⵎⵎⴰⵔ ⵜⵉⴼⵔⵉⵇⵉⵢⵉⵏ, ⵙ ⵡⴰⵢⴻⵏ ⵉ ⴷ-ⵢⴻⵜⵜⴰⵔⵔⴰⵏ ⵉ ⵢⵉⵙⵓⵜⵔⴻⵏ ⵏ ⵜⴷⴰⵎⵙⵉⵡⵉⵏ ⵜⵉⵖⴻⵍⵏⴰⵡⵉⵏ ⴷ ⵓⵍⵣⵓⵣ ⴰⴼⵔⵉⵇⵉ ⵓⵛⵔⵉⴽ.
ⴰⵎ ⴰⴽⴽⴻⵏ ⵉ ⵢⴻⵙⵙⴻⵊⵀⴰⴷ ⵡⵓⵍⵖⵓ-ⴰ — ɛⵍⴰ ⵃⵙⴰⴱ ⵏ ⵓⵖⴱⴰⵍⵓ-ⵏⵏⵉ — ⵜⵉⵎⵙⵉⵣⵡⴰⵔ ⵏ ⵜⵣⴻⵎⵎⴰⵔ ⵜⵉⵎⵙⴰⴷⵓⵔⵉⵏ ⴰⵎ ⵜⵜⴰⵡⵉⵍ ⴰⵙⵏⵓⴷⴷⵙⴰⵏ ⵉ ⵓⵙⵙⴰⵍⵉ ⵏ ⵢⵉⵍⵓⴳⴰⵏ ⵏ ⵓⵙⵉⵍⴻɣ ⴷ ⵓⵙⵊⴻⵀⴻⴷ ⵏ ⵓⴼⵔⴰⵣ ⴷ ⵓⵙⵏⵓⵍⴼⵓ, ⵓ ⵢⴻⵙⵙⴰⵡⴰⵍ ɣⴻⵔ ⵓⵙⴻⵡⵙⴻɛ ⵏ ⵓⵎⴻⴷⵀⴻⵍ ⴰⴼⵔⵉⵇⵉ ⴷⴻⴳ ⵢⵉⵃⵔⵉⵛⴻⵏ ⵏ ⵓⵎⴱⴰⴷⴷⴻⵍ ⵏ ⵜⴰⵔⵎⵉⵜⵉⵏ ⴷ ⵓⵙⵜⴻɛⵔⴻⴼ ⵙ ⵢⵉⴳⴻⵔⴷⴰⵙⴻⵏ ⴷ ⵓⵃⴻⵔⵔⴻⴽ ⵏ ⵜⵣⴻⵎⵎⴰⵔ, ɣⴻⵔ ⵢⵉⴷⵉⵙ ⵏ ⵓⵙⵏⴻⵔⵏⵉ ⵏ ⵡⴰⵎⵎⴰⵙⴻⵏ ⵏ ⵓⴼⵔⴰⵣ ⴷ ⵜⵉⵛⵛⵓⵔⴽⵉⵡⵉⵏ ⵜⵉⵙⵓⴷⴷⵙⴰⵏⵉⵏ.
ⵉⵡⴰⴽⴽⴻⵏ ⴰⴷ ⵢⴻⵜⵜⵡⴰⴹⵎⴻⵏ ⵓⵙⵓⵔⴻⴼ ⵙⴻⴳ ⵢⵉⵎⵉⵔⵡⴻⵏ ⵉⵙⴻⵔⵜⴰⵏⴻⵏ ɣⴻⵔ ⵢⵉⴳⴻⵎⵎⴰⴹ ⵉⴱⴰⵏⴻⵏ, ⵢⴻⵙⵙⴻⴼⵔⴰ ⵡⵓⵍⵖⵓ-ⴰ "ⴰⴽⴰⵜⴰⵔ ⵏ ⵓⵎⴰⵀⵉⵍ ⵏ ⵡⴻⵀⵔⴰⵏ 2026-2027", ⵉ ⴷⴻⴳ ⵍⵍⴰⵏ ⵜⵜⴰⵡⵉⵍⴰⵜ ⵏ ⵓⵙⴻⵎⵢⵓⴷⴷⴻⵙ ⴷ ⵓⴹⴼⴰⵔ ⴷ ⵓⵙⵙⴻⴱⴷⵓⴷ ⵏ ⵜⵓⵣⵡⵉⵔⵉⵏ ⵏ ⵓⵎⴻⴷⵀⴻⵍ ⴳⴰⵔ ⵜⵎⵓⵔⴰ ⵉ ⵢⴻⵜⵜⴻⴽⴽⴰⵏ, ⵙ ⵓⵙⴻⵎⵢⵓⴷⴷⴻⵙ ⴷ ⵜⴻⵙⵎⵉⵍⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ.
ⵢⴻⵜⵜⵉⵍⵉ-ⴷ ⵓⵙⵖⴻⵣⴻⴼ ⵏ ⵡⵓⵍⵖⵓ-ⴰ ⴷ ⵜⴰⵃⴻⵔⵔⵓⵢⵜ ⵜⴰⵎⴻⵇⵇⵔⴰⵏⵜ ⴷⴻⴳ ⵓⴱⵔⵉⴷ ⵏ ⵓⵙⵊⴻⵀⴻⴷ ⵏ ⵓⵏⵓⵎⵎⴻⴷ ⴰⴼⵔⵉⵇⵉ ⴷⴻⴳ ⵓⵏⵔⴰⵔ ⵏ ⵓⵙⵏⴻⵔⵏⵉ ⵏ ⵜⵣⴻⵎⵎⴰⵔ, ⴰⵎ ⴰⴽⴽⴻⵏ ⵉ ⵢⴻⵙⵙⴻⵊⵀⴰⴷ ⴰⵎⴽⴰⵏ ⵏ ⴷⵣⴰⵢⴻⵔ ⴰⵎ ⵜⴰⵍⵍⵓⵏⵜ ⵉ ⵓⴷⵉⵡⴻⵏⵏⵉ ⴰⵙⵏⵓⴷⴷⵙⴰⵏ ⴷ ⵓⵙⵏⵓⵍⴼⵓ ⵏ ⵜⵙⴻⵏⵜⴰⵢⵉⵏ ⵜⵉⵎⴻⵏⵥⴰⵡⴰⵏⵉⵏ, ⵙ ⵡⴰⵢⴻⵏ ⵉ ⵢⴻⵎⵚⴰⴷⴰⵏ ⴷ ⵜⴻⵙⵡⴰⵙⵜ ⵏ ⵜⴰⴼⵔⵉⵇⵜ 2063 ⴷ ⵜⴻⵙⵏⵓⴷⴷⴻⵙⵜ ⵜⴰⵎⴻⵏⵥⴰⵡⴰⵏⵜ ⵏ ⵓⵙⴻⵍⵎⴻⴷ ⴷ ⵓⵙⵉⵍⴻɣ ⴰⵜⵉⴽⵏⵉ ⴷ ⵓⵎⵙⴰⴷⵓⵔ 2025-2034, ⵉ ⴷ-ⵢⴻⴽⴼⴰ ⵡⵓⵍⵖⵓ.
ⵉ ⵓⵙⵎⴻⴽⵜⵉ, ⵢⴻⵜⵜⵡⴰⵙⵙⵓⴷⴷⴻⵙ ⵓⵙⴰⵔⴰⴳ ⴰⴼⵔⵉⵇⵉ ⵏ ⵜⵙⴻⵔⵜⵉⵢⵉⵏ ⵏ ⵜⵣⴻⵎⵎⴰⵔ ɣⴻⵔ ⵢⵉⴷⵉⵙ ⵏ ⵜⵓⵍⴰⵎⴱⵉⵢⵉⵏ ⵜⵉⴼⵔⵉⵇⵉⵢⵉⵏ ⵏ ⵢⵉⵙⴰⴷⵓⵔⴻⵏ, ⵉ ɣⴻⴼ ⵢⴻⵛⵔⴻⴼ ɣⴻⴼ ⵓⵍⴷⴰⵢ-ⵏⵙⴻⵏⵜ, ⴰⵙⵙ ⵏ ⵍⴻⵜⵏⴰⵢⴻⵏ, ⵓⵏⴻⵖⵍⴰⴼ ⵏ ⵓⵡⴰⵏⴻⴽ, ⴰⵏⴻⵖⵍⴰⴼ ⵏ ⵓⴳⴻⵏⵙⵓ ⴷ ⵜⵎⴰⵣⴷⴰⵢⵉⵏ ⵜⵉⴷⵉⴳⴰⵏⵉⵏ, Brahim Merad, ⵢⴻⵔⵏⴰ ⴰⴷ ⴽⴼⵓⵏ ⴰⵙⵙ ⵏ ⵍⴻⵅⵎⵉⵙ ⵉ ⴷ-ⵢⴻⴷⴷⵓⵏ, ⵙ ⵓⵜⵜⴻⴽⴽⵉ ⵏ ⵡⴰⵣⴰⵍ ⵏ 600 ⵏ ⵢⵉⵎⵙⵉⵣⵡⴰⵔⴻⵏ ⵙⴻⴳ 18 ⵏ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ, ⴰⵔⴰ ⵢⴻⵎⵙⵉⵣⵡⵔⴻⵏ ⴷⴻⴳ 45 ⵏ ⵜⵎⴻⵣⵣⵓⴳⵉⵏ ⵉ ⵢⴻⴱⴹⴰⵏ ɣⴻⴼ ⵙⴹⵉⵙⴻⵜ ⵏ ⵜⵡⴰⵛⵓⵍⵉⵏ ⵜⵉⵎⵙⴰⴷⵓⵔⵉⵏ.

