ⵏⴰⵚⵔⵉ ⵉⵙⴻⵍⵍⴻⵎ ⵉ ⵜⵙⴻⵍⵡⴰⵢⵜ ⵏ ⵜⴻⵙⵎⵓⵏⵜ ⵏ ⵜⴻⴳⴷⵓⴷⴰ ⵏ ⵎⵓⵣⴰⵎⴱⵉⴽ

ⵉⵙⴻⵍⵍⴻⵎ ⵓⵙⴻⵍⵡⴰⵢ ⵏ ⵓⵙⵇⴰⵎⵓ ⵏ ⵓⵏⵉⴳ , ⵎⴰⵙⵙ ⵄⵣⵓⵣ ⵏⴰⵚⵔⵉ, ⴰⵙⵙ-ⴰ ⵏ ⵍⵀⴻⴷ, ⵉ ⵜⵙⴻⵍⵡⴰⵢⵜ ⵏ ⵜⴻⵙⵎⵓⵏⵜ ⵏ ⵜⴻⴳⴷⵓⴷⴰ ⵏ ⵎⵓⵣⴰⵎⴱⵉⴽ, ⵎⴰⵙⵙⴰ ⵎⴰⵔⴳⴰⵔⵉⴷⴰ ⴰⴷⴰⵎⵓⴳⵉ ⵜⴰⵍⴰⴱⴰ, ⴷ ⵜⴻⵔⴱⴰⵄⵜ ⵜⴰⴱⴰⵔⵍⴰⵎⴰⵏⵉⵜ ⵉ ⵜ-ⵉⴷ-ⵉⵎⵓⵏⵏⴻⵏ. ⴰⵢⴰⴳⵉ ⵢⴻⵍⵍⴰ-ⴷ ⴷⴻⴳ ⵓⵣⴻⵏⵣⵉⵖ ⵏ ⵜⵉⵔⵣⵉ ⵜⵓⵏⵚⵉⴱⵜ ⵉ ⵜⴻⵜⵜⴻⴳⴳⴻⵏ ⵖⴻⵔ ⵍⴻⵣⵣⴰⵢⴻⵔ.

ⴷⴻⴳ ⵜⴰⵍⵍⵉⵜ ⵏ ⵜⴻⵎⵍⵉⵍⵉⵜ-ⴰⴳⵉ, ⵎⴰⵙⵙ ⵏⴰⵚⵔⵉ ⵉⵙⵙⴻⴽⵏⴻⴷ ⵍⵇⴻⴷⴷ ⵏ "ⵡⴰⵙⵙⴰⵖⴻⵏ ⵓⵎⴻⵣⵔⴰⵢⴻⵏ ⵉⵕⴻⵙⵙⴰⵏⴻⵏ ⵉ ⵢⴻⵙⴷⵓⴽⴽⵍⴻⵏ ⵙⵏⴰⵜ ⵏ ⵜⵎⵓⵔⴰ, ⵉ ⵢⴻⴱⴷⴰⵏ ⵙⴻⴳ ⵜⴰⵍⵍⵉⵜ ⵏ ⵓⵏⵏⴰⵖ ⵏ ⵓⵖⵔⴻⴼ ⴰⵎⵓⵣⴰⵎⴱⵉⴽⵉ ⵎⴳⴰⵍ ⴰⵏⴻⴽⵛⵓⵎ  .

ⴷⴰⵖⴻⵏ, ⵉⵙⵍⴻⵎ-ⴷ ⵙ "ⵜⵖⴰⵔⴰ ⵏ ⵡⴰⵙⵙⴰⵖⴻⵏ ⵉⵙⴻⵔⵜⵉⵢⴻⵏ ⴷ ⵓⵙⵡⵉⵔ ⵏ ⵓⵎⵙⴰⵙⴻⵢ ⵉⵕⴻⵙⵙⴰⵏ ⴳⴰⵔ ⵍⴻⵣⵣⴰⵢⴻⵔ ⴷ ⵎⵓⵣⴰⵎⴱⵉⴽ ⴷⴻⴳ ⵢⵉⵎⵣⴰⵔⴰⴳⴻⵏ ⵏ ⵜⵎⴻⵏⵏⴰⵟ ⴷ ⵡⵉⴷ ⵉⴳⵔⴰⵖⵍⴰⵏⴻⵏ", ⵉⵙⵙⴻⵃⵔⴻⵙ ⴱⴻⵍⵍⵉ "ⵜⵓⵇⵇⵏⴰ ⵏ ⵓⵏⵏⴰⵖ ⴰⵎⴻⵣⴷⴰⵢ ⴷ ⵍⵍⵙⴰⵙ ⵉⴶⴻⵀⴷⴻⵏ ⵉ ⵓⵙⴻⴶⵀⴻⴷ ⵏ ⵜⴷⵓⴽⵍⵉ ⵏ ⵙⵉⵏ".

ⴰⵙⴻⵍⵡⴰⵢ ⵏ ⵓⵙⵇⴰⵎⵓ ⵏ ⵓⵏⵉⴳ ⵉⵙⵙⵉⵡⴻⵍ ⵉ "ⵡⴰⵣⴰⵍ ⵏ ⵓⵙⴰⵍⵉ ⵏ ⵡⴰⵙⵙⴰⵖⴻⵏ ⵉⴷⴰⵎⵙⴰⵏⴻⵏ ⴷ ⵢⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ ⵖⴻⵔ ⵓⵙⵡⵉⵔ ⵏ ⵡⴰⵙⵙⴰⵖⴻⵏ ⵉⵙⴻⵔⵜⵉⵢⴻⵏ ⵉⴼⴰⵣⴻⵏ, ⵙ ⵓⵙⴻⴷⴷⴻⵔ ⵏ ⵜⴻⵙⵇⴰⵎⵓⵜ ⵜⴰⵎⴻⵣⴷⴰⵢⵜ ⵏ ⵍⴻⵣⵣⴰⵢⴻⵔ ⴷ ⵎⵓⵣⴰⵎⴱⵉⴽ, ⴷ ⵓⵙⵙⴻⵎⵖⴻⵔ ⵏ ⵢⵉⵏⵏⴰⵔⴻⵏ ⵏ ⵓⵎⵢⴻⵛⵛⴻⵔ ⵉⵡⴰⴽⴽⴻⵏ ⴰⴷ ⴷ-ⵓⵡⵢⴻⵏ ⵢⵉⵏⵏⴰⵔⴻⵏ ⵉⵙⵔⴰⵜⵉⴷⵊⵉⵢⴻⵏ ⴰⵎ ⵜⵎⴻⵔⵔⵉ (énergie), ⵜⴰⵎⴳⵓⵔⵉ, ⵜⵉⴼⴻⵔⴽⵉ, ⴰⵙⴻⵍⵎⴻⴷ ⵓⵏⵉⴳ ⴷ ⵓⵙⵉⵍⴻⵖ ⴰⵎⴻⵣⵣⵓⵍⴰⵏ".

ⵙⴻⴳ ⵜⴰⵎⴰ-ⵙ, ⵎⴰⵙⵙⴰ ⴰⴷⴰⵎⵓⴳⵉ ⵜⴰⵍⴰⴱⴰ ⵜⴻⵙⵙⴻⵏⴽⴰⴷ ⵜⴰⵍⵍⴻⵍⵜ ⵜⴰⵣⵣⴰⵢⵔⵉⵜ "ⵉⵕⴻⵙⵙⴰⵏ ⵢⴻⵔⵏⴰ ⵉ ⵉⵜⴻⴷⴷⵓⵏ" ⵉ ⵜⵎⵓⵔⵜ-ⵉⵙ, ⵍⴰⴷⵖⴰ ⴷⴻⴳ ⵢⵉⵏⵏⴰⵔⴻⵏ ⵏ ⵜⵎⴻⵔⵔⵉ ⴷ ⵓⵙⴻⵍⵎⴻⴷ ⵓⵏⵉⴳ, ⵔⵏⵉ-ⴷ ⴼⴻⵍⵍ-ⴰⵙⴻⵏ ⵡⴰⵀⵉⵍⴻⵏ ⵏ ⵓⵙⵉⵍⴻⵖ ⵉ ⴷ-ⵜⴻⵜⵜⴰⴽ ⵍⴻⵣⵣⴰⵢⴻⵔ ⵉ ⵢⵉⵎⴹⴻⴱⴱⵔⴻⵏ ⵏ ⵡⴰⵟⴰⵙ ⵏ ⵢⵉⵏⵏⴰⵔⴻⵏ ⴷⴻⴳ ⵎⵓⵣⴰⵎⴱⵉⴽ.

ⵙⴻⵍⴷ ⵎⵉ ⵜⴻⵙⵙⴻⵏⴽⴰⴷ "ⴰⵎⴽⴰⵏ ⴰⵙⵔⴰⵜⵉⴷⵊⵉ" ⵏ ⵍⴻⵣⵣⴰⵢⴻⵔ ⴷⴻⴳ ⵓⴷⴻⴳⴳⴻⵔ ⵏ ⵓⵙⵏⴻⴼⵍⵉ ⴷ ⵓⵎⵢⴻⵛⵛⴻⵔ "ⵓⵏⵥⵓⵍ-ⵓⵏⵥⵓⵍ" (Sud-Sud), ⵜⴰⵙⴻⵍⵡⴰⵢⵜ ⵏ ⵜⴻⵙⵎⵓⵏⵜ ⵏ ⵎⵓⵣⴰⵎⴱⵉⴽ ⵜⵓⵙⴰ-ⴷ ⵙ "ⵜⵉⵏⴼⴰⵍⵉⵡⵉⵏ ⵏ ⵏⴻⵢⵢⴰ ⵉ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵖⴻⴼ ⵢⴰⴽⴽ ⵍⵎⴻⴶⵀⵓⴷⴰⵜ-ⵉⵙ ⵉ ⵓⵙⴻⴶⵀⴻⴷ ⵏ ⵓⵎⵢⴻⵛⵛⴻⵔ ⴳⴰⵔ ⵜⵎⵓⵔⴰ ⵏ ⵜⴻⴼⵔⵉⵇⵜ ⵉ ⵓⵡⴻⵣⵣⵉ ⵏ ⵢⵉⵙⴰⵔⴰⵎⴻⵏ ⵏ ⵢⵉⴳⵓⵔⴻⴼ ⵏ ⵜⴻⴼⵔⵉⵇⵜ".

ⴷⴻⴳ ⵓⵏⵏⴰⵔ-ⴰⴳⵉ, ⵙⵉⵏ ⵏ ⵢⵉⴽⵓⴱⴰⵔ ⵙⵏⴻⴽⴷⴻⵏ "ⵜⵉⴷⴷⵢ ⵜⴰⵏⴼⴻⵍⵡⵉⵜ ⵏ ⵡⴰⵙⵙⴰⵖⴻⵏ ⵏ ⵙⵉⵏ", ⵙⴻⵃⵔⴻⵙⴻⵏ ⵖⴻⴼ ⵓⴽⴻⵎⵎⴻⵍ ⵏ ⵓⵙⴻⴶⵀⴻⴷ ⵏ ⵓⵎⵛⴻⵡⵡⴻⵔ ⴷ ⵓⵎⵙⴰⵙⴻⵢ ⵖⴻⴼ ⵜⴻⵎⵙⴰⵍ ⵏ ⵜⵎⴻⵏⵏⴰⵟ ⴷ ⵓⵎⴰⴹⴰⵍ ⵉ ⴷ-ⵢⴻⵙⴷⵓⴽⴽⵍⴻⵏ ⵙⵏⴰⵜ ⵏ ⵜⴰⵎⵉⵡⵉⵏ.

ⵉⴽⴻⵎⵎⴻⵍ ⵓⵙⵉⵡⴹ ⵙ ⵓⵙⴻⴽⵏⴻⴷ ⴱⴻⵍⵍⵉ ⵙⵏⴰⵜ ⵏ ⵜⴰⵎⵉⵡⵉⵏ ⵄⴰⵡⴷⴻⵏⵜ ⵙⵏⴻⴽⴷⴻⵏⵜ "ⴰⴷⴷⴻⴳ-ⵏⵙⴻⵏⵜ ⵉⵕⴻⵙⵙⴰⵏ ⵉ ⵓⵣⵔⴻⴼ ⵏ ⵓⵖⵔⴻⴼ ⴰⵚⴻⵃⵔⴰⵡⵉ ⴷⴻⴳ ⵓⵙⴻⵏⵏⴻⴷ ⵏ ⵢⵉⵎⴰⵏ-ⵉⵙ (autodétermination) ⵙ ⵓⵇⴰⴷⴻⵔ ⵏ ⵜⵏⴻⵖⵜⴰⵙⵉⵏ ⵏ ⵓⵣⵔⴻⴼ ⴰⴳⵔⴻⵖⵍⴰⵏ", ⴰⵎ ⴰⴽⴽⴻⵏ ⵉ ⵙⴻⵃⵔⴻⵙⴻⵏ ⵖⴻⴼ "ⵓⵕⵓⵚⵓ ⵏ ⵍⴻⵀⵏⴰ ⵓⴼⵔⵉⵏ ⴷⴻⴳ ⵓⴳⵎⵓⴹ ⴰⵍⴻⵎⵎⴰⵙ, ⵙ ⵓⵟⵎⴰⵏ ⵏ ⵓⵣⵔⴻⴼ ⵏ ⵓⵖⵔⴻⴼ ⴰⴼⴰⵍⴻⵙⵟⵉⵏⵉⵜ ⵉ ⵓⵙⴱⴻⴷⴷⵉ ⵏ ⴷⴷⵡⵍⴰ-ⵙ ⵜⵉⵍⴻⵍⵍⵉ ⴷ ⵍⵇⵓⴷⵙ ⵜⴰⴱⴰⵕⴰⴽⵜ ⴷ ⵜⴰⵎⴰⵏⴰⵖⵜ-ⵉⵙ".