ⵜⴻⴽⴼⴰ ⴷⴻⴳ ⵢⵉⴹ ⵏ ⵙⵙⴻⴱⵜ, ⴷⴻⴳ ⵡⴻⵎⴽⴰⵏ ⵏ ⵣⵣⴰⵡⵉⵢⴰ ⵍⴱⴻⵍⵇⴰⵢⴷⵉⵢⴰ ⵍⵀⴻⴱⵔⵉⵢⴰ ⴷⴻⴳ ⵜⵖⵉⵡⴰⵏⵜ ⵏ ⵙⵉⴷⵉ ⵎⵄⴻⵔⵓⴼ ⴷⴻⴳ ⵡⴻⵀⵔⴰⵏ, ⵜⵉⵎⵍⵉⵍⵉⵜ ⵜⵉⵙ 18 ⵏ ⵜⵉⵎⵙⵉⵔⵉⵏ ⵜⵉⵎⵓⵃⴻⵎⵎⴰⴷⵉⵢⵉⵏ ⵉ ⴷ-ⵢⴻⵡⵡⵉⵏ ⴰⵙⴻⴳⴳⴰⵙ-ⴰ ⵖⴻⴼ ⵡⴰⵎⵎⴰⵙ ⵏ "ⵢⵉⵍⴻⵖⵎⴰⵏ ⵏ ⵢⵉⵎⵔⴰⴱⴹⴻⵏ ⵉⵙⵓⴼⵉⵢⴻⵏ ⴷⴻⴳ ⵓⵇⴷⴻⵛ ⵖⴻⴼ ⵍⵇⴻⵔⵄⴰⵏ ⵍⴽⴰⵔⵉⵎ ⴷ ⵜⵓⵙⵙⵏⵉⵡⵉⵏ ⵏ ⵛⵛⵔⴻⵄ ⵏ ⵍⵉⵙⵍⴰⵎ".
ⵜⴻⵍⵍⴰ-ⴷ ⴷⴻⴳ ⵢⵉⴹ ⴰⵏⴻⴳⴳⴰⵔⵓ ⵏ ⵜⴻⵎⵍⵉⵍⵉⵜ-ⴰ ⵢⵉⵡⴻⵜ ⵏ ⵜⵙⴰⵔⴰⴳⵜ ⵉ ⴷ-ⵢⴻⴼⴽⴰ ⵡⴻⵎⵖⴰⵔ ⵏ ⵍⴵⴰⵎⴻⵄ ⵏ ⵍⴷⵣⴰⵢⴻⵔ ⵛⵛⵉⵅ ⵎⵓⵃⴻⵎⵎⴻⴷ ⵍⵎⴰⵎⵓⵏ ⵍⵇⴰⵙⵉⵎⵉ ⵍⵃⴰⵙⴰⵏⵉ ⵙ ⵓⵣⵡⴻⵍ "ⵜⴰⵇⵡⴰ ⴷ ⵜⴰⵙⴰⵔⵓⵜ ⵏ ⵓⵙⴻⵍⵎⴻⴷ ⴷ ⵍⵙⴰⵙ ⵏ ⵍⴻⴱⵏⵉ: ⵉⵍⴻⵖⵎⴰⵏ ⵏ ⵢⵉⵙⵓⴼⵉⵢⴻⵏ ⴷⴻⴳ ⵓⵙⴻⵔⵙⵉ ⵏ ⵡⴰⵎⵎⴰⵙ ⵏ ⵍⵇⴻⵔⵄⴰⵏ ⴷ ⵍⴻⴱⵏⵉ ⵏ ⵡⴻⵎⴷⴰⵏ".
ⵢⴻⵙⵙⴻⴷⵀⴰ-ⴷ ⵛⵛⵉⵅ ⵍⵇⴰⵙⵉⵎⵉ ⵍⵃⴰⵙⴰⵏⵉ ⴷ ⴰⴽⴽⴻⵏ "ⴰⵇⴷⴻⵛ ⵖⴻⴼ ⵍⵇⴻⵔⵄⴰⵏ ⵍⴽⴰⵔⵉⵎ ⴷ ⵜⵓⵙⵙⵏⵉⵡⵉⵏ ⵏ ⵛⵛⵔⴻⵄ ⵢⴻⵍⵍⴰ ⵖⴻⴼ ⵜⴻⵖⵣⵉ ⵏ ⵓⵎⴻⵣⵔⵓⵢ ⴰⵏⵙⴻⵍⵎⴰⵎ ⴷ ⵡⵓⵍ ⵏ ⵢⵉⵣⴻⵏ ⵏ ⵢⵉⵙⵓⴼⵉⵢⴻⵏ, ⵉⵎⵉ ⵙⴷⵓⴽⴽⵍⴻⵏ ⴳⴻⵔ ⴷⴷⵓⵕ ⵏ ⵜⵓⵙⵙⵏⴰ ⵏ ⵛⵛⵔⴻⵄ ⴷ ⵜⴻⵣⴷⴻⴳ ⵏ ⵓⵙⴻⴳⵎⵉ ⴰⵕⵓⵃⴰⵏⵉ, ⵔⵔⴰⵏ ⵍⵇⴻⵔⵄⴰⵏ ⵍⴽⴰⵔⵉⵎ ⴷ ⵜⵓⵙⵙⵏⴰ ⵢⴻⵜⵜⵡⴰⴼⵀⴰⵎⴻⵏ ⴷ ⵜⵉⴽⵍⵉ ⵢⴻⵜⵜⵡⴰⵄⴰⵛⴻⵏ, ⵔⵔⴰⵏ ⵜⴰⵇⵡⴰ ⴷ ⵛⵛⴻⵔⴹ ⴰⵃⴻⵇⵇⴰⵏⵉ ⵉⵡⴰⴽⴽⴻⵏ ⴰⴷ ⴷ-ⴰⵡⵉⵏ ⵜⴰⵎⵓⵙⵏⵉ".
ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ "ⵣⵣⴰⵡⵉⵢⴰⵜ ⴷⴻⴳ ⵍⴷⵣⴰⵢⴻⵔ ⵉⵎⵉ ⴷ ⵜⵉⵎⴰⴷⴷⴰⵙⵉⵏ ⵏ ⵜⵓⵙⵙⵏⴰ ⴷ ⵓⵙⴻⴳⵎⵉ, ⵃⵓⵔⴱⴻⵏⵜ ⵖⴻⴼ ⵍⵇⴻⵔⵄⴰⵏ ⵍⴽⴰⵔⵉⵎ ⵢⴻⵔⵏⴰ ⵜⵜⴻⴽⴽⴰⵏ-ⵜ ⴷⴻⴳ ⵍⴻⴱⵏⵉ ⵏ ⵜⴷⵓⴽⴽⵍⵉ ⵏ ⵜⵎⴻⵜⵜⵉ ⴷ ⵓⵃⴰⴷⴻⵔ ⵏ ⵍⵙⴰⵙⴰⵜ ⵏ ⵍⵖⴰⵛⵉ ⴷⴻⴳ ⵜⴰⵍⵍⵉⵢⵉⵏ ⵢⴻⵎⴳⴰⵔⴰⴷⴻⵏ ⵏ ⵓⵎⴻⵣⵔⵓⵢ, ⵜⴻⵅⵍⴻⴹ ⴷⴻⴳ ⵢⵉⵣⴻⵏ-ⵏⵙⴻⵏⵜ ⵔⵔⵓⵃ ⵏ ⴷⴷⵉⵏ ⵏ ⵍⵉⵙⵍⴰⵎ ⴷ ⵔⵔⵓⵃ ⵜⴰⵖⴻⵍⵏⴰⵡⵜ".
ⵢⴻⵏⵏⴰ ⵛⵛⵉⵅ ⵍⵇⴰⵙⵉⵎⵉ ⵍⵃⴰⵙⴰⵏⵉ ⴷ ⴰⴽⴽⴻⵏ "ⵣⵣⴰⵡⵉⵢⴰⵜ ⵓⵖⴰⵍⴻⵏⵜ ⴷ ⴰⵎⴹⵉⵇ ⵉ ⴷ-ⵢⴻⵙⵙⵓⴼⵓⵖⴻⵏ ⵉⵔⴳⴰⵣⴻⵏ, ⵙⵙⴻⴽⴽⵔⴰⵢⴻⵏⵜ-ⴷ ⴰⵎⴷⴰⵏ ⵢⴻⵙⵙⵏⴻⵏ ⵕⴻⴱⴱⵉ-ⵙ ⴷ ⴷⴷⵉⵏ-ⵉⵙ ⵢⴻⵔⵏⴰ ⵢⴻⵃⴼⴻⴹ ⴰⴷⵍⵉⵙ ⵏ ⵕⴻⴱⴱⵉ ⵢⴻⵜⵜⵣⵓⵅⵅⵓ ⵙ ⵜⵎⴰⴳⵉⵜ-ⵉⵙ", ⵢⴻⵔⵔⴰ-ⴷ ⵜⴰⵎⴰⵡⵜ ⴷ ⴰⴽⴽⴻⵏ "ⵣⵣⴰⵡⵉⵢⴰⵜ ⵍⵍⴰⵏⵜ ⵢⴻⵔⵏⴰ ⵎⴰⵣⴰⵍ-ⵉⵜⴻⵏⵜ ⴷ ⵢⵉⵡⴻⵜ ⵙⴻⴳ ⵍⵙⴰⵙⴰⵜ ⵜⵉⴳⴻⵊⴷⴰⵏⵉⵏ ⵖⴻⴼ ⵡⴰⵛⵓ ⵜⴻⴱⴷⴻⴷ ⵜⵎⴰⴳⵉⵜ ⵏ ⵓⵣⵣⴰⵢⵔⵉ".
ⴷⴻⴳ ⵡⴰⵡⴰⵍ-ⵉⵙ, ⵢⴻⴼⴽⴰ-ⴷ ⵓⵎⵙⴰⵔⴰⴳ-ⴰ ⴰⵎⴻⴷⵢⴰ ⵙ ⵡⵉⵏ ⵢⴻⵙⴱⴻⴷⴷⴻⵏ ⴰⵡⴰⵏⴰⴽ ⴰⵣⵣⴰⵢⵔⵉ ⴰⵜⵔⴰⵔ, ⵍⴰⵎⵉⵔ ⵄⴻⴱⴷⴻⵍⵇⴰⴷⴻⵔ, ⵉ ⵖⴻⴼ ⴷ-ⵢⴻⵏⵏⴰ ⴷ ⴰⴽⴽⴻⵏ "ⵢⴻⵙⴷⵓⴽⴽⴻⵍ ⴳⴻⵔ ⵜⵎⴻⵀⵍⴰ ⵜⴰⵙⴻⵔⵜⴰⵏⵜ ⴷ ⵍⴵⵉⵀⴰⴷ ⴰⵙⴻⵔⴷⴰⵙ ⴷ ⵓⵙⴻⴳⵎⵉ ⴰⵙⵓⴼⵉ, ⵢⵓⵖⴰⵍ ⴷ ⴰⵣⴰⵎⵓⵍ ⴰⴳⵔⴰⵖⵍⴰⵏ ⴷⴻⴳ ⵓⵎⴻⵏⵏⵓⵖ ⴷ ⵓⵖⴻⵔⴱⴰⵣ ⴷⴻⴳ ⵍⵅⴻⵟⵢⵉⵢⵉⵏ ⵏ ⵡⴻⵎⴷⴰⵏ". ⵢⴻⵎⵎⴰⵍ-ⴷ ⵡⴻⵎⵖⴰⵔ ⵏ ⵍⴵⴰⵎⴻⵄ ⵏ ⵍⴷⵣⴰⵢⴻⵔ ⴷ ⴰⴽⴽⴻⵏ "ⵜⵜⴰⵙⴻⵡⵡⵓⴼ ⴰⵏⵙⴻⵍⵎⴰⵎ ⵓⵔ ⵢⴻⵍⵍⵉ ⴰⵔⴰ ⵢⵉⵡⴻⵏ ⵏ ⵡⴰⵙⵙ ⵢⴻⴱⴹⴰ ⵖⴻⴼ ⵍⴼⴻⵇⵀ ⴷ ⵍⵃⴰⴷⵉⵜ, ⵎⴰⵛⴰ ⵢⴻⵍⵍⴰ ⴷ ⵍⵙⴰⵙ-ⵏⵙⴻⵏ, ⴰⴱⵔⵉⴷ-ⵉⵙ ⴰⵃⴻⵇⵇⴰⵏⵉ ⵢⴻⵙⴷⵓⴽⴽⴻⵍ ⵙ ⵍⵎⴻⵄⵏⴰ ⴳⴻⵔ ⵓⵃⵔⵉⵛ ⵏ ⵛⵛⵔⴻⵄ ⴷ ⵓⵃⵔⵉⵛ ⴰⵕⵓⵃⴰⵏⵉ ⴷⴻⴳ ⵍⵉⵙⵍⴰⵎ, ⵢⵉⵙ-ⵙ ⵉ ⴷ-ⵜⴻⵜⵜⵉⵍⵉ ⵜⵎⴻⴷⴷⵓⵔⵜ ⵢⴻⵎⵙⴻⵡⵡⴰⵢⴻⵏ".
ⵉⴽⴻⵎⵎⴻⵍ ⵢⴻⵏⵏⴰ-ⴷ "ⴰⵃⵡⴰⴵ ⴰⵙⵙ-ⴰ ⴷ ⴰⵎⴻⵇⵇⵔⴰⵏ ⵉⵡⴰⴽⴽⴻⵏ ⴰⴷ ⴷ-ⵏⴻⴷⴷⴻⵎ ⴰⵎⴻⴷⵢⴰ-ⵢⴰ ⵢⴻⵎⵙⴻⵡⵡⴰⵢⴻⵏ ⵉⵡⴰⴽⴽⴻⵏ ⴰⴷ ⵏⵇⴰⴱⴻⵍ ⵉⵖⴻⴱⵍⴰⵏ ⵏ ⵍⵡⴻⵇⵜ-ⴰ". ⵢⴻⵙⵙⴰⵡⴻⵍ ⵛⵛⵉⵅ ⵎⴰⵎⵓⵏ ⵍⵇⴰⵙⵉⵎⵉ ⵖⴻⵔ "ⵜⴷⵓⴽⴽⵍⵉ ⵏ ⵢⵉⵍⴻⵖⵎⴰⵏ ⵏ ⵍⵄⵓⵍⴰⵎⴰ ⴷ ⵣⵣⴰⵡⵉⵢⴰⵜ ⵉⵡⴰⴽⴽⴻⵏ ⴰⴷ ⵇⴻⴷⵛⴻⵏ ⵖⴻⴼ ⵍⵇⴻⵔⵄⴰⵏ ⵍⴽⴰⵔⵉⵎ ⵖⴻⴼ ⵍⴻⵃⵙⴰⴱ ⵏ ⵍⵎⴻⵇⵚⵓⴷ-ⵉⵙ ⵙ ⵡⴻⴱⵔⵉⴷ ⵢⴻⴱⴹⴰⵏ ⴳⴻⵔ ⵡⴰⵢⴻⵏ ⵢⴻⵔⵙⴻⵏ ⴷ ⵡⴰⵢⴻⵏ ⵢⴻⵜⵜⴱⴻⴷⴷⵉⵍⴻⵏ, ⴷ ⵔⵔⵓⵃ ⵢⴻⵙⴷⵓⴽⴽⴻⵍⴻⵏ ⴳⴻⵔ ⵓⵟⵟⴰⴼ ⴷⴻⴳ ⵍⴰⵚⴻⵍ ⴷ ⵜⵎⵓⵙⵏⵉ ⵏ ⵜⵉⵍⴰⵡⵜ ⴷ ⵓⵇⴰⴷⴻⵔ ⵏ ⵡⴰⵢⴻⵏ ⵢⴻⵃⵡⴰⴵ ⵍⵡⴻⵇⵜ-ⴰ ⴷ ⵡⴰⵢⴻⵏ ⴷ-ⵢⴻⵔⵏⴰⵏ ⴷⴻⴳ ⵜⵎⴻⴷⴷⵓⵔⵜ".
ⵜⵃⴻⴹⴻⵔ ⴷⴻⴳ ⵜⵙⴰⵔⴰⴳⵜ ⵜⴰⵏⴳⴰⵔⵓⵜ ⵏ ⵜⴻⵎⵍⵉⵍⵉⵜ-ⴰ, ⵉ ⴷ-ⵜⵀⴻⴳⴳⵉ ⵣⵣⴰⵡⵉⵢⴰ-ⵢⴰ ⵢⴰⵍ ⴰⵙⴻⴳⴳⴰⵙ ⵍⵎⴻⵏⴷ ⵏ ⵡⴰⴳⴳⵓⵔ ⵏ ⵔⴻⵎⴹⴰⵏ ⵍⵄⴰⵍⵉ, ⵛⵛⵉⵅ ⵙⵉⴷⵉ ⵎⵓⵃⴻⵎⵎⴻⴷ ⵏⵓⵔⴻⴷⵉⵏ ⴱⴻⵍⵇⴰⵢⴷ, ⵛⵛⵉⵅ ⵏ ⵣⵣⴰⵡⵉⵢⴰ ⵍⴱⴻⵍⵇⴰⵢⴷⵉⵢⴰ ⵍⵀⴻⴱⵔⵉⵢⴰ, ⴷ ⵜⴻⴳⵔⴰⵡⵜ ⵏ ⵍⵄⵓⵍⴰⵎⴰ ⴷ ⵛⵛⵉⵅⴰⵜ ⵖⴻⵔ ⵜⴰⵎⴰ ⵏ ⵢⵉⵎⴹⴻⴱⴱⵔⴻⵏ ⵏ ⵜⴻⵎⵏⴰⴹⵜ.
ⵉ ⵓⵙⵎⴻⴽⵜⵉ, ⵜⵜⴻⴽⴽⴰⵏ ⴷⴻⴳ ⵜⴻⵣⵔⵉⴳⵜ-ⴰ ⵜⴻⴳⵔⴰⵡⵜ ⵏ ⵍⵄⵓⵍⴰⵎⴰ ⴷ ⵍⴼⵓⵇⴰⵀⴰ ⵏ ⵍⴷⵣⴰⵢⴻⵔ ⴷ ⵓⵎⴰⴹⴰⵍ ⴰⵏⵙⴻⵍⵎⴰⵎ ⴰⵎ ⵎⴰⵚⴻⵔ, ⵍⵓⴱⵏⴰⵏ, ⵜⵓⵔⴽⵉⵢⵢⴰ, ⵍⵄⵉⵔⴰⵇ, ⵜⵓⵏⴻⵙ, ⵙⵓⵔⵢⴰ, ⴷ ⵙⵓⴷⴷⴰⵏ.
ⵡⵡⵉⵏⵜ-ⴷ ⵜⵙⴰⵔⴰⴳⵉⵏ ⵉ ⴷ-ⵢⴻⵍⵍⴰⵏ ⴷⴻⴳ ⵜⴻⵎⵍⵉⵍⵉⵜ-ⴰ ⵖⴻⴼ ⵡⴰⵟⴰⵙ ⵏ ⵢⵉⵙⴻⵏⵜⴰⵍ ⴳⴰⵔ-ⴰⵙⴻⵏ "ⵓⴷⵎⴰⵡⴻⵏ ⵏ ⵍⴻⵃⴹⴰⵔⴰ ⵏ ⵢⵉⵙⵓⴼⵉⵢⴻⵏ ⵉ ⵜⵎⴻⴷⴷⵓⵔⵜ ⵏ ⵏⵏⴱⵉ ⴷ ⵚⵚⵉⴼⴰⵜ ⵜⵉⵎⵓⵃⴻⵎⵎⴰⴷⵉⵢⵉⵏ" ⴷ "ⵍⵉⵙⴰⵙⴰⵜ ⵏ ⵢⵉⵙⵓⴼⵉⵢⴻⵏ ⴷⴻⴳ ⵜⵓⵙⵙⵏⵉⵡⵉⵏ ⵏ ⵛⵛⵔⴻⵄ ⵏ ⵍⵉⵙⵍⴰⵎ" ⴷ "ⵉⵍⴻⵖⵎⴰⵏ ⵏ ⵢⵉⵙⵓⴼⵉⵢⴻⵏ ⴷⴻⴳ ⵓⵇⴷⴻⵛ ⵖⴻⴼ ⵍⴼⴻⵇⵀ ⴰⵍⵎⴰⵍⵉⴽⵉ" ⴷ "ⵡⴰⵢⴻⵏ ⴷ-ⴼⴽⴰⵏ ⵢⵉⵙⵓⴼⵉⵢⴻⵏ ⴷⴻⴳ ⵜⵓⵙⵙⵏⴰ ⵏ ⵍⵃⴰⴷⵉⵜ" ⴷ "ⵉⵍⴻⵖⵎⴰⵏ ⵏ ⵢⵉⵙⵓⴼⵉⵢⴻⵏ ⴷⴻⴳ ⵓⵃⵓⴷⴷⵓ ⵖⴻⴼ ⵍⵄⴰⵇⵉⴷⴰ ⵜⵜⴰⵙⵓⵏⵏⵉⵢⵜ" ⴷ ⵡⴰⵢⴻⵏ-ⵏⵏⵉⴹⴻⵏ.
ⴰⵎ ⴰⴽⴽⴻⵏ ⵍⵍⴰⵏ-ⴷ ⵜⵉⵖⵉⵎⵉⵢⵉⵏ ⵜⵓⵙⵙⵏⴰⵏⵉⵢⵉⵏ ⵢⴻⵙⴷⵓⴽⴽⵍⴻⵏ ⵉⵎⵙⴰⵔⴰⴳⴻⵏ ⴰⴽⴽ ⴷ ⵢⵉⵏⴻⵍⵎⴰⴷⴻⵏ ⵏ ⵣⵣⴰⵡⵉⵢⴰ ⵍⴱⴻⵍⵇⴰⵢⴷⵉⵢⴰ ⵉ ⵢⴻⵟⵟⴼⴻⵏ ⴷⴻⴳ ⵓⵙⴻⵍⵎⴻⴷ ⵏ ⵍⵇⴻⵔⵄⴰⵏ ⵍⴽⴰⵔⵉⵎ ⴷ ⵛⵛⵔⴻⵄ ⴷ ⵍⴼⴻⵇⵀ ⴰⵏⵙⴻⵍⵎⴰⵎ.
ⴰⵔⵏⵓ ⵖⴻⵔ
