ⵢⴻⵎⵎⵓⵜ ⴷⴻⴳ ⵜⴻⵙⵔⴰⴳⵉⵏ ⵜⵉⵎⴻⵣⵡⵓⵔⴰ ⵏ ⵜⵙⴻⴱⵃⵉⵜ ⵏ ⵡⴰⵙⵙ-ⴰ ⵏ ⵍⵃⴻⴷⴷ, ⵓⵏⴻⴼⵔⴰⵢ ⴰⴳⵔⴰⵖⵍⴰⵏ ⴰⵣⵣⴰⵢⵔⵉ ⴰⵇⴱⵓⵔ ⵎⵓⵃⴻⵎⵎⴻⴷ ⵃⴻⵏⵚⴰⵍ, ⵖⴻⴼ ⵍⴻⵄⵎⴻⵔ ⵏ 78 ⵏ ⵢⵉⵙⴻⴳⴳⴰⵙⴻⵏ, ⴷⵖⴰ ⴰⵢⴰ ⴷⴻⴳ ⵡⴻⴱⵔⵉⴷ ⵏ ⵜⵓⵖⴰⵍⵉⵏ-ⵉⵙ ⵙⴻⴳ ⵍⵡⵉⵍⴰⵢⴰ ⵏ ⵛⵛⵍⴻⴼ ⵖⴻⵔ ⵡⴻⵀⵔⴰⵏ, ⴰⴽⴽⴻⵏ ⵉ ⴷ-ⵏⵏⴰⵏ ⵡⵉⴷ ⵉ ⵙ-ⵢⴻⵇⴻⵔⴱⴻⵏ.
ⵖⴻⴼ ⵍⴻⵃⵙⴰⴱ ⵏ ⵢⵉⵖⴱⵓⵍⴰ-ⴰⴳⵉ, ⵢⴻⴼⴼⴻⵖ-ⵉⵜ ⵕⵕⵓⵃ ⵎⴱⴻⵄⴷ ⵢⵉⵡⴻⵜ ⵏ ⵜⵉⵢⵉⵜⴰ ⵏ ⵡⵓⵍ ⵉ ⵜ-ⵢⴻⵡⵡⵜⴻⵏ ⴽⵔⴰ ⵏ ⵜⴻⵙⵔⴰⴳⵉⵏ ⴽⴰⵏ ⵎⴱⴻⵄⴷ ⵎⵉ ⵉⵜⵜⴻⴽⴽⵉ ⴷⴻⴳ ⵢⵉⵡⴻⵏ ⵏ ⵍⴻⵇⴷⵉⵛ ⵏ ⵢⵉⵍⵎⴻⵥⵢⴻⵏ ⴷⴻⴳ ⵍⵡⵉⵍⴰⵢⴰ ⵏ ⵛⵛⵍⴻⴼ, ⴰⵏⴷⴰ ⵉ ⴷ-ⵜⴻⵍⵍⴰ ⵢⵉⵡⴻⵜ ⵏ ⵜⴼⵓⴳⵍⴰ ⵏ ⵜⴻⵊⵎⵉⵍⵜ ⵉ ⴷ-ⵜⵀⴻⴳⴳⴰ ⵜⴷⵓⴽⴽⵍⴰ "ⵔⴰⴷⵢⵓⵣ" ⵖⴻⴼ ⵢⵉⵙⴻⵎ ⵏ ⵙⵉⵏ ⵢⵉⵜⵔⴰⵏ ⵉⵇⴱⵓⵔⴻⵏ ⵏ ⵜⴷⵓⴽⴽⵍⴰ ⵏ ⵛⵛⵍⴻⴼ, ⵡⵉⴳⵉ ⴷ ⵍⵎⴻⵔⵃⵓⵎ ⴱⵓⵀⴻⵍⵍⴰ ⵎⵓⵃⴻⵎⵎⴻⴷ ⴷ ⵎⴻⴽⵙⵉ ⵎⵓⵙⵟⴰⴼⴰ. ⵢⴻⵔⵏⴰ ⵍⵎⴻⵔⵃⵓⵎ ⵢⴻⵍⵍⴰ ⴷ ⵢⵉⵡⴻⵏ ⵙⴻⴳ ⵢⵉⵄⴻⴳⴳⴰⵍⴻⵏ ⵉⵎⴻⵇⵔⴰⵏⴻⵏ ⵏ ⵜⴷⵓⴽⴽⵍⴰ-ⴰⴳⵉ.
ⵢⴻⵜⵜاⵃⵙⴻⴱ ⵎⵓⵃⴻⵎⵎⴻⴷ ⵃⴻⵏⵚⴰⵍ ⴷ ⵢⵉⵡⴻⵏ ⵙⴻⴳ ⵢⵉⵙⵎⴰⵡⴻⵏ ⵉⵎⴻⵇⵔⴰⵏⴻⵏ ⵉ ⵉⵟⴻⴱⵄⴻⵏ ⴰⵎⴻⵣⵔⵓⵢ ⵏ ⵓⵏⴻⴼⵔⵓ ⴰⵣⵣⴰⵢⵔⵉ, ⵉⵎⵉ ⵢⴻⵎⵜⴻⵍ ⵜⵉⵚⴻⴼⴼⴰⵔⵜ ⵜⴰⵣⵣⴰⵢⵔⵉⵜ ⴷⴻⴳ ⵡⴰⵟⴰⵙ ⵏ ⵜⴻⵎⵣⵉⵣⴻⵍⵜⵉⵏ ⵜⵉⴳⵔⴰⵖⵍⴰⵏⵉⵏ, ⵢⴻⵔⵏⴰ ⵢⴻⵍⵍⴰ ⴳⴰⵔ ⵜⴰⵔⴱⴰⵄⵜ ⵏ ⵢⵉⵏⴻⴼⵔⴰⵢⴻⵏ ⴷⴻⴳ ⵜⴰⴳⴳⴰⵔⵉⵡⵉⵏ ⵏ ⵜⴻⵇⴱⵓⵛⵜ ⵏ ⴷⵓⵏⵏⵉⵜ ⴷⴻⴳ ⵟⵟⴻⵍⵢⴰⵏ ⴰⵙⴻⴳⴳⴰⵙ ⵏ 1990, ⵢⴻⴵⴵⴰ-ⴷ ⵍⴵⴻⵔⵔⴰ-ⵉⵏⴻⵙ ⵉⵛⴻⴱⵃⴻⵏ ⴷⴻⴳ ⵓⵎⴻⵛⵡⴰⵔ-ⵉⵏⴻⵙ ⵏ ⵡⴰⴷⴷⴰⵍ.
ⴰⴽⴽⴻⵏ ⴷⴰⵖⴻⵏ ⵉ ⵢⴻⵜⵜⵡⴰⵙⵙⴻⵏ ⵍⵎⴻⵔⵃⵓⵎ ⵙ ⵓⵇⴰⴷⴻⵔ-ⵉⵏⴻⵙ ⴰⵎⴻⵇⵔⴰⵏ ⵉ ⵍⵇⴰⵏⵓⵏ ⴰⴽⴽⴻⴷ ⵜⵉⴽⵍⵉ-ⵉⵏⴻⵙ ⵢⴻⵍⵀⴰⵏ ⴷⴰⵅⴻⵍ ⴷ ⴱⴻⵕⵕⴰ ⵏ ⵡⴰⵏⵏⴰⵔ ⵏ ⵡⴰⴷⴷⴰⵍ. ⵎⴱⴻⵄⴷ ⵎⵉ ⵢⴻⵃⴱⴻⵙ ⴰⵏⴻⴼⵔⵓ, ⴷⴻⴳ ⵢⵉⵙⴻⴳⴳⴰⵙⴻⵏ ⵏ 1990, ⵉⴽⴻⵎⵎⴻⵍ ⵍⴻⵇⴷⵉⵛ-ⵉⵙ ⵖⴻⴼ ⵡⴰⴷⴷⴰⵍ ⵙ ⵓⵡⴻⵍⵍⴻⵀ ⵏ ⵢⵉⵍⵎⴻⵥⵢⴻⵏ ⴷ ⵓⵙⵄⴻⴷⴷⵉ ⵏ ⵜⵉⵔⵎⵉⵜ-ⵉⵏⴻⵙ ⵉ ⵜⵙⵓⵜⵡⵉⵏ ⵉ ⴷ-ⵉⵜⵜⴰⵍⵉⵏ.
ⴰⵔⵏⵓ ⵖⴻⵔ
