ⴰⵏⴻⵖⵍⴰⴼ ⵏ ⴷⴰⵅⴻⵍ, ⵜⵓⴷⴷⴰⵔ ⴷ ⵓⵙⵙⴰⴼ, ⵙⴰⵄⵉⴷ ⵙⴰⵄⵢⵓⴷ, ⵢⴻⵙⵍⴻⵡⵉ ⴰⵙⵙ-ⴰ ⵏ ⴰⵔⵉⵎ ⴷⴻⴳ ⵜⵓⴱⵉⵔⴻⵜ, ⵜⵉⵎⵉⵍⵍⵉⵜ ⵜⴰⵖⴻⵍⵏⴰⵡⵜ ⵏ ⵜⴰⵒⴻⴷⴷⴰⴷⵜ ⵜⴰⵖⴻⵍⵏⴰⵡⵜ ⵉ ⵢⴻⵜⵜⴰⴽⵏ ⴰⵎⴻⴷⵢⴰ ⵏ ⵓⵣⴻⵏⵣⴻⵍ ⵢⴻⵡⵡⴹⴻⵏ ⴰⵔ 6.7 ⵏ ⵜⴼⴰⴷⵉⵜ ⵏ ⵔⵉⵛⵜⴻⵔ, ⵙ ⵜⴻⴽⴽⵉ ⵏ 44 ⵏ ⵜⵔⵓⴱⴱⴰ ⵏ ⵜⴰⵍⵍⴰⵍⵜ.
ⴰⵏⴻⵖⵍⴰⴼ ⵢⴻⵔⵣⴰ ⵖⴻⵔ ⵡⴰⵎⵎⴰⵙ ⵏ ⵓⵅⴻⴷⴷⵉⵎ ⴷⴻⴳ ⵜⴻⵎⵏⴰⴹⵜ ⵏ "ⵡⴰⴷⵉ ⵍⴱⴻⵔⴷⵉ", ⴰⵏⴷⴰ ⵢⴻⵡⵡⴰⵍⵉ, ⵢⵉⴷ-ⴻⵙ ⵓⵎⴻⵇⵇⵔⴰⵏ ⵏ ⵜⴰⵒⴻⴷⴷⴰⴷⵜ ⵜⴰⵖⴻⵍⵏⴰⵡⵜ, ⵍⵄⴻⵇⵉⴷ ⴱⵓⵄⵍⴰⵎ ⴱⵓⵖⵍⴰⴼ, ⴰⴽⴽ ⵢⴻⵅⵅⴰⵎⴻⵏ ⴷ ⵡⴰⵎⵎⴰⵙ ⵏ ⵓⵙⴻⴼⵔⴻⴽ ⵎⴻⵇⵇⵔⴻⵏ ⵉ ⵢⴻⵙⴱⴻⴷⴷⴻⵏ ⵜⴰⴳⴰⴷⵉⵔⵜ-ⴰⴳⵉ.
ⵎⴰⵙⵙ ⵙⴰⵄⵢⵓⴷ ⵢⴻⵡⵡⴰⵍⵉ ⴰⴽⴽ ⵢⵉⴳⵉⵔⴻⵏ ⵏ ⵓⵅⴻⴷⴷⵉⵎ ⴷⴻⴳ ⵜⵎⵉⵍⵍⵉⵜ-ⴰⴳⵉ ⴰⵏⴻⴳⴳⴰⵔⵓ, ⴰⵏⴷⴰ ⵍⵍⴰⵏ ⵓⴳⴰⵔ ⵏ 6000 ⵏ ⵢⵉⵄⴻⴳⴳⴰⵍⴻⵏ ⵏ ⵜⴰⵒⴻⴷⴷⴰⴷⵜ ⵙⴻⴳ ⵢⴰⵍ ⴰⵙⵡⵉⵔ, ⵢⴻⵔⵏⴰ ⵢⴻⵡⵡⴰⵍⵉ ⵜⵉⵔⵓⴱⴱⴰ ⵉ ⴷ-ⵢⵓⵙⴰⵏ ⵙⴻⴳ 43 ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ.
ⴷⴻⴳ ⵡⴻⵎⴽⴰⵏ-ⵏⵏⵉ, ⴰⵏⴻⵖⵍⴰⴼ ⵢⴻⵙⵍⴰ ⵖⴻⵔ ⵓⵙⴻⴼⵔⴻⵢ ⵖⴻⴼ ⵜⵎⵉⵍⵍⵉⵜ-ⴰⴳⵉ. ⵢⴻⵛⴻⴽⴽⴻⴷ ⴰⵅⴻⴷⴷⵉⵎ ⵢⴻⵍⵡⴰⵢⴻⵏ ⴷ ⵓⵀⴻⵢⵢⵉ ⵏ ⵜⵔⵓⴱⴱⴰ ⵏ ⵜⴰⵒⴻⴷⴷⴰⴷⵜ ⵜⴰⵖⴻⵍⵏⴰⵡⵜ ⴷⴻⴳ ⵍⵇⴰⵄⴰ, ⵉ ⴷ-ⵢⴻⵙⴱⴻⵢⵢⵏⴻⵏ ⵜⴰⵎⵓⵙⵙⵏⵉ ⵎⴻⵇⵇⵔⴻⵏ ⴷⴻⴳ ⵓⵙⴻⵍⵍⴻⴽ ⴷ ⵓⵃⵔⴰⵣ ⵏ ⵢⵉⵎⴷⴰⵏⴻⵏ.
ⵢⴻⵛⴻⴽⴽⴻⴷ ⴷⴰⵖⴻⵏ ⵜⴻⴽⴽⵉ ⵏ ⵜⵔⵓⴱⴱⴰ ⵏ ⵜⴰⵒⴻⴷⴷⴰⴷⵜ ⵏ ⵜⵡⵉⵍⴰⵢⵉⵏ ⵏ ⵡⴻⵏⵥⵓⵍ (ⵍⵊⴰⵏⵓⴱ) ⴷⴻⴳ ⵜⵎⵉⵍⵍⵉⵜ-ⴰⴳⵉ, ⴰⵢⴻⵏ ⴰⵔⴰ ⵜⴻⵏ-ⵢⴻⵊⵊⴻⵏ ⴰⴷ ⵙⵙⴻⵊⵀⴻⴷⴻⵏ ⵜⴰⵎⵓⵙⵙⵏⵉ-ⵏⵙⴻⵏ ⴷ ⵍⵎⴻⵊⵀⵓⴷⴰⵜ-ⵏⵙⴻⵏ ⴷⴻⴳ ⵍⵡⴻⵇⵜ ⵏ ⵢⵉⵏⵉⴳⵉⵎⴻⵏ ⴷ ⵜⵡⴰⵖⵉⵜⵉⵏ.
ⵙⵢⵉⵏ ⴰⴼⴻⵍⵍ, ⴰⵏⴻⵖⵍⴰⴼ ⵢⴻⵔⵣⴰ ⵖⴻⵔ ⵜⴻⵎⴷⵉⵏⵜ ⵏ ⵙⵓⵔ ⵍⵖⵓⵣⵍⴰⵏ (ⴰⵏⵥⵓⵍ ⵏ ⵜⵓⴱⵉⵔⴻⵜ), ⴰⵏⴷⴰ ⵢⴻⵡⵡⴰⵍⵉ ⵢⵉⵡⴻⵏ ⵡⴻⵎⴽⴰⵏ ⵉ ⵢⴻⵅⵔⴻⴱⵏ ⵙ ⵓⵣⴻⵏⵣⴻⵍ-ⵏⵏⵉ ⵏ ⵓⵙⵓⴳⴻⵏ (virtuel), ⴰⴽⴽⴻⵏ ⵢⴻⵍⵍⴰ ⴷⴻⴳ ⵡⴰⵀⵉⵍ ⵉ ⵢⴻⴱⴷⴰⵏ ⵙⴻⴳ ⵡⴰⵙⵙ ⵏ ⵍⵊⴻⵎⵄⴰ ⵢⴻⵣ ⵢⴻⵔⵏⴰ ⴰⴷ ⵢⴻⴽⴽⴻⵎⵎⴻⵍ ⴰⵔ 12 ⴼⵓⵔⴰⵔ.
ⴷⴻⴳ ⵙⵓⵔ ⵍⵖⵓⵣⵍⴰⵏ, ⵎⴰⵙⵙ ⵙⴰⵄⵢⵓⴷ ⵢⴻⵏⵏⴰ-ⴷ ⴱⴻⵍⵍⵉ ⵢⴻⴼⵔⴻⵃ ⴰⵟⴰⵙ ⵙ ⵡⴰⵎⴻⴽ ⵜⴻⴷⴷⵓ ⵜⵎⵉⵍⵍⵉⵜ-ⴰⴳⵉ ⴰⵏⴷⴰ ⵜⵜⴻⴽⴽⵉⵏⵜ 44 ⵏ ⵜⵔⵓⴱⴱⴰ ⵏ ⵜⴰⵍⵍⴰⵍⵜ.
ⵉⵡⴰⴽⴽⴻⵏ ⴰⴷ ⵇⴰⴱⵍⴻⵏ ⵜⴰⵡⴰⵖⵉⵜ-ⴰⴳⵉ ⵏ ⵓⴳⴰⵎⴰ ⵉ ⵢⴻⵡⵡⴻⵜⵏ ⵜⵓⴱⵉⵔⴻⵜ, ⵜⵉⵔⵓⴱⴱⴰ ⵙⵙⴻⵎⵔⴻⵙⴻⵏⵜ ⴰⴽⴽ ⵢⵉⴼⴻⵛⴽⴰⵏ-ⵏⵙⴻⵏⵜ ⵉⵡⴰⴽⴽⴻⵏ ⴰⴷ ⵙⵙⴻⵍⴽⴻⵏⵜ ⵢⵉⵎⴷⴰⵏⴻⵏ ⴷⴻⴳ ⵡⴰⴷⵉ ⵍⴱⴻⵔⴷⵉ, ⵜⵓⴱⵉⵔⴻⵜ, ⵍⴰⵚⵏⴰⵎ ⴷ ⵙⵓⵔ ⵍⵖⵓⵣⵍⴰⵏ.
ⵜⵉⵔⵓⴱⴱⴰ ⵉ ⵢⴻⵏⵛⴻⵃⴻⵏ ⴷⴻⴳ ⵢⵉⵎⴽⴰⵏ-ⴰⴳⵉ ⵍⵍⴰⵏⵜ ⴷⴻⴳ-ⵙⴻⵏⵜ: ⵜⵉⵔⵓⴱⴱⴰ ⵏ ⵓⵙⴻⴼⵔⴻⴽ, ⴰⵙⴻⵍⵍⴻⴽ ⴷⴻⴳ ⵢⵉⴷⴻⴳⴳⵉⵡⴻⵏ, ⴰⵙⴻⵍⵍⴻⴽ ⴷⴻⴳ ⵡⵓⵎⴰⵏ, ⵓⵏⴰⴷⵉ ⴷⴻⴳ ⵢⵉⵎⴽⴰⵏ ⵉⵇⴻⴱⵍⴻⵏ, ⵜⵉⵔⵓⴱⴱⴰ ⵏ ⵢⵉⵢⴷⴰ, ⴷ ⵡⵉⴷ ⵉⴽⴻⵍⴼⴻⵏ ⵙ ⵢⵉⴳⵓⵎⵎⴰ ⵏ ⵏⵓⴽⵍⵉⵢⴻⵔ, ⴽⵉⵎⵢⴰ ⴷ ⵡⵉⵏ ⵏ ⴱⵢⵓⵍⵓⵊⵢⴰ.
ⴷⴻⴳ ⵍⴰⵚⵏⴰⵎ ⴷ ⵙⵓⵔ ⵍⵖⵓⵣⵍⴰⵏ, ⵢⵉⵄⴻⴳⴳⴰⵍⴻⵏ ⵏ ⵜⴰⵒⴻⴷⴷⴰⴷⵜ ⵙⵙⴻⵎⵔⴻⵙⴻⵏ ⵢⵉⴼⴻⵛⴽⴰⵏ ⵉⵊⴻⵀⴷⴻⵏ ⵉⵡⴰⴽⴽⴻⵏ ⴰⴷ ⴽⴽⴻⵙⴻⵏ ⴰⵢⴻⵏ ⵢⴻⵀⴷⴻⵏ ⵢⴻⵔⵏⴰ ⴰⴷ ⴼⴽⴻⵏ ⵜⴰⵍⵍⴰⵍⵜ ⵉ ⵡⵉⴷ ⵜⵜⵡⴰⵊⴻⵔⵃⴻⵏ ⵙ ⵓⵣⴻⵏⵣⴻⵍ-ⴰⴳⵉ ⵉ ⵢⴻⵡⵡⴻⵜⵏ ⴰⵏⵥⵓⵍ-ⴰⴳⵎⵓⴹⴰⵏ ⵏ ⵜⵡⵉⵍⴰⵢⵜ ⵏ ⵜⵓⴱⵉⵔⴻⵜ.
ⴰⵔⵏⵓ ⵖⴻⵔ
