ⵙⴼⴻⵙⵙⵔⴻⵏ-ⴷ, ⴰⵙⵙ-ⴰ ⵏ ⴰⵔⵉⵎ ⴷⴻⴳ ⵜⵣⴻⵇⵇⴰ ⵜⴰⴽⵔⵓⵔⴰⵏⵜ (La Salle Ovoïde) ⵏ ⵓⴱⴰⵔⴰⵣ ⵓⵍⵓⵎⴱⵉ "ⵎⵓⵃⴰⵎⴻⴷ ⴱⵓⴹⵢⴰⴼ" ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵜⴰⵇⴻⴱⴱⵓⵛⵜ ⵏ ⴷⴷⵓⵏⵉⵜ ⵏ ⴷⴷⴰⴱⴻ ⵏ ⵓⴹⴰⵔ ⵉ ⵢⵉⴼⴻⵔⵔⵊⴻⵏ. ⴰⵢⴰⴳⵉ ⵢⴻⵍⵍⴰ-ⴷ ⴷⴻⴳ ⵓⴱⵔⵉⴷ ⵏ ⵓⵃⴻⵡⵡⴻⵙ ⵉ ⴷ-ⵜⴻⴳ ⵜⵓⴷⴷⵙⵓⵜ ⵜⴰⵎⴰⴹⵍⴰⵏⵜ ⵏ ⴷⴷⴰⴱⴻ ⵏ ⵓⴹⴰⵔ (FIFA) ⵉⵡⴰⴽⴽⴻⵏ ⴰⴷ ⵙⵙⵉⴹⴳⴻⵏ ⴰⵣⴰⵎⵓⵍ-ⴰⴳⵉ ⴰⵎⴻⵇⵇⵔⴰⵏ ⵖⴻⵔ ⵢⵉⵎⴷⴰⵏⴻⵏ.
ⵜⴰⵎⵉⵍⵍⵉⵜ-ⴰⴳⵉ ⵜⴻⵙⵄⴰ ⴰⵟⴰⵙ ⵏ ⵢⵉⵎⴷⴰⵏⴻⵏ, ⵍⴰⴷⵖⴰ ⵢⵉⵍⴻⵎⵣⵢⴻⵏ ⴷ ⵜⵡⴰⵛⵓⵍⵉⵏ ⵉ ⴷ-ⵢⵓⵙⴰⵏ ⵙⴻⴳ ⵚⴱⴻⵃ ⵉⵡⴰⴽⴽⴻⵏ ⴰⴷ ⵡⴰⵍⵉⵏ ⵜⴰⵇⴻⴱⴱⵓⵛⵜ ⵏ ⵚⵚⴻⵃ ⵢⴻⵔⵏⴰ ⴰⴷ ⴷ-ⵟⵟⴼⴻⵏ ⵜⵉⵡⵍⴰⴼⵉⵏ ⵏ ⴷⴷⵉⴽⵔⴰ. ⴰⵢⴰ ⴷ ⵜⵉⴽⴽⴻⵍⵜ ⵜⵉⵙ ⵙⴹⵉⵙ (6) ⴷⴻⴳ ⵓⴱⵔⵉⴷ-ⴰⴳⵉ ⵏ ⴷⴷⵓⵏⵉⵜ ⵉ ⴷ-ⵜⴻⴳ "ⴽⵓⴽⴰ ⴽⵓⵍⴰ", ⵍⵍⵉ ⵢⴻⵍⵍⴰⵏ ⴷ ⴷⴷⵓⴼⴼⴰ ⵏ FIFA ⵙⴻⴳ ⵓⴳⴰⵔ ⵏ 50 ⵏ ⵢⵉⵙⴻⴳⴳⴰⵙⴻⵏ.
ⴷⴻⴳ ⵜⴳⵏⵉⵜ-ⴰⴳⵉ, ⴰⵎⴻⵇⵇⵔⴰⵏ ⵏ ⵜⴽⴻⴱⴱⴰⵏⵜ ⵏ ⴽⵓⴽⴰ ⴽⵓⵍⴰ ⴷⴻⴳ ⵓⴳⴰⴼⴰ ⵏ ⵜⴻⴼⵔⵉⵇⵜ, ⵎⵓⵄⵜⴰⵣ ⵄⴻⴱⴷⴻⵍⵔⴰⵃⵎⴰⵏ, ⵢⴻⴼⴽⴰ ⵙⵏⵉⵎⵎⵉⵔ ⵉ ⵜⴰⵍⵍⴰⵍⵜ ⵏ ⵍⵃⵓⴽⵓⵎⴰ ⵏ ⵍⴻⵣⵣⴰⵢⴻⵔ ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ, ⵉⵡⴰⴽⴽⴻⵏ ⴰⴷ ⵜ-ⵉⴷ-ⵢⴻⴼⴼⵓⵖ (succès) ⵡⴰⵀⵉⵍ-ⴰⴳⵉ.
ⵢⴻⵏⵏⴰ-ⴷ ⴷⴻⴳ ⵢⵉⵡⴻⵏ ⵏ ⵓⴷⵉⵡⴻⵏⵏⵉ: "ⵙⵏⵉⵎⵎⵉⵔⴻⵖ ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ, ⵉ ⴷ-ⵢⴻⴼⴽⴰⵏ ⴰⴽⴽ ⴰⵢⴻⵏ ⵉ ⵢⴻⵙⵙⴻⴼⴽⴽⴻⵏ ⵉⵡⴰⴽⴽⴻⵏ ⴰⴷ ⴷ-ⵢⴰⵙ ⵓⴱ ⴷ-ⴰⴳⵉ ⵖⴻⵔ ⵍⴻⵣⵣⴰⵢⴻⵔ. ⴷ ⵜⵉⴽⴽⴻⵍⵜ ⵜⴰⵎⴻⵏⵣⵓⵜ ⵉ ⴷ-ⵜⴻⵇⵇⵉⵎ ⵜⵇⴻⴱⴱⵓⵛⵜ-ⴰⴳⵉ ⵙⵏⴰⵜ ⵏ ⵡⵓⵙⵙⴰⵏ ⴷⴻⴳ ⵢⵉⵡⴻⵜ ⵏ ⵜⵎⵓⵔⵜ, ⴰⵢⴰ ⵢⴻⵙⵙⴻⴱⵢⴰⵏ-ⴷ ⴱⴻⵍⵍⵉ ⵍⴻⵣⵣⴰⵢⴻⵔ ⵜⴻⵣⵎⴻⵔ ⴰⴷ ⵜⴻⴳ ⴰⵢⴻⵏ ⵎⴻⵇⵇⵔⴻⵏ."
ⵜⵉⴽⴽⴻⵍⵜ-ⴰⴳⵉ ⵜⴻⴼⴽⴰ ⵜⴰⴳⵏⵉⵜ ⵉ ⵍⵓⵍⵓⴼ ⵏ ⵢⵉⵎⴼⴻⵔⵔⵊⴻⵏ ⵉⵡⴰⴽⴽⴻⵏ ⴰⴷ ⵡⴰⵍⵉⵏ ⵜⴰⵇⴻⴱⴱⵓⵛⵜ ⵏ ⵚⵚⴻⵃ ⵓⵇⴱⴻⵍ ⴰⴷ ⴷ-ⵢⴻⴱⴷⵓ "ⵎⵓⵏⴷⵉⴰⵍ" ⵏ 2026 ⴷⴻⴳ ⵎⴰⵔⵉⴽⴰⵏ, ⴽⴰⵏⴰⴷⴰ ⴷ ⵎⵉⴽⵙⵉⴽ (ⵙⴻⴳ 11 ⵢⵓⵏⵢⵓ ⴰⵔ 19 ⵢⵓⵍⵢⵓ).
ⵖⴻⵔ ⵜⵓⴽⴽⴻⵔⴷⴰ ⵏ ⵜⴻⵡⵍⴰⴼⵉⵏ, ⵍⵍⴰⵏ ⴷⴰⵖⴻⵏ ⵢⵉⵙⴻⴳⵎⵓⵢⴻⵏ ⵏ ⵓⵃⴻⵡⵡⴻⵙ ⴷ ⵡⵓⵔⴰⵔⴻⵏ ⵏ ⴷⴷⴰⴱⴻ ⵏ ⵓⴹⴰⵔ, ⴰⵢⴻⵏ ⵉ ⵢⴻⵔⵔⴰⵏ ⵜⴰⴳⵏⵉⵜ ⴷ ⵜⴰⵎⴻⵖⵔⴰ.
ⴰⴱⵔⵉⴷ-ⴰⴳⵉ ⵏ ⵜⵇⴻⴱⴱⵓⵛⵜ ⵢⴻⴱⴷⴰ ⴷⴻⴳ 3 ⵢⴻⵏⵏⴰⵢⴻⵔ ⵙⴻⴳ ⵔⵢⴰⴷ (ⵙⴰⵄⵓⴷⵉⵢⴰ), ⴰⴷ ⵔⵣⵓⵏ ⵖⴻⵔ 30 ⵏ ⵜⵎⵓⵔⴰ ⴷ 75 ⵏ ⵢⵉⵎⴽⴰⵏ ⴷⴷⴰⵡ 150 ⵏ ⵡⵓⵙⵙⴰⵏ. ⴰⴷ ⵔⵣⵓⵏ ⴷⴰⵖⴻⵏ ⵖⴻⵔ ⵜⵎⵓⵔⴰ ⴰⵔⴰ ⴷ-ⵢⴻⴳⴳⴻⵏ ⵎⵓⵏⴷⵉⴰⵍ ⵏ 2026, 2030 ⴷ 2034, ⴷ ⵎⵓⵏⴷⵉⴰⵍ ⵏ ⵜⵍⴰⵡⵉⵏ ⵏ 2027.
ⴷ ⵜⵉⴽⴽⴻⵍⵜ ⵜⵉⵙ ⴽⵔⴰⴹ (3) ⵉ ⴷ-ⵜⴻⵔⵣⵓ ⵜⵇⴻⴱⴱⵓⵛⵜ ⵏ ⴷⴷⵓⵏⵉⵜ ⵖⴻⵔ ⵍⴻⵣⵣⴰⵢⴻⵔ, ⴷⴻⴼⴼⵉⵔ ⵜⵉⴽⴽⴻⵍ ⵏ 2010 (ⵜⴰⴼⵔⵉⵇⵜ ⵏ ⵓⵏⵥⵓⵍ) ⴷ 2014 (ⴱⵔⵉⵣⵉⵍ).
ⴰⵔⵏⵓ ⵖⴻⵔ
