ⴰⴳⵔⴰⵡ ⵏ ⵍⴰⵎⴰⵏ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ (ONU) ⴰⴷ ⵢⴻⴳ, ⴰⵙⵙ-ⴰ ⵏ ⴰⵔⵉⵎ, ⵜⵉⵎⵍⵉⵍⵉⵜ ⵏ ⵓⴷⵉⵡⵏⵉ ⵜⵓⴼⴼⵉⵔⵜ ⵖⴻⴼ ⵍⵉⵃⴰⵍⴰ ⵏ ⵙⵓⴷⴰⵏ, ⴷⴻⴼⴼⵉⵔ ⵡⴰⵍⵖⵓ ⴰⵏⴻⴳⴳⴰⵔⵓ ⵏ ⵓⵙⴻⵏⵢⵉⴼ ⴰⵎⴻⵣⵡⴰⵔⵓ ⵉ ⴷ-ⵢⴻⵏⵏⴰⵏ ⴱⴻⵍⵍⵉ ⵍⵉⵃⴰⵍⴰ ⵏ ⵢⵉⵎⴷⴰⵏⴻⵏ ⵜⴻⵅⵔⴻⴱ ⴰⵟⴰⵙ ⴷⴻⴳ ⵜⵎⵓⵔⵜ-ⵏⵏⵉ.
ⴷⴻⴳ ⵜⵎⴻⵍⵍⵉⵜ-ⴰⴳⵉ, ⵉⴷⴻⵎ ⵡⵓⵙⵓⵔⵏⵓ ⵙⴻⴳ ⵓⴼⵉⵙ ⵏ ⵓⵎⵢⴰⵡⴰⵙ ⵏ ⵜⵓⵜⵔⵉⵡⵉⵏ ⵏ ⵢⵉⵎⴷⴰⵏⴻⵏ (OCHA), ⴷ ⵎⴰⵜⵢⵓ ⵀⵓⵍⵉⵏⴳⵡⵓⵔⵜ (Matthew Hollingworth) ⵙⴻⴳ ⵓⵙⴻⵏⴼⴰⵔ ⵏ ⵍⵇⵓⵜ ⴰⵎⴰⴹⵍⴰⵏ , ⴰⴷ ⴷ-ⴼⴽⴻⵏ ⵜⴰⵎⵓⵖⵍⵉ-ⵏⵙⴻⵏ ⵖⴻⴼ ⵡⴰⵢⴻⵏ ⵢⴻⴷⵔⴰⵏ.
ⴰⵍⵖⵓ ⵏ "IPC" ⵢⴻⵙⵙⴻⵡⵀⴻⵎ ⵖⴻⴼ ⵍⴰⵣ ⵍⵇⴰⵢⴻⵏ ⵉ ⵢⴻⵍⵍⴰⵏ ⴷⴻⴳ ⵜⴻⵎⵏⴰⴹⵉⵏ ⵏ ⴷⴰⵔⴼⵓⵔ ⴷ ⴽⵓⵔⴷⵓⴼⴰⵏ, ⵢⴻⵔⵏⴰ ⵍⵍⴰⵏ ⵢⴻⵎⴽⴰⵏ ⴷⴻⴳ ⵙⵓⴷⴰⵏ ⵍⵍⵉ ⵢⴻⵏⵛⴻⵃⴻⵏ ⵙ ⵍⴰⵣ ⵢⴻⵔⵔⴰⵏ ⴰⵎ ⵟⵟⵔⴰⴷ, ⵍⴰⴷⵖⴰ ⴷⴻⴳ ⵍⴼⴰⵛⴻⵔ ⴷ ⴽⴰⴷⵓⴳⵍⵉ.
ⵡⴰⵍⵖⵓ-ⴰⴳⵉ ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵙⵏⴰⵜ ⵏ ⵜⴻⵎⵏⴰⴹⵉⵏ ⵏⵏⵉⴹⴻⵏ ⴷⴻⴳ ⵓⴳⴰⴼⴰ ⵏ ⴷⴰⵔⴼⵓⵔ, "ⵓⵎ ⴱⴰⵔⵓ" ⴷ "ⴽⵉⵔⵏⵓⵢ", ⴽⵛⴻⵎⵏⴻⵏⵜ ⴷⴻⴳ ⵜⴳⵏⵉⵜ ⵏ ⵍⴰⵣ ⵉ ⴷ-ⵢⴻⵜⵜⴰⵡⵉⵏ ⵍⵎⵓⵜ, ⴰⵢⴰ ⵢⴻⵙⵙⴻⴳⴳⴻⴷ ⴱⴻⵍⵍⵉ ⵜⵉⵎⵏⴰⴹⵉⵏ ⵉ ⴷ-ⵢⴻⵣⵣⵉⵏ ⴰⴷ ⵢⴻⴷⵔⵓ ⵢⵉⴷ-ⵙⴻⵏⵜ ⴰⵎ ⵡⴰⴽⴽⴰ.
ⵢⴻⵔⵏⴰ ⴰⵍⵖⵓ-ⵏⵏⵉ ⵢⴻⴱⴷⴻⵔ-ⴷ ⴱⴻⵍⵍⵉ ⵜⵉⵖⵔⵉⴼⵉⵏ ⵏ "ⴷⴷⴰⵄⵎ ⵙⵙⴰⵔⵉⵄ" ⵥⴻⴷⵎⴻⵏⵜ ⵖⴻⵔ ⵜⴻⵎⵏⴰⴹⵉⵏ ⵏ ⵓⵎ ⴱⴰⵔⵓ ⴷ ⴽⵉⵔⵏⵓⵢ, ⴷ ⴰⵢⴻⵏ ⵉ ⵢⴻⵊⵊⴰⵏ ⵍⵓⵍⵓⴼ ⵏ ⵢⵉⵎⴷⴰⵏⴻⵏ ⴰⴷ ⵔⴻⵡⵍⴻⵏ ⵖⴻⵔ ⵍⴻⵅⵍⴰⵡⵉ ⵏⴻⵖ ⵖⴻⵔ ⵜⵉⵍⵉⵙⵜ ⵏ ⵜⵛⴰⴷ.
ⴷⴻⴳ ⵓⵢⴰ, ⵡⵉⴷ ⴰⵔⴰ ⴷ-ⵢⴻⵎⵎⴻⵙⵍⴰⵢⴻⵏ ⴰⴷ ⵙⵙⵓⵜⵔⴻⵏ ⵉ ⴷⵓⵏⵏⵉⵜ ⴰⴷ ⴼⴽⴻⵏ ⵜⴰⵍⵍⴰⵜ ⵏ ⵢⴻⴷⵔⵉⵎⴻⵏ ⵉ ⵢⴻⴱⵖⴰⵏ ⴰⴷ ⵇⴰⴱⵍⴻⵏ ⴰⵢⴰ, ⵉⵎⵉ ⵜⴰⴷⵔⵉⵎⵜ ⵏ ⵓⵙⴻⵏⴼⴰⵔ ⵏ ⵙⵓⴷⴰⵏ ⵉ ⵓⵙⴻⴳⴳⴰⵙ 2026 ⵓⵔ ⵜⴻⵡⵡⵉⴹ ⴰⵔⴰ 5.8 % ⵙⴻⴳ 2.9 ⵏ ⵍⵎⴻⵔⵢⴰⵔ ⵏ ⴷⴷⵓⵍⴰⵔ ⵉ ⵢⴻⵙⵙⴻⴼⴽⴻⵏ.
ⴰⴳⵔⴰⵡ ⵏ ⵍⴰⵎⴰⵏ ⴰⴷ ⴷ-ⵢⴻⵙⵙⵓⵜⴻⵔ ⴷⴰⵖⴻⵏ ⴰⵃⴱⴰⵙ ⵏ ⵔⵚⴰⵚ ⵢⴻⵔⵏⴰ ⴰⴷ ⴷ-ⵢⴻⵙⵎⴻⴽⵜⴰⵢ ⵙ ⵓⴹⴻⴼⴼⴻⵔ ⵏ ⵍⵇⴰⵏⵓⵏ 2417 ⵉ ⵢⴻⵜⵜⴰⴽⴽⴻⵏ ⵍⵓⵎ ⵖⴻⴼ ⵡⵉⴷ ⵢⴻⵙⵙⴻⵎⵔⴰⵙⴻⵏ ⵍⴰⵣ ⴷ ⴰⵎⵔⵉⴳⴰⵏ ⵏ ⵟⵟⵔⴰⴷ ⵎⴳⴰⵍ ⵢⵉⵎⴷⴰⵏⴻⵏ.
ⵙⴻⴳ ⵡⴻⴱⵔⵉⵍ 2023, ⵙⵓⴷⴰⵏ ⵢⴻⵜⵜⵉⴷⵉⵔ ⵟⵟⵔⴰⴷ ⴳⴰⵔ ⵍⵄⴻⵙⴽⴻⵔ ⴷ ⵜⵖⵔⵉⴼⵉⵏ ⵏ "ⴷⴷⴰⵄⵎ ⵙⵙⴰⵔⵉⵄ", ⴰⵢⴻⵏ ⵉ ⵢⴻⵏⵖⴰⵏ ⵍⵓⵍⵓⴼ ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⵢⴻⵊⵊⴰ ⵎⵍⴰⵢⴻⵏ ⵏⵏⵉⴹⴻⵏ ⴰⴷ ⵔⴻⵡⵍⴻⵏ ⵙⴻⴳ ⵢⴻⵅⵅⴰⵎⴻⵏ-ⵏⵙⴻⵏ.
ⴰⵔⵏⵓ ⵖⴻⵔ
