ⵜⴰⵔⴱⴰⵄⵜ ⵜⴰⵖⴻⵍⵏⴰⵡⵜ ⵜⴰⵣⵣⴰⵢⵔⵉⵜ ⵏ ⵜⴽⵓⵔⵜ ⵏ ⵓⴹⴰⵔ ⴰⴷ ⵜⵓⵔⴰⵔ ⵜⵉⵡⵏⵉⵔⵉⵏ ⵏ ⵓⵙⵉⵙⵀⴻⵍ ⵏ ⵡⴰⴽⴽⴰⵢⴰⴷ ⵏ ⵜⴻⴳⵔⴰⵡⵜ ⵏ ⵜⴻⴼⵔⵉⵇⵜ ⵏ ⵜⴻⴳⴷⵓⴷⵉⵏ (ⵛⴰⵏ) 2027 ⴰⵔⴰ ⴷ-ⵢⵉⵍⵉⵏ ⴷⴻⴳ ⴽⵉⵏⵢⴰ, ⵜⴰⵏⵣⴰⵏⵢⴰ ⴷ ⵓⴳⴰⵏⴷⴰ. ⵍⴻⵣⵣⴰⵢⴻⵔ ⵜⵓⵙⴰ-ⴷ ⴷⴻⴳ ⵜⴻⴳⵔⵓⵎⵎⴰ ⵜⵉⵙ ⵜⵥⴰⵜ (9), ⴰⴽⴽⴻⵏ ⵉ ⴷ-ⵜⴻⴼⴼⴻⵖ ⵜⵙⵖⴰⵔⵜ (tirage au sort) ⵉ ⴷ-ⵢⵉⵍⵍⴰⵏ ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵓⴱⵉⵕⵓ ⵏ ⵜⴷⵓⴽⵍⴰ ⵜⴰⵎⴰⵚⵔⵉⵜ ⵏ ⵜⴽⵓⵔⵜ ⵏ ⵓⴹⴰⵔ ⴷⴻⴳ ⵍⵇⴰⵀⵉⵔⴰ.
ⵙ ⵜⴰⵎⴰ ⵏ ⵜⴻⵔⴱⴰⵄⵜ ⵜⴰⵖⴻⵍⵏⴰⵡⵜ ⵜⴰⵣⵣⴰⵢⵔⵉⵜ, ⵜⴰⴳⵔⵓⵎⵎⴰ ⵜⵉⵙ ⵜⵥⴰⵜ ⴷⴻⴳ-ⵙ ⵜⵉⵔⴱⴰⵄⵉⵏ ⵏ ⵣⴰⵎⴱⵢⴰ, ⵜⵓⴳⵓ ⴷ ⴱⵓⵔⵓⵏⴷⵉ.
ⵜⵜⵓⵙⴻⵎⵔⴰⵙⴻⵏⵜ 48 ⵏ ⵜⴻⵔⴱⴰⵄⵉⵏ ⵉ ⴷ-ⵢⴻⵜⵜⴻⴽⴽⵉⵢⴻⵏ ⴷⴻⴳ ⵢⵉⵙⵉⵙⵀⴻⵍⴻⵏ ⵖⴻⴼ 12 ⵏ ⵜⴻⴳⵔⵓⵎⵎⴰⵡⵉⵏ; ⵢⴰⵍ ⵢⵉⵡⴻⵜ ⴷⴻⴳ-ⵙ ⴽⵓⵣ (4) ⵏ ⵜⴻⵔⴱⴰⵄⵉⵏ. ⵙⵉⵏ ⵉⵎⴻⵣⵡⵓⵔⴰ ⵏ ⵢⴰⵍ ⵜⴰⴳⵔⵓⵎⵎⴰ ⴰⴷ ⵙⵙⵉⵙⵀⴻⵍⴻⵏ (qualify) ⵙ ⵜⴰⵔⵔⴰⵢⵜ ⵜⵓⵙⵔⵉⴷⵜ ⵖⴻⵔ ⵜⴰⴳⵔⴰⵢⵜ. ⵎⴰ ⴷ ⵜⴰⵔⵔⴰⵢⵜ ⵢⴻⵄⵏⴰⵏ ⵜⵉⵎⵓⵔⴰ ⵉ ⴷ-ⵉⵙⴻⵏⴱⴻⴳⵉⵏ (hosts), ⵢⴻⵍⵍⴰ-ⴷ ⵓⵍⵓⴳⴻⵏ ⵓⴼⵔⵉⵏ ⵉ ⵓⵟⵎⴰⵏ ⵏ ⵓⵜⴻⴽⴽⵉ ⵏ ⵢⵉⵡⴻⵜ ⵏ ⵜⴻⵔⴱⴰⵄⵜ ⵏⵏⵉⴹⴻⵏ ⴽⴰⵏ ⵙ ⵜⴰⵎⴰ-ⵏⵙⴻⵏ.
ⴰⴽⴽⴰⵢⴰⴷ-ⴰⴳⵉ ⴰⴷ ⴷ-ⵢⵉⵍⵉ ⵙ ⵜⴷⵓⴽⵍⵉ ⴳⴰⵔ ⴽⵉⵏⵢⴰ, ⵓⴳⴰⵏⴷⴰ ⴷ ⵜⴰⵏⵣⴰⵏⵢⴰ. ⴷ ⵜⵉⴽⴽⴻⵍⵜ ⵜⴰⵎⴻⵏⵣⵡⵓⵜ ⵉ ⴷⴻⴳ ⴽⵔⴰⴷⴻⵜ ⵏ ⵜⵎⵓⵔⴰ ⴰⴷ ⴷ-ⵓⵔⴰⵔⴻⵏⵜ ⵛⴰⵏ ⴷⴻⴳ ⵢⵉⵡⴻⵜ ⵏ ⵜⵉⴽⴽⴻⵍⵜ. ⴰⵢⴰⴳⵉ ⵢⴻⵎⵎⴰⵍ-ⴷ ⵜⵓⵖⴰⵍⵉⵏ ⵏ ⵜⵉⵍⵖⵓⵖⴰ ⵖⴻⵔ ⵜⴻⵎⵏⴰⵟ ⵏ ⵓⴳⵎⵓⴹ ⵏ ⵜⴻⴼⵔⵉⵇⵜ ⵙⴻⵍⴷ 51 ⵏ ⵢⵉⵙⴻⴳⴳⴰⵙⴻⵏ ⵏ ⵓⵅⵓⵚⵚⵓ.
ⵉⵙⵉⵙⵀⴻⵍⴻⵏ ⴰⴷ ⴷ-ⵉⵍⵉⵏ ⴷⴻⴳ ⴽⵔⴰⴷ ⵏ ⵢⵉⵙⵡⵉⵔⴻⵏ ⵉ ⴷⴻⴳ ⵍⵍⴰⵏⵜ ⵙⴹⵉⵙ (6) ⵏ ⵜⵙⴻⵎⵎⵓⵢⵉⵏ (jounalées). ⵙⵏⴰⵜ ⵜⵉⵎⴻⵏⵣⵡⵓⵜⵉⵏ ⴰⴷ ⵓⵔⴰⵔⴻⵏⵜ ⴳⴰⵔ 21 ⵛⵜⴻⵎⴱⴻⵔ ⴷ 6 ⵜⵓⴱⴻⵔ 2026. ⵜⵉⵙ ⴽⵔⴰⴷⴻⵜ ⴷ ⵜⵉⵙ ⴽⵓⵣⴻⵜ ⴳⴰⵔ 9 ⴷ 17 ⵓⵏⴱⵉⵔ 2026. ⵜⴰⴳⵔⴰⵢⵜ ⵏ ⵢⵉⵙⵉⵙⵀⴻⵍⴻⵏ ⴰⴷ ⴷ-ⵜⵉⵍⵉ ⴳⴰⵔ 22 ⴷ 30 ⵎⴻⵖⵔⴻⵙ 2027.
ⴰⵔⵏⵓ ⵖⴻⵔ
