ⵉⵙⵏⴻⴽⵏⴻⴷ-ⴷ ⵓⵎⴹⴻⴱⴱⴻⵔ ⴰⵎⴰⵜⵓ ⵏ ⵓⵙⴻⵏⴷⵓⵇ ⴰⵖⴻⵍⵏⴰⵡ ⵏ ⵜⵙⵓⵏⴼⵓ (CNR), ⵎⴰⵙⵙ ⴰⴱⴷⴻⵍⵀⴰⴼⵉⴷ ⴰⴷⵔⴰⵔ, ⴰⵙⵙ-ⴰ ⵏ ⵍⴻⵜⵏⵉⵢⴻⵏ, ⴱⴻⵍⵍⵉ ⴰⴷ ⵢⴻⴱⴷⵓ ⵓⴼⵔⴰⵇ ⵏ ⵜⵎⴻⵔⵏⵉⵡⵉⵏ ⴷⴻⴳ ⵜⴼⵉⵏ ⴷ ⵢⵉⵙⵓⵏⴼⵓⵜⴻⵏ ⵏ ⵢⵉⵎⴻⵜⴷⴰⵢⴻⵏ ⵉ ⵏⴼⴰⵄ ⵏ ⵓⴳⴰⵔ ⵏ 3.5 ⵏ ⵢⵉⵎⴻⵍⵢⴰⵢⴻⵏ ⵏ ⵡⵉⴷ ⵉ ⴷ-ⵢⴰⴳⵎⴻⵏ, ⵙⴻⴳ ⵉⵎⴰⵍⴰⵙ (ⴷⴷⵓⵕⵜ) ⴰⵎⴻⵏⵣⵓ ⵏ ⵡⴰⴳⴳⵓⵔ ⵏ ⵎⴰⵢⵓ ⵉ ⴷ-ⵉⵜⵜⴻⴷⴷⵓⵏ.
ⵎⴰⵙⵙ ⴰⴷⵔⴰⵔ ⵉⵙⵙⴻⴼⵀⴻⵎ-ⴷ ⴷⴻⴳ ⵜⵎⴻⵙⵍⴰⵢⵜ-ⵉⵙ ⵉ ⵜⵙⴻⵏⵏⴰⴼⵜ ⵏ ⵢⵉⵙⴰⵍⵍⴻⵏ ⴱⴻⵍⵍⵉ ⴰⵢⴰⴳⵉ ⴷ ⴰⵙⴻⵍⴽⴻⵎ ⵏ ⵜⵏⴻⵖⵜⴰⵙⵉⵏ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵉ ⵓⵙⴰⵍⵉ ⵏ ⵡⴰⵣⴰⵍ ⵏ ⵜⴼⵉⵏ ⵏ ⵢⵉⵎⴻⵜⴷⴰⵢⴻⵏ. ⵜⴰⵎⴻⵔⵏⵉⵡⵜ-ⴰⴳⵉ ⵜⴻⵡⵡⵉ-ⴷ ⵡⵉⴷ ⵎⴻⵕⵕⴰ ⵉ ⴷ-ⵢⴻⴼⴼⵖⴻⵏ ⵙ ⵜⵙⵓⵏⴼⵓ ⵓⵇⴱⴻⵍ 1 ⵎⴰⵢⵓ 2025, ⵓⵍⴰ ⴷ ⵡⵉⴷ ⵢⴻⵄⵏⴰⵏ ⵙ ⵡⴰⵙⵙ ⵏ 1 ⵎⴰⵢⵓ 2026 ⵉⵡⴰⴽⴽⴻⵏ ⴰⴷ ⴷ-ⵜⴻⵕⵚⵓ ⵜⵜⴰⴳⴷⴰ ⵜⴰⵎⴻⵜⵜⵉⵜⴰⵏⵜ .
ⵉⵙⵙⴻⴽⵏⴻⴷ ⴱⴻⵍⵍⵉ ⵙ ⴷⴷⴰⵡ ⵏ ⵓⵎⴰⴳⵔⴰⴷ 43 ⵏ ⵓⵙⴰⴷⵓⴼ 83-12 ⵢⴻⵄⵏⴰⵏ ⴰⵙⵎⴰⵢⵏⵓⵜ ⵏ ⵜⴻⵖⵔⴰⴹ, ⵡⵉⴷ ⵎⴻⵕⵕⴰ ⵢⴻⵙⵄⴰⵏ ⴰⵣⵔⴻⴼ ⵏ ⵜⵙⵓⵏⴼⵓ ⴰⴷ ⴷ-ⴰⴳⵎⴻⵏ ⵙⴻⴳ ⵜⵎⴻⵔⵏⵉⵡⵜ-ⴰⴳⵉ ⵉ ⵉⵡⴻⵣⵏⴻⵏ ⴰⵣⴰⵍ ⵏ 88 ⵏ ⵢⵉⵎⵍⵢⴰⵔⴻⵏ ⵏ ⴷⵉⵏⴰⵔ.
ⵙⴻⴳ ⵜⴰⵎⴰ ⵏⵏⵉⴹⴻⵏ, ⵓⵙⵜⴻⵏⵢⴰⵏ ⵢⵉⵡⴻⵏ ⵏ ⵓⵎⵜⴰⵡⴰ ⴳⴰⵔ ⵓⵙⴻⵏⴷⵓⵇ ⴰⵖⴻⵍⵏⴰⵡ ⵏ ⵜⵙⵓⵏⴼⵓ ⴷ ⵍⴱⴰⵏⴽⴰ ⵏ ⵓⵙⵏⴻⴼⵍⵉ ⴰⴷⵉⴳⴰⵏ (BDL), ⵉⵡⴰⴽⴽⴻⵏ ⵉⵎⴻⵜⴷⴰⵢⴻⵏ ⴰⴷ ⴷ-ⴰⴳⵎⴻⵏ ⵙⴻⴳ ⵢⵉⵔⴻⵟⵟⴰⵍⴻⵏ (loans) ⵙ ⵍⴼⴰⵢⴷⴰ ⵜⵓⴼⵔⵉⵏⵜ, ⴰⵎⴰ ⵙ ⵓⴱⵔⵉⴷ ⵏ ⵓⵔⴻⵟⵟⴰⵍ ⵏ ⵣⵉⴽ ⵏⴻⵖ ⵙ ⵓⴱⵔⵉⴷ ⵏ ⵓⵙⵔⵉⵎ ⵏ ⵢⵉⵏⵙⴻⵍⵎⴻⵏ (El-Murabaha). ⴰⵎⵜⴰⵡⴰ-ⴰⴳⵉ ⴷⴻⴳ-ⵙ ⴽⵔⴰⴷⴻⵜ ⵏ ⵜⴰⵔⵔⴰⵢⵉⵏ: ⴰⵔⴻⵟⵟⴰⵍ ⵏ ⵓⵙⴻⵎⵔⴻⵙ , ⴰⵔⴻⵟⵟⴰⵍ ⵉ ⵓⵡⵡⵉ ⵏ ⵜⴽⴰⵔⵔⵓⵚⵜ, ⴷ ⵓⵔⴻⵟⵟⴰⵍ ⵉ ⵓⵡⵡⵉ ⵏ ⵜⵏⴻⵣⴷⵓⵖⵜ.
ⵖⴻⴼ ⵡⴰⵢⴻⵏ ⵢⴻⵄⵏⴰⵏ ⴰⵙⵎⴰⵢⵏⵓⵜ ⵏ ⵡⴰⵍⵍⴰⵍⴻⵏ ⵏ ⵓⵙⴻⵏⴷⵓⵇ, ⵎⴰⵙⵙ ⴰⴷⵔⴰⵔ ⵉⵙⵎⴻⴽⵜⵉ-ⴷ ⴰⵙⴱⴻⴷⴷⵉ ⵏ ⵓⵙⵜⴻⵏⵢⵉ ⴰⵍⵉⴽⵜⵔⵓⵏⴰⵏ ⵉ ⵢⴻⴱⴷⴰⵏ ⵓⴽⴰⵢⴰⴷ-ⵉⵙ ⴷⴻⴳ ⵜⵡⵉⵍⴰⵢⵜ ⵏ ⴱⵓⵔⴶ ⴱⵓⵄⵔⵉⵔⵉⴶ, ⵉⵡⴰⴽⴽ ⴰⴷ ⵜⴻⵜⵜⵓⵙⴻⵎⵖⴻⵔ ⵜⴰⵔⵔⴰⵢⵜ-ⴰⴳⵉ ⴷⴻⴳ ⵜⵎⵓⵔⵜ ⵎⴻⵕⵕⴰ ⴷⴻⴳ ⵢⵉⴽⵔⴰⴷ-ⵓⵔ (ⵜⵔⵉⵎⴻⵙⵜⵔⴻ) ⵡⵉⵙ ⴽⵔⴰⴷ ⵏ ⵓⵙⴻⴳⴳⴰⵙ-ⴰⴳⵉ. ⴷⴰⵖⴻⵏ, ⵉⵎⴻⵜⴷⴰⵢⴻⵏ ⵣⴻⵎⵔⴻⵏ ⵜⵓⵔⴰ ⴰⴷ ⴷ-ⴼⴽⴻⵏ ⴰⵔⵔⴰⵜⴻⵏ-ⵏⵙⴻⵏ ⵙ ⵜⵜⴰⵡⵉⵍ ⵏ ⵓⵄⵇⴰⵍ ⵏ ⵡⵓⴷⴷⴻⵎ ⴷⴻⴳ ⵓⵙⵎⴻⵍ "ⵜⴰⴽⵓⵔⵎⵓⵜ-ⵉⵏⵓ" ⵢⴻⴱⵖⴰ ⴰⴷ ⵢⵓⵖⴰⵍ ⴷ ⵜⴰⵎⵓⵙⵏⵉ ⵉⵕⴻⵙⵙⴰⵏ ⵙ ⵜⴰⵔⵇⵎⵉⵜ 100% ⵎⴻⴱⵍⴰ ⵜⵉⵔⴰ ⵏ ⵍⴽⴰⵖⴻⴹ.
ⴰⵔⵏⵓ ⵖⴻⵔ
