ⵉⵙⵡⴻⴷ ⴰⴱⴰⵏⵞ ⴰⴼⵔⵉⵇⵉ ⵏ ⵜⵏⴻⴼⵍⵉⵜ ⵖⴻⴼ ⵡⴰⵣⴰⵍ ⴰⵎⴻⵙⵏⴰⵙ ⵏ ⵓⵙⴻⵏⴼⴰⵔ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⴰⵔⴰ ⵉⵞⵓⴷⴷⴻⵏ ⴳⴰⵔ ⴷⵣⴰⵢⴻⵔ ⵜⴰⵎⴰⵏⴰⵖⵜ ⴷ ⵜⴰⵎⴻⵏⵖⴻⵙⵜ, ⴰⵎ ⴰⴽⴽⴻⵏ ⵉ ⴷ-ⵢⴻⵏⵏⴰ ⴷⴰⴽⴽⴻⵏ ⴰⴷ ⵢⵉⵍⵉ ⴷ ⴰⵎⵙⵓⵍⵍⴻⵙ ⵏ ⵜⵏⴻⴼⵍⵉⵜ ⵜⴰⴷⴰⵎⵙⴰⵏⵜ ⴷⴻⴳ ⴷⵣⴰⵢⴻⵔ ⴷ ⵓⵙⴷⵓⴽⴽⴻⵍ ⴷⴻⴳ ⵓⵎⴻⵏⵥⴰⵡ ⴰⴼⵔⵉⵇⵉ. ⵓⵙⴻⵏⴼⴰⵔ-ⴰ ⴷ ⴰⴷⵔⴰⵔ ⵏ ⵜⴻⵖⵎⴻⵔⵜ ⴷⴻⴳ ⵜⵙⴻⵔⵜⵉⵜ ⵉ ⵜⴳⴰ ⴷⵣⴰⵢⴻⵔ ⵉ ⵓⵙⴻⵍⵃⵉ ⵏ ⵓⵥⴻⵟⵟⴰ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⴰⵖⴻⵍⵏⴰⵡ ⵙⴻⴳ 6000 ⵏ ⵢⵉⴽⵉⵍⵓⵎⵉⵜⵔⴻⵏ ⴰⵎⵓⵔⴰ ⵖⴻⵔ 15 000 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵢⵉⵙⵡⵉ ⵏ 2030.
ⵉⵙⴻⴼⵀⴻⵎ-ⴷ ⵓⴱⴰⵏⵞ ⴷⴻⴳ ⵓⵙⵎⴻⵍ-ⵉⵙ ⵓⵏⵚⵉⴱ ⴷⴰⴽⴽⴻⵏ ⴰⴱⵔⵉⴷ-ⴰ ⵏ ⵡⵓⵣⵣⴰⵍ ⴰⴷ ⵢⵓⵔⵔⴰⵔ ⴷⴷⵓⵕ ⴰⴳⴻⵊⴷⴰⵏ ⴷⴻⴳ ⵓⵙⵏⴻⴼⵙⵉ ⵏ ⵜⴻⴷⴰⵎⵙⴰ ⵜⴰⴷⵣⴰⵢⵔⵉⵢⵜ ⵙ ⵓⵙⴰⵙⵍⵉ ⵏ ⵓⵙⵉⵡⴻⴹ ⵏ ⵢⵉⵙⵓⴳⴰⵎ ⵏ ⵢⵉⵎⵖⵓⵣⴻⵏ, ⵢⵉⴼⴰⵔⵉⵙⵓⵏ ⵏ ⵜⵎⴻⵔⵚⴻⵍⵜ ⴷ ⵢⵉⴼⴰⵔⵉⵙⵓⵏ ⵏ ⵜⴼⴻⵍⵍⴰⵃⵜ ⵖⴻⵔ ⵢⵉⵙⴰⵃⴰⴳⴻⵏ ⴷ ⵢⵉⴳⴰⴷⴰⵣⴻⵏ, ⴰⵢⴰ ⴰⴷ ⵢⴻⵙⵏⴻⵔⵏⵉ ⵜⴰⵣⵔⴻⵔⵜ ⵏ ⵜⴻⵎⴳⵓⵔⵉⵢⵉⵏ ⴷ ⵓⵙⵏⴻⵔⵏⵉ ⵏ ⵢⵉⵙⵓⴳⴰⵎ ⵉ ⵖⵓⵔ ⵙⴻⵏⵜ ⵜⵡⵉⵍⴰⵢⵉⵏ ⵏ ⵡⵓⵍⵥⵓⵍ.
ⴰⵙⴻⵀⵔⴻⵙ ⵏ ⵜⴻⵎⵏⴰⴹⵉⵏ ⵉ ⵖⴻⴼ ⴰⵔⴰ ⵉⵄⴻⴷⴷⵉ ⵓⴱⵔⵉⴷ-ⴰ ⴷ ⴰⴽⴰⵢⴰⴷ ⴰⵏⵉⴹⴰⵏ; ⴰⵏⴷⴰ ⴰⴷ ⵢⴰⵍⵍⴻⴼ ⵓⵙⵏⴻⵔⵏⵉ ⵏ ⵢⵉⵔⵎⵓⴷⴻⵏ ⵏ ⵜⴼⴻⵍⵍⴰⵃⵜ, ⵢⵉⵎⵖⵓⵣⴻⵏ, ⵜⵎⴻⵔⵚⴻⵍⵜ ⴷ ⵜⵍⵓⴳⵉⵙⵜⵉⴽⵜ ⴷⴻⴳ ⵓⵙⴱⴻⴷⴷⵉ ⵏ ⵜⴻⴼⵎⵉⵢⵉⵏ, ⴰⵙⴼⴰⵍ ⵏ ⵢⵉⵎⵓⴽⴰⵏ ⵏ ⵓⵎⴰⵀⵉⵍ ⵉ ⵢⵉⵍⴻⵎⵥⵉⵢⵉⵏ, ⴷ ⵓⴼⵍⴰⵍⵉ ⵏ ⵜⴻⴼⵎⵉⵢⵉⵏ ⵜⵉⵎⴰⵢⵏⵓⵜⵉⵏ (startups) ⴷⴻⴳ ⵓⴳⵣⵓⵍ ⵏ ⵢⵉⵎⴻⵥⵍⴰ ⵉ ⵉⵞⵓⴷⴷⴻⵏ ⵖⴻⵔ ⵓⵙⵉⵡⴻⴹ ⴷ ⵜⵍⵓⴳⵉⵙⵜⵉⴽⵜ, ⵉ ⴷ-ⵢⴻⵔⵏⴰ ⵓⴱⴰⵏⵞ.
ⴷⴻⴳ ⵢⵉⵙⵡⵉⵔ ⴰⵎⵏⴰⴹⴰⵏ, ⴰⴱⵔⵉⴷ-ⴰ ⵏ ⵡⵓⵣⵣⴰⵍ — ⵉ ⴷⴻⴳ ⵢⴻⵜⵜⴻⴽⴽⵉ ⵓⴱⴰⵏⵞ ⴷⴻⴳ ⵓⵜⴰⵎⵡⴻⵍ ⵏ ⵜⵃⴰⵕⴻⵟ-ⵉⵙ ⵜⴰⵎⴻⵣⵡⴰⵔⵓⵜ (ⵍⴰⵖⵡⴰⵟ-ⴳⴰⵔⴷⴰⵖⴰ-ⵎⵍⵉⴽⴰ/ⵍⵎⴻⵏⵉⴰ) ⵖⴻⴼ ⵜⵙⴻⵇⵇⴰⵎⵓⵜ ⵏ 495 ⵏ ⵢⵉⴽⵉⵍⵓⵎⵉⵜⵔⴻⵏ — ⴰⴷ ⵢⴰⵍⵍⴻⴼ ⴷⴻⴳ ⵓⵙⵊⴻⵀⴻⴷ ⵏ ⵜⵡⴰⵙⵙⵏⴰ ⴷ ⵢⵉⵥⴻⵟⵟⴰⵡⴻⵏ ⵏ ⵓⵙⵉⵡⴻⴹ ⵢⴻⵍⵍⴰⵏ ⵏⴻⵖ ⴰⵔⴰ ⴷ-ⵢⵉⵍⵉⵏ ⴷⴻⴳ ⵜⴻⴼⵔⵉⵇⵜ, ⴷ ⵓⵙⴰⵙⵍⵉ ⵏ ⵓⵎⵙⴻⵏⴼⴰⵍ ⴰⵏⴻⵣⵔⵓⵢ ⴷ ⵜⴻⵎⵏⴰⴹⵜ ⵏ ⵙⴰⵀⴻⵍ ⴷ ⵓⵎⴻⵏⵥⴰⵡ ⴰⴼⵔⵉⵇⵉ ⵙ ⵓⵎⴰⵜⴰ. ⴰⵢⴰⴳⵉ ⵢⴻⵙⵙⴰⵡⴰⴹ ⵖⴻⵔ ⵢⵉⵙⵡⵉⵔⴻⵏ ⵏ ⵜⴻⵎⵏⴰⴹⵜ ⵏ ⵓⵙⴻⵏⴼⴰⵍ ⵉⵍⴻⵍⵍⵉ ⴰⴼⵔⵉⵇⵉ (ZLECAF), ⵍⴰⴷⵖⴰ ⴷⴻⴳ ⵓⵙⵏⴻⵔⵏⵉ ⵏ ⵓⵙⴻⵏⴼⴰⵍ ⴰⴳⴻⵏⵙⴰⵏ ⴰⴼⵔⵉⵇⵉ ⴷ ⵓⵙⴼⴰⵢⵍⵓ ⵏ ⵡⴰⵣⴰⵍ ⴰⵎⵏⴰⴹⴰⵏ.
ⵉⵡⴰⵍⴰ ⵓⴱⴰⵏⵞ ⴷⴰⴽⴽⴻⵏ ⴰⵙⵏⴻⵔⵏⵉ ⵏ ⵓⵥⴻⵟⵟⴰ ⵏ ⵓⵙⵉⵡⴻⴹ ⵉⵎⴻⴷⵡⴻⵍ ⴷ "ⴰⵖⴻⵔⵔⵓⵊ ⴰⴳⴻⵊⴷⴰⵏ" ⵉ ⵓⵜⴻⴷⴷⴻⵍ ⴰⴷⴰⵎⵙⴰⵏ ⴷⴻⴳ ⴷⵣⴰⵢⴻⵔ, ⵉ ⵢⴻⵔⵔⴰⵏ ⴰⵙⵎⴰⵢⵏⵓⵜ ⵏ ⵜⴰⵣⵔⵓⴼⵜ-ⵉⵙ ⴷ ⵜⴰⵎⴻⵣⵡⴰⵔⵓⵜ ⵜⴰⵖⴻⵍⵏⴰⵡⵜ. ⵉⵙⵙⴻⵖⵔⴻⵜ-ⴷ ⴷⴰⴽⴽⴻⵏ ⴰⴷ ⵉⴽⴻⵎⵎⴻⵍ ⴰⴷⵉⵡⴰⵍ ⴷ ⵢⵉⵏⴻⴷⴱⴰⵍⴻⵏ ⵉⴷⵣⴰⵢⵔⵉⵢⴻⵏ ⵉ ⵓⵙⴻⴷⵀⴻⵍ ⵏ ⵜⵙⴻⵔⵜⵉⵜ ⵏ ⵜⴰⵎⵓⵔⵜ, ⵍⴰⴷⵖⴰ ⴰⵙⵓⵔⴻⴼ-ⵉⵙ ⵉ ⵓⵙⴻⵍⵃⵉ ⵏ ⵓⵥⴻⵟⵟⴰ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ — ⵉ ⴷ ⵡⵉⵙⵙ ⵙⵉⵏ ⴷⴻⴳ ⵓⵎⴻⵏⵥⴰⵡ — ⵙⴻⴳ 6000 km ⵖⴻⵔ 15000 km ⴷⴻⴳ ⵓⴳⴳⴰⵚ ⵏ 2030.
ⴷⴻⴳ ⵡⴰⵟⴰⵙ-ⴰ, ⵉⵙⵙⴻⴽⴼⴻⵍ-ⴷ ⵓⵎⴰⵙⵍⴰⵢ ⵏ ⵢⵉⵔⵎⵓⴷⴻⵏ ⵏ ⵓⴳⵔⴰⵡ ⵏ ⵓⴱⴰⵏⵞ ⴷⴻⴳ ⴷⵣⴰⵢⴻⵔ, ⴰⴱⴷⴻⵍⴽⴰⴷⴻⵔ ⴷⵉⵍⴻⵉⵜⴰ, ⴷⴰⴽⴽⴻⵏ: "ⴰⴽⴰⵢⴰⴷ ⴰⵎⴻⵇⵇⵔⴰⵏ ⴷ ⴰⵇⵇⴰⵍ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⴷⵣⴰⵢⴻⵔ-ⵜⴰⵎⴻⵏⵖⴻⵙⵜ ⵖⴻⵔ ⵓⴳⴰⵔ ⵏ ⵜⴰⵣⵔⵓⴼⵜ ⵏ ⵓⵙⵉⵡⴻⴹ ⴽⴰⵏ; ⵉⵍⴰⵇ ⴰⴷ ⵢⵓⵖⴰⵍ ⴷ ⴰⵙⵓⵔⵉⴼ ⴰⴷⴰⵎⵙⴰⵏ ⴰⵔⴰ ⵉⵙⵙⴻⵎⵇⴻⵔⴱⴻⵏ ⴳⴰⵔ ⵜⴻⵎⵏⴰⴹⵉⵏ, ⴰⵎⵎⴰⵙⴻⵏ ⵏ ⵓⴼⴰⵔⴻⵙ ⴷ ⵢⵉⴳⴰⴷⴰⵣⴻⵏ, ⴷ ⵓⵙⵊⴻⵀⴻⴷ ⵏ ⵓⵙⴷⵓⴽⴽⴻⵍ ⴳⴰⵔ ⴷⵣⴰⵢⴻⵔ, ⵏⵉⵊⵉⵔ ⴷ ⵡⴰⵎⵓⵔ ⵏ ⵢⵉⵎⵓⵔⴰⵙ ⵏ ⵓⵜⴰⵔⴰⵎ ⵏ ⵜⴻⴼⵔⵉⵇⵜ."
ⵢⴻⵔⵏⴰ-ⴷ ⵢⴻⵏⵏⴰ: "ⴰⴱⴰⵏⵞ ⴻⵀⴻⴳⴳⴰ ⴰⴷ ⵉⴽⴻⵎⵎⴻⵍ ⵎⴰⵀⵉⵍ-ⴰ ⴷ ⵢⵉⵏⴻⴷⴱⴰⵍⴻⵏ ⵉⴷⵣⴰⵢⵔⵉⵢⴻⵏ, ⴷ ⵡⵉⴷ ⵏ ⵜⵙⵓⴷⴷⵡⵉⵏ ⵜⵉⵎⵏⴰⴹⴰⵏⵉⵏ ⴷ ⵜⵎⴻⴳⵔⴰⴹⴰⵏⵉⵏ, ⵉ ⵓⵙⴻⵍⵃⵉ ⵏ ⵓⵙⵓⵔⴻⴼ-ⴰ ⵖⴻⵔ ⵢⵉⴳⵎⴰⴹ ⵉ ⴷ-ⵉⵜⵜⴱⴰⵏⴻⵏ."
ⴰⵔⵏⵓ ⵖⴻⵔ
