ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵊⴻⵔⵔⴻⴷ ⵜⵏⴻⴱⴷⴰⴷⵜ ⵜⴰⵖⴻⵍⵏⴰⵡⵜ ⵏ ⵜⴰⵍⵍⴻⵍⵜ ⴷ ⵓⵏⴻⴳⵎⵓ ⵏ ⵜⵎⴻⵙⵙⴻⵏⵜⵉⵜ (NESDA), ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⵢⵉⵡⴻⵜ ⵏ ⵜⵎⴰⵖⵓⵏⵜ ⵏ ⵓⵎⵢⴻⵍⵍⴻⵍ ⴷ ⵜⵜⴻⵛⴰⵔⵉⴽⴰ ⵜⴰⵣⵣⴰⵢⵔⵉⵜ-ⵜⴰⵙⵙⵄⵓⴷⵉⵜ ⵏ ⵓⵙⵓⵎⴻⵔ (ASICOM). ⵉⵙⵡⵉ ⵏ ⵓⵙⵓⵔ-ⴰⴳⵉ ⴷ ⴰⵙⵊⴻⵀⴻⴷ ⵏ ⵢⵉⴱⵔⵉⴷⴻⵏ ⵏ ⵡⴻⴼⵔⴰⵢ ⵏ ⵡⴻⴷⵔⵉⵎ ⴷ ⵓⵙⵓⵎⴻⵔ ⵉ ⵍⴼⴰⵢⴷⴰ ⵏ ⵜⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ.
ⵊⴻⵔⴷⴻⵏ ⵖⴻⴼ ⵜⵎⴰⵖⵓⵏⵜ-ⴰⴳⵉ ⵓⵏⴻⴱⴷⴰⴷ ⴰⵎⴰⵜⵓ ⵏ "NESDA", ⵎⴰⵙⵙ ⴱⵉⵍⴰⵍ ⵄⴻⵛⴰⵛⴰ, ⴷ ⵓⵏⴻⴱⴷⴰⴷ ⴰⵎⴰⵜⵓ ⵏ ⵜⵜⴻⵛⴰⵔⵉⴽⴰ "ASICOM", ⵎⴰⵙⵙ ⵎⵓⵃⴰⵎⴻⴷ ⵚⴰⵍⵃⵉ. ⴰⵢⴰ ⵢⴻⵍⵍⴰ-ⴷ ⴷⴻⴳ ⵔⵔⵉⴼ ⵏ ⵢⵉⵡⴻⵏ ⵓⵙⴰⵔⴰⴳ ⵉ ⵜⴻⴳⴳⴰ ⵜⵏⴻⴱⴷⴰⴷⵜ ⵖⴻⴼ ⵓⵙⴻⵏⵜⴻⵍ "ⴰⵎⵢⴻⵍⵍⴻⵍ ⵉ ⵓⵏⴻⴳⵎⵓ ⴷ ⵓⵙⵙⴻⵎⵖⴻⵔ ⵏ ⵜⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ".
ⴷⴻⴳ ⵢⵉⵡⴻⵏ ⵡⴰⵡⴰⵍ ⵉ ⵢⵉⵙⴰⵍⵍⴻⵏ, ⵎⴰⵙⵙ ⵄⴻⵛⴰⵛⴰ ⵢⴻⵙⵙⴻⵊⴷⴻⴷ ⴱⴻⵍⵍⵉ ⵜⴰⵎⴰⵖⵓⵏⵜ-ⴰⴳⵉ ⵜⴻⴽⴽⴰ-ⴷ ⴷⴻⴳ ⵡⴰⵏⵏⴰⵔ ⵏ ⵜⵎⵓⵖⵍⵉ ⵏ ⵜⵏⴻⴱⴷⴰⴷⵜ ⵉ ⵢⴻⴱⵯⴰⵏ ⴰⴷ ⵜⴻⵊⵊ ⵜⵉⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ ⴰⴷ ⵣⴳⴻⵔⵏⵜ ⵙⴻⴳ ⵡⴰⴷⴷⴰⴷ ⵏ ⵓⵅⵍⴰⵇ ⵖⴻⵔ ⵡⴰⴷⴷⴰⴷ ⵏ ⵓⵏⴻⴼⵍⵓ ⴷ ⵓⵙⵙⴻⵎⵖⴻⵔ. ⴰⵢⴰ ⴰⴷ ⵢⵉⵍⵉ ⵙ ⵜⵓⴽⴽⵉ ⵏ ⵡⴰⵍⴰⵜⴻⵏ ⵏ ⵡⴻⴷⵔⵉⵎ ⵉⵎⴰⵢⵏⵓⵜⴻⵏ ⵢⴻⵔⵏⴰ ⴰⴷ ⵢⴻⴼⴽ ⵜⴰⵣⵎⴻⵔⵜ ⵉ ⵜⵎⴻⵔⵙⴻⵍⵉⵏ-ⴰⴳⵉ ⵉ ⵡⴰⴽⴽⴻⵏ ⴰⴷ ⴽⵛⴻⵎⵏⵜ ⵙ ⵜⴼⴰⵡⵜ ⴷⴻⴳ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.
ⵢⴻⵙⴼⴻⵔⵔⴻⵯ-ⴷ ⵓⵏⴻⴱⴷⴰⴷ ⴱⴻⵍⵍⵉ ⵜⴰⵎⴰⵖⵓⵏⵜ-ⴰⴳⵉ ⴰⴷ ⵜⴻⵊⵊ ⵜⵉⵎⴻⵔⵙⴻⵍⵉⵏ ⵉ ⴷ-ⵜⴻⴼⴽⴰ "NESDA" ⴰⴷ ⵙⵜⴻⴼⵢⴻⴷⴻⵏⵜ ⵙⴻⴳ ⵡⴻⴷⵔⵉⵎ ⵏ "ASICOM" ⵉ ⵡⴰⴽⴽⴻⵏ ⴰⴷ ⵙⵏⴻⴼⵍⴰⵢⴻⵏⵜ ⵍⴻⵇⴷⵉⵛ-ⵏⵙⴻⵏⵜ. ⴰⴼⵔⴰⵢ ⵏ ⵜⵎⴻⵔⵙⴻⵍⵉⵏ-ⴰⴳⵉ ⴰⴷ ⵢⵉⵍⵉ ⵖⴻⴼ ⵡⴰⵎⴻⴽ ⵢⴻⴳⴳⴰ ⵓⵙⴻⵏⴼⴰⵔ ⴷ ⵡⴰⵢⴻⵏ ⵢⴻⵃⵡⴰⵊ ⵏ ⵜⴰⵍⵍⴻⵍⵜ. ⵎⴰⵙⵙ ⵄⴻⵛⴰⵛⴰ ⵢⴻⵙⵙⵓⵜⴻⵔ ⵙⴻⴳ ⵎⴰⵕⵕⴰ ⵢⵉⵙⵙⴻⵏⴹⵓⵇⴻⵏ ⵏ ⵡⴻⴷⵔⵉⵎ ⴰⴷ ⵙⵙⴻⴽⵛⴻⵎⴻⵏ ⴰⴷⵔⵉⵎ-ⵏⵙⴻⵏ ⴷⴻⴳ ⵜⵎⴻⵔⵙⴻⵍⵉⵏ-ⴰⴳⵉ ⵉ ⵡⴰⴽⴽⴻⵏ ⴰⴷ ⵍⴷⵉⵏⵜ ⵜⵉⴱⴱⵓⵔⴰ ⵏ ⵢⵉⵎⴰⵍ.
ⵙⴻⴳ ⵍⵊⵉⵀⴰ ⵏⵏⵉⴹⴻⵏ, ⵎⴰⵙⵙ ⵚⴰⵍⵃⵉ ⵢⴻⵏⵏⴰ-ⴷ ⴱⴻⵍⵍⵉ ⴰⴳⵣⵓⵎ ⵏ ⵜⵎⴰⵖⵓⵏⵜ-ⴰⴳⵉ ⵢⴻⵙⴽⴰⵏⴰⵢ-ⴷ ⵍⴻⴱⵖⵉ ⵏ "ASICOM" ⵉ ⵡⴰⴽⴽⴻⵏ ⴰⴷ ⵜⴻⴼⴽ ⵜⴰⵍⵍⴻⵍⵜ ⵉ ⵓⵙⵓⵎⴻⵔ ⵉ ⴷ-ⵢⴻⵜⵜⴰⴽⴽⴻⵏ ⴰⴼⴰⵔⵉⵙ ⵢⴻⵔⵏⴰ ⴰⴷ ⵜⴷⵓⴽⴽⴻⵍ ⴷ ⵜⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ. ⵢⴻⵏⵏⴰ-ⴷ ⴱⴻⵍⵍⵉ ⵜⵉⵎⴻⵔⵙⴻⵍⵉⵏ-ⴰⴳⵉ ⴷ ⵜⴰⵔⵉⵛⵜ ⵉⵊⴻⵀⴷⴻⵏ ⵉ ⵓⵙⵏⴻⴼⵍⴰⵢ ⵏ ⵜⴷⴰⵎⵙⴰ ⴷ ⵓⵅⴻⵍⵍⴰⵇ ⵏ ⵢⵉⵎⵓⴽⴰⵏ ⵏ ⵓⵎⴰⵀⵉⵍ.
ⴰⵙⴰⵔⴰⴳ-ⴰⴳⵉ ⵢⴻⵍⵍⴰ ⴷ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⴱⴷⴻⵍⵏ ⵢⵉⴷⴻⴽⵔⵉⵡⴻⵏ ⴷ ⵜⵎⵓⵙⵏⵉⵡⵉⵏ ⴳⴰⵔ ⵎⴰⵕⵕⴰ ⵢⵉⵎⴻⵙⴽⴰⵔⴻⵏ ⵏ ⵜⴷⴰⵎⵙⴰ. ⵙⵙⴻⴽⵏⴻⵏ-ⴷ ⴷⴰⵖⴻⵏ ⵜⵉⵔⵎⵉⵜⵉⵏ ⵢⴻⵔⴱⴻⵃⵏ ⵏ ⴽⵔⴰ ⵏ ⵜⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ ⵉ ⵢⴻⵙⵙⴰⵡⴹⴻⵏ ⵖⴻⵔ ⵓⵏⴻⴼⵍⵓ ⵉⵊⴻⵀⴷⴻⵏ.
ⵜⴰⴳⴳⴰⵔⴰ, ⵡⵉⴷ ⵢⴻⵙⵄⴰⵏ ⵉⵙⴻⵏⴼⴰⵔⴻⵏ ⵙⵙⴻⵔⵙⴻⵏ-ⴷ ⵢⵉⵖⵉⵍⵉⴼⴻⵏ-ⵏⵙⴻⵏ ⵖⴻⴼ ⵡⴰⵎⴻⴽ ⴰⵔⴰ ⴰⴼⴻⵏ ⴰⴷⵔⵉⵎ ⵢⴻⵔⵏⴰ ⴼⴽⴰⵏ-ⴰⵙⴻⵏ-ⴷ ⵢⵉⵙⴻⴼⵔⴻⵯⵏ ⵉ ⵡⴰⴽⴽⴻⵏ ⴰⴷ ⵙⵙⴻⵎⵖⴻⵔⵏ ⵍⴻⵇⴷⵉⵛ-ⵏⵙⴻⵏ ⴷⴻⴳ ⵢⵉⵙⵡⴰⵇⴻⵏ ⵏ ⵜⵎⵓⵔⵜ.
ⴰⵔⵏⵓ ⵖⴻⵔ
