ⵢⴻⵙⵙⵓⵜⴻⵔ-ⴷ ⵓⵏⴻⵖⵍⴰⴼ ⵏ ⵡⴰⵎⴰⵏ, ⵟⴰⵀⴰ ⴷⴻⵔⴱⴰⵍ, ⴰⵙⵙ-ⴰ ⵏ ⵍⵃⴻⴷ, ⴰⴷ ⴼⴰⴽⴽⴻⵏ ⵢⵉⵙⴻⵏⴼⴰⵕⴻⵏ ⵢⴻⵍⵍⴰⵏ ⴷⴻⴳ ⵓⵙⴻⵍⴽⴻⵎ ⴷⴻⴳ ⵡⴰⴽⵓⴷ ⵏ ⵡⴻⵎⵜⴰⵡⴰ-ⵏⵙⴻⵏ, ⵙ ⵓⵇⴰⴷⴻⵔ ⵏ ⵢⵉⵙⴻⴱⴷⴰⴷⴻⵏ ⵉⵜⵉⴽⵏⵉⵢⴻⵏ.
ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵡⴰⵎⴰⵏ ⴷⴻⴳ ⵜⵎⴻⵙⵍⴰⵢⵜ-ⵉⵙ ⴷⴻⴳ ⵜⵉⵔⵣⵉ ⵏ ⵍⵅⴻⴷⵎⴰ ⴷ ⵓⵡⴻⵇⵇⵓⴷ ⵖⴻⵔ ⵍⵡⵉⵍⴰⵢⴰ ⵏ ⵛⵍⴻⴼ, ⴱⴻⵍⵍⵉ ⴰⵃⵔⵉⵛ-ⵉⵙ ⵢⴻⵜⵜⵏⴰⴷⵉ ⴰⴷ ⵉⵄⵉⵡⴻⵏ ⴰⵙⵏⴻⵔⵏⵉ ⴷⴻⴳ ⵍⵡⵉⵍⴰⵢⴰ ⴷⴻⴳ ⵢⴰⵍ ⵜⴰⵖⵓⵍⵜ, ⵢⴻⵙⵙⵓⵜⴻⵔ-ⴷ ⴰⴷ ⵔⵏⵓⵏ ⴰⴷ ⵙⵇⴻⴷⵛⴻⵏ ⵜⴰⵔⴰⵇⵎⴰⵏⵜ ⴷⴻⴳ ⵓⵙⴻⴼⵔⴻⴽ, ⵉⵡⴰⴽⴽⴻⵏ ⴰⴷ ⵃⴻⴽⵎⴻⵏ ⴰⴽⴽⴻⵏ ⵉⵍⴰⵇ ⴷⴻⴳ ⵓⴼⴻⵔⵔⴻⵇ ⵏ ⵡⴰⵎⴰⵏ, ⵢⴻⵔⵏⴰ ⴰⴷ ⵙⵏⴻⵔⵏⵉⵏ ⵍⴵⴻⵡⴷⴰ ⵏ ⵜⵏⴰⴼⵓⵜ ⵜⴰⵣⴰⵢⴻⵣⵜ.
ⵖⴻⴼ ⵡⴰⵢⴰ, ⵢⵉⵡⴻⵚⵚⴰ-ⴷ ⵓⵏⴻⵖⵍⴰⴼ ⵙ ⵍⵃⴻⵕⵙ ⵖⴻⴼ ⵓⵙⴻⵎⵖⴻⵔ ⴷ ⵓⵃⴰⴷⴻⵔ ⵏ ⵜⵏⴻⵖⵡⴰ ⵏ ⵡⴰⵎⴰⵏ ⴷ ⵡⴰⵍⵍⴰⵍⴻⵏ-ⵏⵙⴻⵏⵜ, ⴰⴽⴽⴻⴷ ⵓⵙⵏⴻⵔⵏⵉ ⵏ ⵜⴰⵢⵜⵉ ⵏ ⵜⵣⴻⵟⵟⵉⵡⵉⵏ ⴷ ⵜⵏⴻⵖⵡⴰ, ⴷ ⵓⵙⴻⵇⴷⴻⵛ ⵏ ⵜⵎⵓⵖⵍⵉ ⵖⴻⵔ ⵙⴷⴰⵜ ⴷ ⵓⵀⴻⵢⵢⵉ ⵏ ⵢⵉⵖⴰⵡⴰⵙⴻⵏ ⴷ ⵜⵉⴼⵔⴰⵜ ⵜⵉⵎⴱⴻⴷⴷⵍⵉⵏ ⵉⵡⴰⴽⴽⴻⵏ ⴰⴷ ⵇⴰⴱⵍⴻⵏ ⵓⴳⵓⵔⴻⵏ ⵢⴻⵎⴳⴰⵔⴰⴷⴻⵏ.
ⵙⴻⴳ ⵢⵉⴷⵉⵙ ⵏⵏⵉⴹⴻⵏ, ⵢⴻⵙⵙⵓⵜⴻⵔ-ⴷ ⵓⵏⴻⵖⵍⴰⴼ ⵏ ⵡⴰⵎⴰⵏ ⴰⴷ ⴼⴽⴻⵏ ⴰⵣⴰⵍ ⵉ ⵡⴰⵎⴰⵏ ⵢⴻⵜⵜⵓⵙⴻⵇⴷⴰⵛⴻⵏ ⵉ ⴷ-ⵙⵉⵣⴷⵉⴳⴻⵏ, ⴰⴷ ⵜⴻⵏ-ⵙⵇⴻⴷⵛⴻⵏ ⴷ ⴰⵖⴱⴰⵍⵓ ⵡⵉⵙ ⵙⵉⵏ ⵏ ⵡⴰⵎⴰⵏ. ⵢⴻⵙⵙⵓⵜⴻⵔ-ⴷ ⴰⴷ ⵏⵏⴰⵖⴻⵏ ⵎⴳⴰⵍ ⵜⵓⵇⵇⵏⵉⵡⵉⵏ ⵓⵔ ⵏⴻⵍⵍⵉ ⴰⵔⴰ ⴷⵉ ⵍⵇⴰⵏⵓⵏ ⴷ ⵜⵓⵇⵇⵏⵉⵡⵉⵏ ⵏ ⵔⵡⴰⵃ-ⴽⴰⵏ ⵉ ⵡⴰⵎⴰⵏ, ⵉⵎⵉ ⴰⵢⴰ ⵢⴻⵜⵜⴰⵡⵉ-ⴷ ⵜⵉⵢⵉⵜⴰ ⵏ ⴷⵉⵔ ⵖⴻⴼ ⵓⴼⴻⵔⵔⴻⵇ ⵍⵄⴰⵍⵉ ⵏ ⵡⴰⵎⴰⵏ.
ⴰⵔⵏⵓ ⵖⴻⵔ
