ⵜⴻⵔⵙ-ⴷ, ⴷⴻⴳ ⵜⴰⴳⴳⴰⵔⴰ ⵏ ⴷⴷⵓⵕⵜ (ⵉⵎⴰⵍⴰⵙ) ⵉⵄⴻⴷⴷⴰⵏ, ⴷⴻⴳ ⵓⵙⴰⴳⴻⵏ ⵏ ⵡⴰⵀⵔⴰⵏ, ⵙⵏⴰⵜ ⵏ ⵢⵉⴱⴰⴱⵓⵜⴻⵏ ⵉ ⴷ-ⵢⴻⵡⵡⵉⵏ ⴰⵣⴰⵍ ⵏ 36 ⵏ ⵡⴰⴳⵉⵎⴰⵏ ⵏ ⵢⵉⵇⴻⵔⵔⴰⵢ ⵏ ⵢⵉⵣⵉⵎⴰⵔⴻⵏ ⵉ ⴷ-ⵢⵓⵙⴰⵏ ⵙⴻⴳ ⵙⴱⴻⵏⵢⵓⵍ. ⴰⵢⴰⴳⵉ ⵢⴻⵍⵍⴰ-ⴷ ⴷⴻⴳ ⵓⴱⵔⵉⴷ ⵏ ⵓⵙⴻⵍⴽⴻⵎ ⵏ ⵡⴰⵀⵉⵍ ⵏ ⵓⵙⵙⴻⴽⵛⴻⵎ ⵏ ⵜⵉⴹⵃⵉⵢⵉⵏ ⵏ ⵍⵄⵉⴷ ⵏ ⵜⵎⴻⵖⵔⴰ, ⴰⴽⴽⴻⵏ ⵉ ⴷ-ⵜⴻⴽⴰ ⵜⵉⵣⵉ ⴰⵙⵙ-ⴰ ⵏ ⵍⵀⴻⴷ ⵙⴻⴳ ⵓⵙⵉⵔⴻⵎ ⵏ ⵜⵡⵉⵍⴰⵢⵜ ⵏ ⵓⴽⵙⵓⵎ ⵏ ⵓⵎⴰⵍⵓ.
ⵉⵙⵙⵜⴻⵍⵎ ⵓⵙⴰⴳⴻⵏ, ⴰⵙⵙ ⵏ ⵍⴶⴻⵎⵄⴰ ⵢⴻⵣⵔⵉⵏ, ⵜⴰⵄⴻⴱⴱⴰ ⵏ 26.180 ⵏ ⵢⵉⵇⴻⵔⵔⴰⵢ, ⵎⴰ ⴷ ⴰⵙⵙ ⵏ ⵙⵙⴻⴱⵜ, ⵜⵓⵙⵙⴰ-ⴷ ⵜⵄⴻⴱⴱⴰ ⵏⵏⵉⴹⴻⵏ ⵏ 10 ⵏ ⵡⴰⴳⵉⵎⴰⵏ ⵏ ⵢⵉⵇⴻⵔⵔⴰⵢ, ⴰⴽⴽⴻⵏ ⵉ ⴷ-ⵢⴻⵏⵏⴰ ⵓⵖⴱⴰⵍⵓ-ⵏⵏⵉ.
ⵜⵜⵡⴰⵙⵓⴼⴼⵖⴻⵏ ⵢⵉⵣⵉⵎⴰⵔⴻⵏ-ⴰⴳⵉ ⵙⴻⵍⴷ ⵎⵉ ⴼⵓⴽⴽⴻⵏⵜ ⵜⴰⵔⵔⴰⵢⵉⵏ ⵏ ⵓⵣⴻⵟⵟⴻⴹ ⴰⵙⴰⴼⴰⵔⴰⵏ ⵉ ⵢⴻⵙⵙⴻⵍⵡⴰⵢⴻⵏ ⵢⵉⵎⵙⴻⵜⵏⴻⴼⴻⵏ ⵏ ⵢⵉⵖⴻⵔⵙⵉⵡⴻⵏ, ⵙ ⵓⵙⴻⵎⵔⴻⵙ ⵏ ⵢⴰⴽⴽ ⵡⴰⵍⵍⴰⵍⴻⵏ ⵏ ⵜⴰⵍⵙⴰ ⴷ ⵜⵍⵓⵊⵉⵢⵙⵜⵉⴽⵜ.
ⴷⴻⴳ ⵓⵏⵏⴰⵔ-ⴰⴳⵉ, ⴰⵙⵉⵔⴻⵎ ⵏ ⵜⵡⵉⵍⴰⵢⵜ ⵏ ⵓⴽⵙⵓⵎ ⵏ ⵓⵎⴰⵍⵓ ⵢⴻⵙⵏⴻⴽⵏⴻⴷ ⵢⴰⴽⴽ ⵡⴰⵍⵍⴰⵍⴻⵏ ⵉ ⵓⵟⵎⴰⵏ ⵏ ⵔⵔⴻⴱⴻⵃ ⵏ ⵓⵎⴰⵀⵉⵍ-ⴰⴳⵉ, ⵙ ⵡⴰⵍⵍⴰⵍⴻⵏ ⵏ ⵓⵄⴻⴱⴱⵉ ⵏ ⵍⵎⴰⵍ ⵖⴻⵔ ⵜⵡⵉⵍⴰⵢⵉⵏ ⵏ ⴷⴰⵅⴻⵍ ⴷ ⵢⵉⵡⴻⵜ ⵏ ⵜⵡⵉⵍⴰⵢⵜ ⵏ ⵓⵏⵥⵓⵍ , ⵙ ⵜⵎⵓⵖⵍⵉ ⵏ ⵜⵙⴻⴷⴷⴰⵔⵉⵏ ⵏ ⵡⴰⵏⵏⴰⵔ ⵉ ⴷ-ⵢⴻⵡⵡⵉⵏ ⵜⴰⵎⴰⵙⵉⵜ ⵏ ⵓⵎⵙⴰⵙⴻⵢ ⴳⴰⵔ ⵢⵉⵎⴻⵥⵍⴰ ⵏ ⵜⴰⵣⵣⵉⵜ, ⵜⵎⴰⵏⴻⴳⵜ ⴷ ⵜⵓⴷⴱⴻⵍⵜ.
ⵉⵜⵜⵡⴰⵕⴶⴰ ⴰⴷ ⴷ-ⵢⴰⵡⴹⴻⵏⵜ ⵜⵄⴻⴱⴱⵉⵡⵉⵏ ⵏⵏⵉⴹⴻⵏ ⵏ ⵢⵉⵣⵉⵎⴰⵔⴻⵏ ⵙⴻⴳ ⵜⵎⵓⵔⴰ ⵏ ⵜⴷⵓⴽⵍⴰ ⵏ ⵜⵓⵔⵓⴼⵜ ⴷ ⵜⵓⵔⵓⴼⵜ ⵏ ⵓⴳⵎⵓⴹ ⴷⴻⴳ ⴷⴷⵓⵕⵜ-ⴰⴳⵉ, ⵓⵇⴱⴻⵍ ⴰⴷ ⴷ-ⵢⴰⵡⴻⴹ ⵍⵄⵉⴷ ⵏ ⵜⵎⴻⵖⵔⴰ, ⴰⴽⴽⴻⵏ ⵉ ⴷ-ⵢⴻⵔⵏⴰ ⵓⵙⵉⵔⴻⵎ-ⵏⵏⵉ.
ⴰⵔⵏⵓ ⵖⴻⵔ
