ⵢⴻⵊⵊⴰ ⵓⵙⴻⵅⴷⴻⵎ ⵏ ⵢⵉⵏⴰⵔⵎⴻⵏ ⵉⵏⴻⵎⴱⴰⴹⴻⵏ ⵉ ⵓⵙⴻⵍⴽⴻⵏ ⵏ ⵜⵖⴰⵔⴰ ⵏ ⵢⵉⴼⴰⵔⵉⵙ ⴷ-ⵉⴽⴻⵛⵛⵎⴻⵏ, ⵉ ⵢⴻⴱⴷⴰⵏ ⴰⵎⴰⵀⵉⵍ-ⵏⵙⴻⵏ ⵎⴻⵍⵎⵉ ⴽⴰⵏ ⴷⴻⴳ ⵢⵉⵙⵓⴳⴰⵏ ⵉⵣⵣⴰⵢⵔⵉⵢⴻⵏ, ⴰⴷ ⵢⴻⵜⵜⵓⵙⴻⴵⵀⴻⴷ ⵓⵏⴰⴳⵔⴰⵡ ⵏ ⵓⵙⴻⵄⵇⴻⴱ, ⴰⴷ ⵢⴻⵜⵜⵡⴰⵃⵔⴻⵣ ⴰⵟⴰⵙ ⵜⴻⵣⵎⴻⵔⵜ ⵏ ⵡⴻⵎⵙⴻⵅⴷⴰⵎ, ⵢⴻⵔⵏⴰ ⴼⴽⴰⵏ-ⴷ ⴰⴼⵓⵙ ⵙ ⵍⴵⴻⵀⴷ ⵉ ⵓⵙⴻⵏⵇⴻⵙ ⵏ ⵍⴰⵊⴻⵍ ⵏ ⵓⵀⴻⴳⴳⵉ ⵏ ⵙⵙⴻⵍⵄⴰ ⵉ ⵡⴰⴽⴽⴻⵏ ⴰⴷ ⵉⵙⵀⵉⵍ ⵓⵙⴻⴽⵛⴻⵎ-ⵉⵏⴻⵙ ⵖⴻⵔ ⵙⵙⵓⵇ ⴰⵖⴻⵍⵏⴰⵡ.
ⵓⵖⴰⵍⴻⵏ ⴰⵙⵙ-ⴰ ⵜⵎⴰⵏⵢⴰ ⵏ ⵢⵉⵏⴰⵔⵎⴻⵏ-ⴰ ⵉⵏⴻⵎⴱⴰⴹⴻⵏ, ⵉ ⵢⴻⴱⴷⴰⵏ ⴰⵎⴰⵀⵉⵍ ⴷⴻⴳ ⵢⵉⵙⵓⴳⴰⵏ ⵏ ⵜⵏⴻⵣⵣⵓⵜ ⵙⴻⴳ ⵡⴰⵢⵢⵓⵔ ⵏ ⵡⴻⵎⴱⴻⵔ ⵢⴻⵣⵔⵉⵏ, ⵜⵜⴽⴻⵎⵎⵉⵍⴻⵏ ⴰⵙⴻⵄⵇⴻⴱ ⵏ ⵢⵉⴼⴰⵔⵉⵙ ⴷ-ⵉⴽⴻⵛⵛⵎⴻⵏ ⵎⴻⴱⵍⴰ ⴰⵃⴱⴰⵙ, ⵙ ⵓⵙⴻⴽⴼⴻⵍ ⵏ ⵢⵉⵙⴻⵍⴽⴰⵏⴻⵏ ⵏ ⵡⴰⵏⵏⴰⵔ ⵏ ⵢⵉⴼⴰⵔⵉⵙ, ⵍⴰⴷⵖⴰ ⴰⵢⴻⵏ ⵢⴻⵔⵣⴰⵏ ⵍⴰⵊⴻⵍ, ⵉⵎⵉ ⵜⵓⵔⴰ ⵅⴻⴷⴷⵎⴻⵏ-ⵜⴻⵏ ⴷⴻⴳ ⵡⴰⴽⵓⴷ ⵉⵍⴰⵡ (ⵙ ⵜⵖⴰⵡⵍⴰ), ⴰⵢⴻⵏ ⵢⴻⵊⵊⴰⵏ ⵉⵎⵙⴻⵏⵇⴰⴷⴻⵏ ⵏ ⵜⵏⴻⵣⵣⵓⵜ ⴰⴷ ⴷⴷⵎⴻⵏ ⵉⵖⵜⴰⵙⴻⵏ ⵉⵎⵉⵔⵉⵢⴻⵏ ⵖⴻⴼ ⵓⵙⴻⴽⵛⴻⵎ ⵏ ⵙⵙⴻⵍⵄⴰ-ⵢⴰ ⵖⴻⵔ ⵙⵙⵓⵇ.
ⵢⴻⵜⵜⵡⴰⴱⴷⴻⵔ-ⴷ ⵡⴻⵎⴽⴰⵏ ⵏ ⵡⴰⵍⵍⴰⵍⴻⵏ-ⴰ, ⵉⴹⴻⵍⵍⵉ ⴰⵙⵙ ⵏ ⵙⴻⴷ ⴷⴻⴳ ⵢⵉⵡⴻⵜ ⵏ ⵜⵉⵔⵣⴰ ⵉ ⴷ-ⵢⴻⵜⵜⵡⴰⵀⴻⴳⴳⴰⵏ ⵉ ⵜⵖⴰⵎⵙⴰ ⵜⴰⵖⴻⵍⵏⴰⵡⵜ ⵙⵖⵓⵔ ⵓⵖⵍⵉⴼ ⵏ ⵜⵏⴻⵣⵣⵓⵜ ⵜⴰⴳⴻⵏⵙⴰⵏⵜ ⴷ ⵓⵚⴻⴳⴳⵉⵎ ⵏ ⵙⵙⵓⵇ ⴰⵖⴻⵍⵏⴰⵡ ⴷⴻⴳ ⵓⵙⴰⴳⴻⵏ ⵏ ⵍⴻⵣⵣⴰⵢⴻⵔ, ⵓⵇⴱⴻⵍ ⵏ ⵓⵙⴼⵓⴳⴻⵍ ⵏ ⵡⴰⵙⵙ ⴰⴳⵔⴻⵖⵍⴰⵏ ⵏ ⵢⵉⵣⴻⵔⴼⴰⵏ ⵏ ⵢⵉⵎⵙⴻⵅⴷⴰⵎⴻⵏ (15 ⵎⴻⵖⵔⴻⵙ).
ⵜⵜⵡⴰⵡⴼⵔⴻⵏ-ⴷ ⵢⵉⵏⴰⵔⵎⴻⵏ-ⴰ, ⵉ ⴷ-ⵢⴻⵜⵜⵡⴰⵖⴻⵏ ⵙ ⵓⵟⴻⴱⴱⴻⵇ ⵏ ⵜⵉⵏⴰⴹⵉⵏ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ, ⵉ ⵡⴰⴽⴽⴻⵏ ⴰⴷ ⵙⴵⴻⵀⴷⴻⵏ ⵜⵜⴰⵡⵉⵍⴰⵜ ⵏ ⵓⵙⴻⵄⵇⴻⴱ ⵏ ⵡⴰⵏⵏⴰⵔ ⵉ ⵢⵉⴼⴰⵔⵉⵙ, ⴷⴻⴳ ⵢⵉⵙⵓⴳⴰⵏ ⵏ ⵍⴻⵣⵣⴰⵢⴻⵔ, ⵄⴻⵏⵏⴰⴱⴰ, ⵙⴽⵉⴽⴷⴰ, ⴵⵉⴵⴻⵍ, ⴱⴳⴰⵢⴻⵜ, ⵎⴻⵙⵜⴻⵖⴰⵏⴻⵎ, ⵡⴻⵀⵔⴰⵏ ⴷ ⵖⴰⵣⴰⵡⴰⵜ, ⵔⵏⴰⵏ ⴼⴽⴰⵏ-ⵜⴻⵏ ⵉ ⵡⴰⵎⵎⴰⵙ ⴰⵣⵣⴰⵢⵔⵉ ⵏ ⵓⵙⴻⵄⵇⴻⴱ ⵏ ⵜⵖⴰⵔⴰ ⴷ ⵓⵇⴻⵎⵎⴻⵟ, ⴷ ⵜⴰⵙⵓⴷⵓⵜ ⵢⴻⵟⵟⴰⴼⴰⵔⴻⵏ ⴰⵖⵍⵉⴼ ⵏ ⵜⵏⴻⵣⵣⵓⵜ ⵜⴰⴳⴻⵏⵙⴰⵏⵜ ⴷ ⵓⵚⴻⴳⴳⵉⵎ ⵏ ⵙⵙⵓⵇ ⴰⵖⴻⵍⵏⴰⵡ.
ⵙ ⵜⴻⴳⵏⵉⵜ-ⴰ, ⵉⵙⵙⴻⴳⵣⴰ-ⴷ ⵡⴻⵎⵀⴰⵍ ⴰⵎⴰⵜⵓ ⵏ ⵓⵙⴻⵄⵇⴻⴱ ⵏ ⵜⴷⴰⵎⵙⴰ ⴷ ⵓⵃⴱⴰⵙ ⵏ ⵡⵓⵅⴻⴷⴷⴻⵄ ⴷⴻⴳ ⵓⵖⵍⵉⴼ, ⵎⵓⵃⴻⵎⵎⴻⴷ ⵎⴻⵣⵖⴰⵛ, ⴷ ⴰⴽⴽⴻⵏ "ⵜⴰⵡⵓⵔⵉ ⵜⴰⴳⴻⵊⴷⴰⵏⵜ ⵏ ⵢⵉⵏⴰⵔⵎⴻⵏ-ⴰ ⴷ ⴰⵙⴻⵍⴽⴻⵏ ⵎⴰ ⵢⴻⵍⵍⴰ ⵎⵚⴰⴷⴰⵏ ⵢⵉⴼⴰⵔⵉⵙ ⴷ ⵢⵉⵙⴻⴽⴽⵉⵍⴻⵏ ⴷ ⵜⴻⵛⵔⴰⴹ ⵜⵉⵜⵉⴽⵏⵉⵢⵉⵏ, ⴰⴽⴽⴻⵏ ⵢⴻⵍⵍⴰ ⴷⴻⴳ ⵓⵙⴰⴹⵓⴼ ⴰⵎⵉⵔⴰⵏ, ⴷⴻⴳ ⵓⵃⵔⵉⵛ ⵏ ⵓⵃⵔⴰⵣ ⵏ ⵜⴻⵣⵎⴻⵔⵜ ⵏ ⵢⵉⵎⵙⴻⵅⴷⴰⵎⴻⵏ ⴷ ⵜⵖⴻⵍⵍⵉⵙⵜ-ⵏⵙⴻⵏ, ⵢⴻⵔⵏⴰ ⴰⴷ ⴼⴽⴻⵏ ⴰⴼⵓⵙ ⵙ ⵍⴵⴻⵀⴷ ⵉ ⵓⴷⴻⵡⵡⴻⵏ ⵏ ⵢⵉⴽⵓⵏⵜⵉⵏⵉⵔⴻⵏ ⴷⴻⴳ ⵢⵉⵙⵓⴳⴰⵏ ⴷⵉ ⵍⴰⵊⴻⵍ ⵎⴻⵥⵥⵉⵢⴻⵏ ⴰⵟⴰⵙ".
ⵢⴻⵔⵏⴰ-ⴷ ⵓⵎⴻⵙⵟⴰⵢ ⴷ ⴰⴽⴽⴻⵏ ⵉⵏⴰⵔⵎⴻⵏ-ⴰ, ⵢⴻⵙⵄⴰⵏ ⴰⵍⵍⴰⵍⴻⵏ ⵢⴻⵎⵏⴻⵕⵏⵉⵢⴻⵏ, ⵢⴻⵜⵜⵡⴰⵔⴰⴽⴱⴻⵏ ⴷⴻⴳ ⵜⴽⴻⵔⵔⵓⵙⵉⵏ ⵜⵉⴼⵓⵚⵚⴰⵢⵉⵏ ⵏ ⵜⵏⴻⵣⵣⵓⵜ ⴷ-ⵢⴻⵜⵜⵡⴰⵅⴻⴷⵎⴻⵏ ⴷⴰⴳⵉ, ⵉ ⵓⵙⴻⵍⴽⴻⵏ ⵏ ⵢⵉⴼⴰⵔⵉⵙ ⴷ-ⵉⴽⴻⵛⵛⵎⴻⵏ ⴷ ⵓⵚⴻⵃⵃⵉ ⵏ ⵜⵖⴰⵔⴰ-ⵏⵙⴻⵏ, ⴰⴷ ⵄⵉⵡⵏⴻⵏ ⵉ ⵡⵇⴰⴱⴻⵍ ⵙ ⵍⴵⴻⵀⴷ ⵏ ⵢⵉⴼⴰⵔⵉⵙ ⵓⵔ ⵏⴻⵎⵚⴰⴷⴰ ⴰⵔⴰ ⵏⴻⵖ ⵢⴻⵜⵜⵡⴰⵅⴻⴷⵄⴻⵏ ⵓⵇⴱⴻⵍ ⴰⴷ ⴽⴻⵛⵎⴻⵏ ⵙⵙⵓⵇ, ⵉⵙⵙⴻⴳⵣⴰ-ⴷ ⴷ ⴰⴽⴽⴻⵏ ⵜⵉⵅⵓⴷⴰⵎ-ⵏⵙⴻⵏ ⵜⵜⵉⵍⵉⵏⵜ ⵙ ⵜⴷⵓⴽⵍⵉ ⴷ ⵢⵉⵎⵙⴻⵏⵇⴰⴷⴻⵏ ⵏ ⵜⵏⴻⵣⵣⵓⵜ ⵉ ⴷ-ⵢⴻⵜⵜⴻⴷⴷⵎⴻⵏ ⵉⵎⴻⴷⵢⴰⵜⴻⵏ ⵙⴻⴳ ⵢⵉⴼⴰⵔⵉⵙ ⵙ ⵓⵎⵢⴰⵡⴰⴹ ⴷ ⵢⵉⵖⴰⵍⵍⴻⵏ ⵏ ⴷⵉⵡⴰⵏⴰ ⴷ ⵢⵉⵏⴻⵎⴱⴰⴹⴻⵏ ⵏ ⵓⵙⴰⴳⴻⵏ.
ⵢⴻⵎⵎⴻⵙⵍⴰⵢ-ⴷ ⴷ ⴰⴽⴽⴻⵏ ⵉⵏⴰⵔⵎⴻⵏ-ⴰ, ⵢⴻⵅⴻⴷⴷⵎⴻⵏ ⵉⵙⴻⵍⴽⴰⵏⴻⵏ ⵉⵎⵉⴽⵔⵓⴱⵢⵓⵍⵓⵊⵉⵢⴻⵏ, ⵉⴼⵉⵣⵉⴽⵉⵢⴻⵏ ⴷ ⵉⴽⵉⵎⵉⵢⴰⵡⵉⵢⴻⵏ ⵍⵇⴰⵢⴻⵏ ⵉ ⵢⵉⴼⴰⵔⵉⵙ, ⵍⴰⴷⵖⴰ ⵡⵉⴷ ⵏ ⵡⵓⵞⵞⵉ, ⵓⵇⴱⴻⵍ ⴰⴷ ⴼⵖⴻⵏ ⵙⴻⴳ ⵢⵉⵙⵓⴳⴰⵏ, ⵜⵜⴰⵊⵊⴰⵏ ⴰⴷ ⴷ-ⵏⵔⴻⴱⴻⵃ ⴰⴽⵓⴷ, ⵉⵙⴽⴻⵏ-ⴷ ⴷ ⴰⴽⴽⴻⵏ ⴰⵏⴰⵡ-ⴰ ⵏ ⵢⵉⵙⴻⵍⴽⴰⵏⴻⵏ ⵍⵍⴰⵏ ⵜⵜⵡⴰⵅⴷⴰⵎⴻⵏ ⵣⵉⴽ ⴷⴻⴳ ⵢⵉⵏⴰⵔⵎⴻⵏ ⵢⴻⵍⵍⴰⵏ ⴷⴻⴳ ⵜⵓⴷⴷⵙⵉⵡⵉⵏ ⵏ ⵓⵃⵔⵉⵛ, ⴷⵖⴰ ⴰⵢⴰ ⵢⴻⵍⵍⴰ ⵢⴻⵜⵜⴰⵡⵉ-ⴷ ⵉⴱⴻⵔⴷⴰⵏ ⵢⴻⵡⵄⴻⵔⴻⵏ ⴷ ⵍⴰⵊⴻⵍ ⵖⴻⵣⵣⵉⴼⴻⵏ. ⵉⵡⴻⴽⴽⴻⴷ-ⴷ ⴷⴰⵖⴻⵏ ⴷ ⴰⴽⴽⴻⵏ "ⴰⵖⵍⵉⴼ ⵢⴻⵙⵄⴰ ⴰⵙⵙ-ⴰ ⴰⵍⵍⴰⵍⴻⵏ ⵏ ⵓⵙⴻⵄⵇⴻⴱ ⵏ ⵜⵖⴰⵔⴰ ⴷⴻⴳ ⵡⴰⵎⵎⴰⵙⴻⵏ ⵏ ⵜⵍⵉⵙⴰ, ⴰⵢⴻⵏ ⴰⵔⴰ ⵙ-ⵢⴻⵛⴼⴻⵏ ⴰⴷ ⵜⵇⴰⴱⴻⵍ ⵉⵙⵙⵓⵜⴰⵔ ⵏ ⵢⵉⵖⴰⵍⵍⴻⵏ-ⵏⵏⵉⴹⴻⵏ ⴷ ⵢⵉⵎⵙⴻⴽⵛⴰⵎⴻⵏ, ⵍⴰⴷⵖⴰ ⴷⵉⵡⴰⵏⴰ ⴷ ⵉⵖⵍⵉⴼⴻⵏ ⵏ ⵜⴼⴻⵍⵍⴰⵃⵜ ⴷ ⵜⵡⴻⵏⵏⴰⴹⵜ".
ⵢⴻⵔⵏⴰ ⵢⴻⵏⵏⴰ-ⴷ: "ⵖⴻⴼ ⴷⴻⵎⵎⴰ ⵏ ⵡⴰⵍⵍⴰⵍⴻⵏ-ⴰ ⵉⵎⴰⵢⵏⵓⵜⴻⵏ, ⵉⵖⴰⵍⵍⴻⵏ ⵏ ⵓⵖⵍⵉⴼ ⵣⴻⵎⵔⴻⵏ ⴰⴷ ⵅⴻⴷⵎⴻⵏ ⵉⵙⴻⵍⴽⴰⵏⴻⵏ ⴷⴻⴳ ⵍⴻⵙⵡⴰⵇ ⵏ ⴷⴰⵅⴻⵍ, ⵙⵖⵓⵔ ⵉⵎⵙⴻⵏⵇⴰⴷⴻⵏ ⵏ ⵜⵏⴻⵣⵣⵓⵜ ⵉ ⴷ-ⵢⴻⵜⵜⴻⴷⴷⵎⴻⵏ ⵉⵎⴻⴷⵢⴰⵜⴻⵏ ⵙⴻⴳ ⵢⵉⴼⴰⵔⵉⵙ ⵉ ⵡⴰⴽⴽⴻⵏ ⴰⴷ ⵜⴻⵏ-ⵙⵄⴻⴷⴷⵉⵏ ⵉ ⵢⵉⵙⴻⵍⴽⴰⵏⴻⵏ ⵉⵎⵉⵔⵉⵢⴻⵏ".
ⵙⴻⴳ ⵜⴰⵎⴰ-ⵙ, ⵉⵙⵙⴻⴳⵣⴰ-ⴷ ⵓⵇⴻⵔⵔⵓ ⵏ ⵓⵙⴻⵏⴼⴰⵔ ⵢⴻⵜⵜⵡⴰⴽⴻⵍⵍⴼⴻⵏ ⵙ ⵡⴰⵖⴰⵢ ⵏ ⵢⵉⵏⴰⵔⵎⴻⵏ-ⴰ, ⵎⵓⵃⴻⵎⵎⴻⴷ ⵅⵍⵉⴼⴰ, ⴷ ⴰⴽⴽⴻⵏ ⴰⵙⴻⴽⵛⴻⵎ ⵏ ⵢⵉⵏⴰⵔⵎⴻⵏ-ⴰ ⵖⴻⵔ ⵍⴻⵇⴷⵉⵛ ⵢⴻⵊⵊⴰ ⴰⴷ ⴷ-ⵢⵉⵍⵉ "ⵓⵙⴻⵏⵇⴻⵔ ⴰⵎⴻⵇⵇⵔⴰⵏ ⴷⴻⴳ ⵓⵃⵔⵉⵛ ⵏ ⵢⵉⵙⴻⵍⴽⴰⵏⴻⵏ ⵉⵎⵉⴽⵔⵓⴱⵢⵓⵍⵓⵊⵉⵢⴻⵏ ⵉ ⵢⵉⴼⴰⵔⵉⵙ ⴷ-ⵉⴽⴻⵛⵛⵎⴻⵏ, ⵙ ⵓⵙⴻⵏⵇⴻⵙ ⵏ ⵍⴰⵊⴻⵍ ⵙⴻⴳ ⴽⵔⴰ ⵏ ⵡⵓⵙⵙⴰⵏ ⵖⴻⵔ ⴽⵔⴰ ⵏ ⵜⵎⵉⵏⵓⵜⵉⵏ", ⵢⴻⵡⵡⵉ-ⴷ ⴰⵎⴻⴷⵢⴰ ⴷⴻⴳ ⵡⴰⵏⵏⴻⵛⵜ-ⴰ, ⵖⴻⴼ ⵓⵙⴻⵄⵇⴻⴱ ⵏ ⵓⵙⴻⴽⵛⴻⵎ ⵏ ⵓⵢⴻⴼⴽⵉ ⵏ ⵜⵖⴻⴱⵕⴰⵜ ⵏ ⵓⵡⴻⵣⵖⵉ ⵏⴻⵖ ⴰⵢⴻⴼⴽⵉ ⵏ ⵍⵍⵓⴼⴰⵏⴰⵜ, ⵉ ⵢⴻⵍⵍⴰⵏ ⵣⵉⴽ ⵢⴻⵜⵜⴰⵟⵟⴰⴼ ⴰⵔⵎⵉ ⴷ ⵙⴻⵎⵎⵓⵙ ⵏ ⵡⵓⵙⵙⴰⵏ ⵉ ⵡⴰⴽⴽⴻⵏ ⴰⴷ ⵜⵜ-ⵉⴷ-ⵙⴼⴻⵀⴷⴻⵏ, ⵎⴰ ⴷ ⵜⵓⵔⴰ ⵢⵓⵖⴰⵍ ⵢⴻⵜⵜⴰⵟⵟⴰⴼ ⴰⴽⵓⴷ ⵡⴻⵣⵉⵍⴻⵏ ⴰⵟⴰⵙ.
ⵉⵡⴻⴽⴽⴻⴷ-ⴷ ⵓⵎⴻⵙⵍⴰⵢ-ⴰ ⵙ ⵜⵉⵎⵎⴰⴷ-ⵉⵙ ⴷ ⴰⴽⴽⴻⵏ ⵉⵙⵡⵉ ⵉ ⵖⴻⵔ ⵜⵜⵎⵓⵇⵓⵍⴻⵏ ⵙ ⵢⵉⵏⴰⵔⵎⴻⵏ-ⴰ ⴷ ⴰⵃⵔⴰⵣ ⵏ ⵡⴻⵎⵙⴻⵅⴷⴰⵎ ⵙⴻⴳ ⵡⴰⴽⴽ ⵉⵎⵉⵣⵉⵡⴻⵏ ⵏ ⵡⵓⵞⵞⵉ, ⴰⴽⴽⴻⴷ ⵓⵙⴻⵀⵀⴻⵍ ⵏ ⵓⵀⴻⴳⴳⵉ ⵏ ⵢⵉⴼⵓⵢⵍⴰ ⵏ ⵓⵙⴻⴽⵛⴻⵎ ⵉ ⵢⵉⴷⴰⵎⵙⴰⵏⴻⵏ ⴷⴻⴳ ⵍⴰⵊⴻⵍ ⵡⴻⵣⵉⵍⴻⵏ, ⵢⴻⵔⵔⴰ "ⵔⵔⴱⴻⵃ ⴰⵎⴻⵇⵇⵔⴰⵏ ⴷⴻⴳ ⵓⵙⴻⵎⵔⴻⵙ ⵏ ⵓⵙⴻⵏⴼⴰⵔ-ⴰ ⵉ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉ ⴷ-ⵢⴻⴼⴽⴰⵏ ⵍⴰⵎⴻⵔ ⴰⴷ ⵙⴻⵔⵙⴻⵏ ⴰⵍⵍⴰⵍⴻⵏ-ⴰ ⵉ ⵡⵃⵔⵉⵛ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵖⴻⴼ ⵜⵖⴰⵔⴰ ⴷ ⵢⵉⵙⴻⴽⴽⵉⵍⴻⵏ ⵏ ⵢⵉⴼⴰⵔⵉⵙ ⴷ-ⵉⴽⴻⵛⵛⵎⴻⵏ".
ⴰⵔⵏⵓ ⵖⴻⵔ
