ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ: ⴷⵣⴰⵢⴻⵔ ⵜⴻⵙⵙⴰⵡⴻⴹ ⵖⴻⵔ ⵢⵉⵙⴻⴹⵔⴰ ⵉⵎⴻⵇⵇⵔⴰⵏⴻⵏ ⴷⴻⴳ ⵡⴰⴽⵓⴷ ⴰⵡⴻⵣⵍⴰⵏ

ⵉⵡⴻⴽⴽⴻⴷ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⴰⴱⴷⴻⵍⵎⴰⴷⵊⵉⴷ ⵜⴻⴱⴱoⵓⵏⴻ, ⴷⴰⴽⴽⴻⵏ ⴷⵣⴰⵢⴻⵔ ⵜⴻⵙⵙⴰⵡⴻⴹ, ⴷⴻⴳ ⵜⴰⴳⴰⵔⴰ-ⴰ, ⵖⴻⵔ ⵢⵉⵙⴻⴹⵔⴰ ⴷ ⵉⵎⴻⵇⵔⴰⵏⴻⵏ ⴷⴻⴳ ⵢⵉⵡⴻⵏ ⵏ ⵡⴰⴽⵓⴷ ⴰⵡⴻⵣⵍⴰⵏ, ⴰⵎ ⵡⴰⴽⴽⴻⵏ ⵉ ⴷ-ⵢⴻⵙⵙⵓⵍⴻⵖ ⴷⴰⴽⴽⴻⵏ, ⴷⴻⴳ ⵡⴽⵓⴷ ⵓⵇⵔⵉⴱ, ⴰⴷ ⴷ-ⴰⴷⴼⴻⵏ ⵖⴻⵔ ⵓⵎⴻⵥⵍⵓ, ⵎⴻⵏⵏⴰⵡ ⵏ ⵢⵉⵙⴻⵏⴼⴰⵔⴻⵏ, ⴰⵎ ⵓⵙⴻⵏⴼⴰⵔ ⵏ ⵓⴼⴰⵔⴻⵙ ⵏ ⵡⵓⵣⵣⴰⵍ ⵏ ⴳⴰⵔⴰ ⴷⵊⴻⴱⵉⵍⴻⵜ ⴷ ⵓⵙⵣⵏⴼⴰⵔ ⵏ ⵓⴼⴰⵔⴻⵙ ⵏ ⵓⴼⵓⵙⴼⴰⵟ ⵏ ⴱⵍⴻⴷ ⴻⵍ ⵀⴰⴷⴱⴰ.

ⵉⵍⵎⴻⵏⴷ ⵏ ⵜⴻⵎⵍⵉⵍⵉⵜ-ⵉⵙ ⴷ ⵢⵉⴳⴻⵏⵙⴰⵙⴻⵏ ⴷ ⵢⵉⵎⴻⴳⴳⵉⵢⴻⵏ ⵏ ⵜⵎⴻⵜⵜⵉ ⵜⴰⵖⴰⵔⵉⵎⵜ ⴷⴻⴳ ⵜⴰⴳⴳⴰⵔⴰ ⵏ ⵜⴻⵔⵣⵉ-ⵙ ⵖⴻⴼ ⵜⵡⵉⵍⴰⵢⵜ ⵏ ⵇⵙⴻⵏⵟⵉⵏⴰ ⴰⵙⵙ ⵏ ⵓⴽⴰⵡⵙ (ⵍⴻⵅⵎⵉⵙ) ⵢⴻⵣⵔⵉⵏ, ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴻⴳ ⵢⵉⵡⴻⵏ ⵏ ⵢⵉⵏⴰⵡ ⵉ ⴷ-ⵜⴻⵎⵙⴻⴽ ⴰⵙⵙ ⵏ ⵓⵙⴰⵎⴰⵙ (ⵍⵃⴻⴷⴷ) ⵜⴰⵎⴻⴷⴷⵉⵜ ⵜⵉⵍⵉⵥⵔⵉ ⵜⴰⴷⵣⴰⵢⵔⵉⵜ, ⴷⴻⴳ ⵢⵉⵡⴻⵏ ⵏ ⵡⴰⵀⵉⵍ ⵉⵣⵣⵉⴳ ⵖⴻⴼ ⵜⵉⵔⵣⵉ-ⴰ, ⴷⴰⴽⴽⴻⵏ « ⵍⴻⵣⵣⴰⵢⴻⵔ ⵜⴻⵙⵙⴰⵡⴻⴹ ⵙⴻⴳ ⴷⴻⴳ ⵜⴰⴳⴰⵔⴰ-ⴰ ⵖⴻⵔ ⵢⵉⵙⴻⴹⵔⴰ ⵉⵎⴻⵇⵔⴰⵏⴻⵏ ⴷⴻⴳ ⵢⵉⵡⴻⵜ ⵏ ⵡⴰⴽⵓⴷ ⴰⵡⴻⵣⵍⴰⵏ ».

ⵢⴻⵔⵏⴰ-ⴷ ⴷⴰⴽⴽⴻⵏ ⵓⵍⴰ ⵎⴰ ⵍⵍⴰⵏ « ⵢⵉⵎⴻⵏⵏⵓⵖⴻⵏ ⴷ ⵜⴼⴰⵜⵜⴰⵏⵉⵏ » ⵉ ⵇⴰⴱⵍⴻⵏ ⴷⴻⴳ ⵢⵉⵙⴻⴳⴳⴰⵙⴻⵏ ⵉⵎⴻⵣⵡⵓⵔⴰ ⵏ ⵜⴰⵍⵍⵉⵜ-ⵏⵏⴻⵙ ⵜⴰⵎⴻⵣⵡⴰⵔⵓⵜ ⵏ ⵜⵙⴻⵍⵡⵉⵜ, ⵡⵉⴷ ⵢⴻⵍⵍⴰⵏ ⴷⴻⴼⴼⵉⵔ ⵜⵎⵓⴷⴷⴰ-ⴰ ⵓⵔ ⵣⵎⵉⵔⴻⵏ ⴰⵔⴰ ⴰⴷ ⵃⴻⴱⵙⴻⵏ ⵜⵉⴷⴷⵉⵜ ⵏ ⴷⵣⴰⵢⴻⵔ ⵜⴰⵎⴰⵢⵏⵓⵜ, ⵎⴰⵏⵉ ⵉ ⵏⴻⵣⵎⴻⵔ ⴰⴷ ⵏⴰⵡⵡⴻⴹ ⵖⴻⵔ « ⵎⴻⵏⵏⴰⵡ ⵏ ⵢⵉⵙⴻⴹⵔⴰ ⵉⵎⴻⵇⵔⴰⵏⴻⵏ ⴷⴻⴳ ⵜⵖⵓⵍⴰ ⵢⴻⵎⴳⴻⵔⵔⴰⴷⴻⵏ ⴷⴻⴳ ⵢⵉⵡⴻⵏ ⵏ ⵡⴰⴽⵓⴷ ⴰⵅⵜⴰⵜⴰⵙ », ⵢⴻⵔⵏⵓ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ « ⴷⵣⴰⵢⴻⵔ ⴰⴷ ⵜⴻⵥⵔ ⴰⵇⴻⵍⵍⴻɛ ⴰⵎⴰⵢⵏⵓ ⴰⴷⴻⵜⵜⴰⵏ ⴷⴻⴳ ⵓⵙⴻⴳⴳⴰⵙ ⵉ ⴷ-ⵢⴻⴳⴳⵓⵔⴻⵏ, ⵎⴰⵏⵉ ⴰⴷ ⵜⴻⵙⵙⵉⵖⴻⵔ ⵖⴻⵔ ⵜⵖⴻⵍⵍⵉⵙⵜ ⴷ ⵓⵔⴽⴰⴷ ⵙ ⵜⴻⵍⵖⴰ ⵜⴰⵏⴰⴳⴰⵔⵜ ».

ⵉⵍⵎⴻⵏⴷ ⵏ ⵡⴰⵢⴰ, ⵢⴻⴱⴷⴻⵔ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴰⴽⴽⴻⵏ ⵜⴰⴳⵏⵉⵜ ⵜⴰⴷⴰⵎⵙⴰⵏⵜ ⵜⴻⵜⵜⵡⴰⵙⴽⴻⵔⵡⵉ ⵢⴻⵔⵏⵓ ⴰⴽⴽ ⵉⵎⴰⵜⴰⵔⴻⵏ ⵉⴷⴰⵎⵙⴰⵏⴻⵏ ⴷ ⵓⵎⵏⵉⴳⴻⵏ, ⵢⴻⴱⴷⴻⵔ-ⴷ ⴷⴰⴽⴽⴻⵏ ⴷⵣⴰⵢⴻⵔ ⵓⵔ ⵜⴻⵙⵙⴰⵡⴻⴹ ⴰⵔⴰ ⵖⴻⵔ ⵓⵎⴻⵔⵡⴰⵙ ⵓⴼⴼⵉⵖ ⵓⵍⴰ ⵎⴰ ⴰⵜⵉⴳⴻⵏ ⵏ ⵓⵒⵉⵟⵔⵓⵍ ⵓⴷⵔⴻⵏ ⴷⴻⴳ ⵓⵍⵣⵓⵣ ⴰⴳⵔⴰⵖⵍⴰⵏ, ⴷ ⵜⴰⵎⵙⴰⵍⵜ ⵉⵖⴻⴼ ⵉ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵡⴰⵏⴰⴽ « ⵢⴻⴷⴷⴻⵎ ⴰⴽⴽ ⵉⵃⴻⵣⵣⵉⴱⴻⵏ ⴷⴻⴳ ⵡⴰⵢⴰ ».

ⴷⴻⴳ ⵢⵉⵡⴻⵏ ⵏ ⵡⴰⵜⵜⴰⵍ ⵢⴻⵇⵇⵏⴻⵏ ⵖⴻⵔ ⵡⴰⵢⴰ, ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴰⴽⴽⴻⵏ ⴰⴷ ⵢⴻⴷⴷⵓ ⵖⴻⵔ ⵜⵡⵉⵍⴰⵢⵜ ⵏ ⴱⴻⵛⵀⴰⵔ « ⴷⴻⴳ ⵡⴰⵣⴰⵍ ⵏ ⵡⴰⵢⵢⵓⵔ ⴰⴽⴽⴻⵏ ⴰⴷ ⵢⴻⵙⵉⴳⴳ ⵢⵉⵡⴻⵜ ⵏ ⵜⴼⵓⴳⵍⴰ ⵜⴰⵎⴻⵣⵔⵓⵢⴰⵏⵜ ⵉⵍⵎⴻⵏⴷ ⵏ ⵡⴰⵡⵡⴰⴹ ⵏ ⵡⵓⵣⵣⴰⵍ ⵉ ⴷ-ⵢⴻⵜⵜⵡⴰⴽⴽⵙⴻⵏ ⵙⴻⴳ ⵓⵏⴰⵖⴻⵣ ⵏ ⴳⴰⵔⴰ ⴷⵊⴻⴱⵉⵍⴻⵜ ⵖⴻⵔ ⵜⵡⵉⵍⴰⵢⵜ ⵏ ⴱⴻⵛⵀⴰⵔ ⵖⴻⴼ ⵓⵣⵉⵔⵉⴳ ⴰⴱⵔⵓⵣⵣⵍⴰⵏ ⵜⵉⵏⴷⵓⴼ-ⴱⴻⵛⵀⴰⵔ, ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⵙⴻⴳ ⵡⴰⵙⵎⵉ ⵉ ⴷ-ⵜⴻⵡⵡⵉ ⴰⵣⴰⵔⵓⴳ ».

ⵢⴻⵔⵏⴰ-ⴷ ⴷⴰⴽⴽⴻⵏ ⵉⵣⵉⵔⵉⴳ ⴰⴱⵔⵓⵣⵣⵍⴰⵏ ⴰⵎⴰⵢⵏⵓ, ⵖⴻⴼ ⵜⴻⵖⵣⴻⴼⵜ ⵏ ⵓⴳⴰⵔ ⵏ 1000 ⵏ ⵢⵉⴽⵉⵍⵓⵎⵉⵜⵔⴻⵏ, ⵢⴻⵟⵟⴻⴼ ⵓⵙⴻⴹⵔⵓ-ⵏⵏⴻⵙ ⴰⵙⴻⴳⴳⴰⵙ ⴷ ⵓⵣⴳⴻⵏⴽⴰⵏ, , ⴰⵎ ⵡⴰⴽⴽⴻⵏ ⵉ ⴷ-ⵢⴻⵙⵙⵓⵍⴻⵖ ⴷⴰⴽⴽⴻⵏ ⴰⴱⵔⵓⵣⵣⴰⵍ ⵏⵉⴹⴻⵏ ⴰⵔⴰ ⵢⴻⵙⵙⵉⵡⴹⴻⵏ ⴰⴼⵓⵙⴼⴰⵟ ⵖⴻⵔ ɛⴻⵏⵏⴰⴱⴰ.

ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⴰⴽⴽ ⵉⵙⴻⵏⴼⴰⵔⴻⵏ ⵉ ⵢⴻⵜⵜⵡⴰⵙⴻⴹⵔⵓⵏ ⴰⴷ ⴷⴻⵔⵡⴻⵏ ⴷⴻⴳ ⵓⵙⵏⴻⵔⵏⵉ ⵏ ⵡⴰⵣⴰⵍ ⵏ ⵓⴼⴰⵔⴻⵙ ⵏ ⵓⴼⵓⵙⴼⴰⵟ ⵙⴻⴳ 2,5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⴷⴻⴳ ⵓⵙⴻⴳⴳⴰⵙ ⴰⵔⵎⴰ ⴷ 10,5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⴷⴻⴳ ⵓⵙⴻⴳⴳⴰⵙ.

ⴷⴻⴳ ⵓⴽⴰⵜⴰⵔ-ⴰ, ⵉⵃⴻⵜⵜⴻⵜ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴰⴽⴽⴻⵏ ⴰⵎⵔⵉⴳ ⴰⵎⴰⵢⵏⵓ ⴷⴻⴳ ⵓⵎⴰⴹⴰⵍ ⵏⴻⵜⵜⴰ ⴷ ⴰⵎⵔⵉⴳ ⵏ ⵓⴼⴰⵔⴻⵙ ⵏ ⵉⵎⵥⵓⵔⴻⵏ (ⵍⴻⵖⴱⴰⵕ) ⴷ ⵢⵉⵎⵖⵓⵣⴻⵏ, ⴰⵎ ⵡⴰⴽⴽⴻⵏ ⵉ ⴷ-ⵉⵡⴻⴽⴽⴻⴷ ⴰⵎⵉⵔⴻⵡ ⵏ ⵓⵡⴰⵏⴰⴽ ⴰⴽⴽⴻⵏ ⴰⴷ ⵢⴻⵙⵙⴻǧⵀⴻⴷ ⵙⵉⵏ-ⴰ ⵏ ⵢⴻⴳⵣⵓⵎⴻⵏ ⵉⵅⴰⵜⴰⵔⴻⵏ.

ⴰⵡⴰⵏⴰⴽ ⵢⴻⵜⵜⴽⴻⵎⵎⵉⵍ ⵓⵙⵙⵉⵙⴻⵏ-ⵉⵙ ⵉ ⵓⵙⵏⴻⵔⵏⵉ ⵏ ⵓⴽⵜⴰⵎⵓⵔ ⵏ ⵓⵏⵓⵎⵎⴻⴷ ⵏ ⵜⴻⵎⴳⵓⵔⵉ ⵜⴰⵎⴻⴽⵏⴰⵏⵜ, ⵖⴻⴼ ⵢⵉⵙⵡⵉ ⵏ ⵓⵙⵉⵡⴻⴹ ⵖⴻⵔ ⵓⵙⴻⴹⵔⵓ ⵜⴽⴻⵔⵔⵓⵙⵜ ⵜⴰⴷⵣⴰⵢⵔⵉⵜ ⵙ ⵓⴽⵜⴰⵎⵓⵔ ⵏ 40% , ⴰⴽⴽⴻⵏ ⵉ ⴷ-ⵉⵡⴻⴽⴽⴻⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ.

ⴷⴻⴼⴼⵉⵔ ⵎⴰ ⵉⴱⴻⴳⴳⴻⵏ-ⴷ ⵜⵉⵅⵓⵜⴻⵔⵜ ⵏ ⵓⵙⴻⵖⵏⴻⵡ ⵏ ⵡⴰⵙⵓⵏⴻⵏ ⵉⵎⴳⵓⵔⴰⵏⴻⵏ ⵉⵎⴰⵢⵏⵓⵜⴻⵏ ⴷⴻⴳ ⵇⵙⴻⵏⵟⵉⵏⴰ ⵉ ⵢⴻⵜⵜⵇⴰⴷⴰⵔⴻⵏ ⴰⴽⴽ ⵜⵉⵡⵜⵉⵍⵉⵏ ⵢⴻⵙⵙⴻⴼⴽⴻⵏ ⵉ ⵓⵊⴱⴰⴷ ⵏ ⵓⵙⴼⵓⴽⵜⵉ, ⴷ ⵡⵉⵏ ⵉ « ⵊⴻⴱⴷⴻⵏ ⵙ ⵓⴹⵎⴰⵏ ⵏ ⵓⵎⴻⵙⵜⴻⵏ ⴷ ⵓⵙⴻⴱⵖⴻⵙ », ⵢⵓⵍⴻⵙ ⵉⵡⴻⴽⴽⴻⴷ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴰⴽⴽⴻⵏ ⴰⵎⴹⴰⵏ ⵏ ⵢⵉⵙⴻⵏⴼⴰⵔⴻⵏ ⵏ ⵓⵙⴼⵓⴽⵜⵉ ⴷⴻⴳ ⴷⵣⴰⵢⴻⵔ ⵍⴰ ⵢⴻⵜⵜⵏⴻⵔⵏⵉ ⴷⵉⵎⴰ, ⵎⴰⵏⵉ ⵉ ⵍⵍⴰⵏ « ⵓⴳⴰⵔ ⵏ 17 ⵉⴳⵉⵎⴰⵏ ⵏ ⵢⵉⵙⴻⵏⴼⴰⵔⴻⵏ ⵏ ⵓⵙⴼⵓⴽⵜⵉ ⵖⴻⴼ ⵡⴻⵙⵡⵉⵔ ⵏ ⵜⵏⴻⴳⴳⴰ ⵜⴰⴷⵣⴰⵢⵔⵉⵜ ⵏ ⵓⵙⵎⴰⵍ ⵏ ⵓⵙⴼⵓⴽⵜⵉ ».

ⵢⵙⵙⴻⴳⵣⴰ-ⴷ ⴷⴰⴽⴽⴻⵏ ⴰⵙⴻⵃⴱⵉⴱⴻⵕ-ⵏⵏⴻⵙ ⵖⴻⴼ ⵡⴻⵔⵥⴰⵎ ⵏ ⵜⴻⵡⵡⵓⵔⵜ ⵉ ⵢⵉⴽⴻⵜⵜⵓⵔⴻⵏ ⵉⵍⴻⵎⵥⵉⵢⴻⵏ ⵙ ⵓⵙⵉⴼⵙⴻⵙ ⵏ ⵓⵙⴻⵖⵏⴻⵡ ⵏ ⵜⵙⵓⴷⴰ ⴷ ⵜⴻⵕⵎⵉⵙⵉⵏ ⵜⵉⵎⴰⵢⵏⵓⵜⵉⵏ, ⵉⵙⵡⵉ-ⵏⵏⴻⵙ ⴷ ⵜⵓⴽⵛⵉ ⵏ ⵜⵍⴻⵎⵎⵉⵥⵜ ⵉ ⵢⵉⵍⴻⵎⵥⵉⵢⴻⵏ ⴷ ⵜⵉⵙⵙⵓⴳⵔⵉⵡⵉⵏ ⵉ ⵓⵙⴼⵓⴽⵜⵉ ⴷⴻⴳ ⵡⴰⵍⵍⴻⵏ (ⴰⵍⵍⴰⵖⴻⵏ), ⵢⴻⵜⵜⵡⴰⵍⵉⵏ-ⵜⴻⵏ ⴷ « ⵜⴰⴱⴰⵖⵓⵔⵜ ⵜⴰⴷⴻⵜⵜⴰⵏⵜ ⵜⴰⴳⴻⵊⴷⴰⵏⵜ ⵏ ⵜⵎⵓⵔⵜ ».

ⵢⴻⴱⴷⴻⵔ-ⴷ ⴷⴰⴽⴽⴻⵏ ⴰⴽⴽ ⵉⵚⵓⴹⴰⴼ ⵏ ⵜⴻⴳⴷⵓⴷⴰ ⵜⵜⴰⵛⴻⴳⵔⴻⵏ ⵉⵍⵎⴻⵏⴷ ⵏ « ⵓⵙⵉⴼⵙⴻⵙ ⵏ ⵡⴰⵡⵡⴰⴹ ⵏ ⵢⵉⵍⴻⵎⵥⵉⵢⴻⵏ ⵖⴻⵔ ⵢⵉⵏⵙⴰⵜⴻⵏ ⵏ ⵓⵎⵙⴰⵍ ⵏ ⵢⴻⵖⵜⴰⵙⴻⵏ ⴷ ⵓⵙⴻⴱⵖⴻⵙ-ⵏⵙⴻⵏ ⵖⴻⴼ ⵓⵙⴻⵎⵔⴻⵙ ⵏ ⵜⵙⴻⵔⵜⵉⵜ ⴷ ⵓⵙⴻⴽⵎⴻⵎ ⵏ ⵜⴻⴽⵜⵉⵡⵉⵏ-ⵏⵙⴻⵏ ⵏ ⵓⵙⵏⵓⵍⴼⵓ, ⴰⵛⴽⵓ ⵜⴰⵎⵓⵔⵜ ⵜⴰⵜⵜⴰⵡⵎⵙⴰⵍ ⵙ ⵜⵓⵙⵙⵏⴰ ⵢⴻⵔⵏⵉ ⵉⵎⴰⵍ-ⵏⵏⴻⵙ ⵢⴻⵍⵍⴰ ⴳⴰⵔ ⵉⴳⴰⵙⵙⴻⵏ-ⵏⵙⴻⵏ ».

ⴷⴻⴳ ⵓⴽⴰⵜⴰⵔ-ⴰ, ⵉⵡⴻⴽⴽⴻⴷ-ⴷ ⵖⴻⴼ ⵜⵉⵅⵓⵜⴻⵔⵜ ⵏ ⵡⴰⵖⴰⴷ ⵏ ⵢⵉⴽⴻⵜⵜⵓⵔⴻⵏ ⵉⵍⴻⵎⵥⵉⵢⴻⵏ ⵖⴻⵔ ⵜⵖⵓⵍⴰ ⵏ ⵓⵙⵏⴻⴳⵎⵓ ⵏ ⵜⵓⵙⵙⵏⴰ ⴷ ⵜⵉⵖⵉⵙⵜ ⵜⴰⴳⴻⵎⴷⴰⵏⵜ, ⵢⴻⴱⴷⴻⵔ-ⴷ ⴷⴰⴽⴽⴻⵏ ⴷⵣⴰⵢⴻⵔ ⴷ ⵏⴻⵜⵜⴰⵜ ⵉ ⴷ ⵜⴰⵎⵓⵔⵜ ⵜⴰɛⵕⴰⴱⵜ ⴷ ⵜⴰⴼⵔⵉⵇⵜ ⵜⴰⵎⴻⵣⵡⴰⵔⵓⵜ ⵉ ⴷ-ⵢⴻⵙⵙⴻⵖⵏⵡⴻⵏ ⵜⴰⵙⴷⴰⵡⵉⵜ ⵏ ⵜⵉⵖⵉⵙⵜ ⵜⴰⴳⴻⵎⴷⴰⵏⵜ.

ⵢⴻⴱⴷⴻⵔ-ⴷ ⴷⴰⵖ ⴷⴰⴽⴽⴻⵏ ⴷⵣⴰⵢⴻⵔ ⴷ ⵏⴻⵜⵜⴰⵜ ⵉ ⴷ ⵜⴰⵎⵓⵔⵜ ⵜⴰⵢⵉⵡⵏⴰⵏⵜ ⴷⴻⴳ ⵜⴻⴼⵔⵉⵇⵜ ⴷ ⵓⵎⴰⴹⴰⵍ ⴰɛⵕⴰⴱ ⵉ ⵢⴻⵜⵜⴰⴽⴼⴻⵏ ⵉ ⵏ ⵜⵔⴻⴱⴱⴰⵡⵜ, ⴰⵎ ⵡⴰⴽⴽⴻⵏ ⵉ ⴷ-ⵉɛⵀⴻⵜⵜⴻⵜ ⵖⴻⴼ ⵓⵃⵔⴰⵣ ⴷ ⵓⵎⴻⵙⵜⴻⵏ ⵏ ⵜⴻⵍⵖⴰ ⵜⴰⵏⵎⴻⵜⵜⵉⵜ ⵏ ⵓⵡⴰⵏⴰⴽ.

ⴷⴻⴳ ⵜⵔⵉⵔⵉⵜ-ⵏⵏⴻⵙ ⵖⴻⴼ ⵜⵓⵜⵜⵔⵉⵡⵉⵏ ⵏ ⴽⵔⴰ ⵙⴻⴳ ⵢⵉⵎⴰⴷⵔⴰⵡⴻⵏ ⴷⴻⴳ ⵜⴻⵎⵍⵉⵍⵉⵜ-ⴰ, ⵉⵡⴻⴽⴽⴻⴷ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵎⵓⵜⴻⴳ ⵏ ⵓⵡⴰⵏⴰⴽ ⴰⴽⴽⴻⵏ ⴰⴷ ⵢⴻⵙⵙⵉⴷⵔⴻⵎ ⴽⵔⴰ ⵏ ⵜⴻⴷⵢⴰⵏⵜ ⵜⴰⵥⵓⵔⴰⵏⵜ ⵏⴻⵖ ⵜⴰⴷⴻⵍⵙⴰⵏⵜ ⵉ ⴷ-ⵢⴻⴱⴷⴰ ⵓⵎⵓⵙⵙⵓ ⴰⴷⴻⵍⵙⴰⵏ ⴷⴻⴳ ⵇⵙⴻⵏⵟⵉⵏⴰ, ⴳⴰⵔ-ⴰⵙⴻⵏⵜ ⴰⵙⵓⴷⴷⴻⵙ ⵏ ⵜⴼⴰⵙⴽⴰ ⵏ ⵜⴻⴳⵙⴰⵔⵓⵜ.

ⵉ ⵍⵎⴻⵏⴷ ⵏ ⵡⴰⵢⴰ, ⵢⴻⵙⵙⴽⴰⵏⴰⵢ-ⴷ ⵜⴰⴼⵍⴻⵙⵜ-ⵏⵏⴻⵙ ⵜⵓⵙⴱⵉⴹⵜ ⴷⴻⴳ ⵜⴰⵎⵍⵉⵍⵜ ⵜⴰⵅⴰⵜⴰⵔⵜ ⵉ ⵢⴻⵜⵜⵓⵔⴰⵔ ⵢⴻⴷⵍⴻⵙ, ⵖⴻⵔ ⵢⵉⴷⵉⵙ ⵏ ⵓⵙⵙⴻⴳⵎⵉ, ⴷⴻⴳ ⵓⵙⴻⵖⵏⴻⵡ ⴷ ⵓⵙⴻⴳⵎⵉ ⵏ ⵜⵙⵓⵜⵡⵉⵏ ⵉ ⴷ-ⵢⴻⴳⴳⵓⵔⴻⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵏⴻⴳⵎⵓ ⵏ ⵓⴳⵣⵓⵎ ⵏ ⵜⵎⴻⵔⵔⵉⵜ ⴷⴻⴳ ⵜⵡⵉⵍⴰⵢⵜ, ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷⴰⴽⴽⴻⵏ « ⵜⵓⵖⴷⴰⴹⵜ ⵏ ⵓⵡⴰⵏⴰⴽ ⴷ ⴰⵙⴻⵖⵢⴻⴷ ⵏ ⵓⴳⵣⵓⵎ-ⴰ ⴷ ⵜⵓⴷⴷⵎⴰ ⵏ ⵡⴰⴽⴰⵜⴻⵏ ⵏ ⵓⵙⴻⴱⵖⴻⵙ ⵉ ⵓⵊⴱⴰⴷ ⵏ ⵢⵉⵎⵙⴻⴼⵜⵉⵢⴻⵏ », ⴰⵎ ⵡⴰⴽⴽⴻⵏ ⵉ ⴷ-ⵉⴳⴻⵔ ⵜⵉⵖⵔⵉ ⵉ ⵓⴳⵣⵓⵎ ⵓⵙⵍⵉⴳ ⴰⴽⴽⴻⵏ ⴰⴷ ⵉⴼⴰⵕⴻⵙ ⵉⴽⴻⵜⵜⵓⵔⴻⵏ ⵉⵎⴻⵇⵔⴰⵏⴻⵏ ⵉ ⵢⴻⵍⵍⴰⵏ ⴷⴻⴳ ⵜⵡⵉⵍⴰⵢⵜ-ⴰ ⴰⴽⴽⴻⵏ ⴰⴷ ⵢⴻⵙⵙⴻⴹⵔⵓ ⵉⵙⴻⵏⴼⴰⵔⴻⵏ ⵉⵎⴻⵔⵔⴰⵏⴻⵏ ⵉ ⵢⵓⴽⵍⴰⵍⴻⵏ ⴰⵎⴻⵣⵔⵓⵢ-ⵏⵏⴻⵙ ⴰⵇⴱⵓⵔ.