ⵍⵣⵣⴰⵢⴻⵔ ⵜⴰⵎⴰⵏⴻⵯⵜ – ⵢⴻⵙⵙⴻⵍⵡⴰⵢ ⵓⵏⵖⵍⴰⴼ ⵏ ⵢⵉⵍⵎⴻⵣⵢⴻⵏ ⵉ ⵢⴻⵟⵟⴼⴻⵏ ⴰⵙⵇⴰⵎⵓ ⵓⵏⵏⵉⴳ ⵏ ⵢⵉⵍⵎⴻⵣⵢⴻⵏ, ⵎⴰⵙⵙ ⵎⵓⵚⵟⴰⴼⴰ ⵃⵉⴷⴰⵡⵉ, ⵢⴻⴷⴷⵓⴽⴽⴻⵍ ⴷ ⵓⵎⵙⴻⵍⵡⴰⵢ ⵏ ⵜⵏⴻⴱⴷⴰⴷⵜ ⵜⴰⵯⴻⵍⵏⴰⵡⵜ ⵜⴰⵎⴰⵏⴻⴼⵜ ⵏ ⵢⵉⴼⵔⴰⵏⴻⵏ ⵙ ⵡⴰⴷⴷⴰⵢ, ⵎⴰⵙⵙ ⴽⴰⵔⵉⵎ ⵅⴻⵍⴼⴰⵏ, ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵯⵜ, ⴰⵍⴷⴰⵢ ⵓⵏⵚⵉⴱ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⵉⵍⴻⵡ ⵉ ⵍⴼⴰⵢⴷⴰ ⵏ ⵢⵉⵎⴻⵙⵍⴻⵢⴻⵏ ⵏ ⵡⴰⵙⵇⴰⵎⵓ. ⴰⵙⴰⵔⴰⴳ-ⴰⴳⵉ ⵢⴻⵡⵡⵉ ⴰⵏⴰⵎⵓ: "ⵡⴰⵍⴰⵜⴻⵏ ⵏ ⵓⵄⴰⵙⵙ ⴷ ⵓⴹⴰⴼⴻⵔ ⵏ ⵍⴻⵇⴷⵉⵛⴻⵏ ⵏ ⵓⴼⵔⴰⵏ".
ⴰⵙⵉⵍⴻⵡ-ⴰⴳⵉ ⴰⵔⴰ ⵢⴻⵇⵇⵉⵎⴻⵏ ⵙⵉⵏ ⵓⵙⵙⴰⵏ, ⵢⴻⵔⵣⴰ ⵜⵥⴰ ⵜⵎⴻⵔⵡⵉⵏ (90) ⵏ ⵢⵉⵎⴻⵙⵍⴻⵢⴻⵏ ⵏ ⵡⴰⵙⵇⴰⵎⵓ ⵓⵏⵏⵉⴳ ⵏ ⵢⵉⵍⵎⴻⵣⵢⴻⵏ. ⵉⵙⵡⵉ-ⵙ ⴷ ⴰⵙⵊⴻⵀⴻⴷ ⵏ ⵜⵣⵎⴰⵔ ⵏ ⵢⵉⵍⵎⴻⵣⵢⴻⵏ ⵉ ⵡⴰⴽⴽⴻⵏ ⴰⴷ ⵇⴷⴻⵛⴻⵏ ⵙ ⵜⵎⵓⵙⵏⵉ ⵢⴻⵚⴼⴰⵏ ⴷⴻⴳ ⵡⵓⵙⵙⴰⵏ ⵏ ⵢⵉⴼⵔⴰⵏⴻⵏ ⵉⵖⴻⵍⵏⴰⵡⴻⵏ.
ⵎⴰⵙⵙ ⵃⵉⴷⴰⵡⵉ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ ⴰⵙⵉⵍⴻⵡ-ⴰⴳⵉ ⴷ ⴰⵎⵓⵔ ⵙⴻⴳ ⵢⵉⵡⴻⵏ ⵓⵣⵣⴻⵔⵣⴻⵔ ⴰⵯⴻⵍⵏⴰⵡ ⵉ ⵢⴻⵇⴱⴻⵍ ⵓⵡⴰⵏⴰⴽ ⴰⵣⵣⴰⵢⵔⵉ. ⴰⵢⴰ ⵢⴻⵜⵜⴻⴷⴷⵓ ⴷ ⵓⵡⴰⵀⵉⵍ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵉ ⵢⴻⴱⵯⴰⵏ ⴰⴷ ⵢⴻⵙⵙⴻⴽⵛⴻⵎ ⵢⵉⵍⵎⴻⵣⵢⴻⵏ ⴷⴻⴳ ⵓⴱⴻⵏⵏⵉ ⵏ ⵜⵖⵜⴻⵙⵜ ⴷ ⵓⵙⴻⴳⴳⴻⵎ ⵏ ⵜⵎⵉⵙⴰⵍ ⵏ ⵜⵎⵓⵔⵜ. ⵢⴻⵏⵏⴰ-ⴷ ⴷⴰⵯⴻⵏ ⴱⴻⵍⵍⵉ ⵉⵎⵉ ⵇⴻⵔⵔⴱⴻⵏ ⵢⵉⴼⵔⴰⵏⴻⵏ ⵏ ⵢⵉⵎⴱⴻⵇⵇⴰⵙ ⴷ ⵡⵉⴷ ⵏ ⵜⵖⵉⵡⴰⵏⵉⵏ, ⵢⴻⵍⵀⴰ ⴰⴷ ⵙⵄⵓⵏ ⵢⵉⵍⵎⴻⵣⵢⴻⵏ ⵜⵉⵎⵓⵙⵏⵉⵡⵉⵏ ⵉ ⵃⵡⴰⵊⴻⵏ ⵉ ⵡⴰⴽⴽⴻⵏ ⴰⴷ ⵇⴷⴻⵛⴻⵏ ⵙ ⵜⵎⴰⵙⵉⵜ.
ⵙⴻⴳ ⵍⵊⵉⵀⴰ ⵏⵏⵉⴹⴻⵏ, ⵎⴰⵙⵙ ⵅⴻⵍⴼⴰⵏ ⵢⴻⵏⵏⴰ-ⴷ ⴱⴻⵍⵍⵉ ⵜⴰⵙⵓⵜⵍⵜ-ⴰⴳⵉ ⵜⵓⵙⴰ-ⴷ ⵉ ⵓⴽⴻⵎⵎⴻⵍ ⵏ ⵍⴻⵇⴷⵉⵛ ⵉ ⵢⴻⴱⴷⴰⵏ ⴷⴻⴳ ⵡⴰⴳⴳⵓⵔ ⵏ ⵓⴽⵜⵓⴱⴻⵔ ⵢⴻⵣⵔⵉⵏ. ⴰⵡⴰⵀⵉⵍ ⵏ ⵓⵍⵎⵎⵓⴷ ⵢⴻⵔⵣⴰ ⵎⴰⵕⵕⴰ ⴰⴱⵔⵉⴷ ⵏ ⵓⴼⵔⴰⵏ, ⵙⴻⴳ ⵡⴰⵙⵎⵉ ⴰⵔⴰ ⵙⵙⴰⵡⵍⴻⵏ ⵉ ⵢⵉⵎⴼⵔⴻⵏ ⴰⵍⴰⵎⵎⴰ ⴷ ⵡⴰⵙⵙ ⵏ ⵓⵙⵓⴼⴼⴻⵯ ⵏ ⵢⵉⵙⴻⴽⵏⴻⵏ ⵉⵏⴻⴳⴳⵓⵔⴰ, ⵢⴻⵔⵏⴰ ⴰⴷ ⵙⵙⴻⴽⵏⴻⵏ ⵓⵍⴰ ⴷ ⴰⵎⴻⴽ ⵢⴻⵜⵜⵉⵍⵉ ⵓⴼⵔⴰⵏ ⵏ ⵢⵉⵣⵣⴰⵢⵔⵉⵢⴻⵏ ⴷⴻⴳ ⵜⵎⵓⵔⴰ ⵏ ⴱⴻⵔⵔⴰ.
ⵜⴰⴳⴳⴰⵔⴰ, ⵉⵙⵡⵉ ⵏ ⵓⵙⵉⵍⴻⵡ-ⴰⴳⵉ ⴷ ⴰⴼⴽⴰ ⵏ ⵡⴰⵍⴰⵜⴻⵏ ⵏ ⵍⵇⴰⵏⵓⵏ ⴷ ⵙⵙⵢⴰⵙⴰ ⵉ ⵢⵉⵍⵎⴻⵣⵢⴻⵏ. ⴰⴷ ⵜⴻⵏ-ⵙⵙⴻⵍⵎⴷⴻⵏ ⵢⵉⵎⵓⵙⵏⴰⵡⴻⵏ ⵏ ⵜⵏⴻⴱⴷⴰⴷⵜ ⵜⴰⵯⴻⵍⵏⴰⵡⵜ ⵏ ⵢⵉⴼⵔⴰⵏⴻⵏ, ⵢⵉⵙⴻⵍⵎⴰⴷⴻⵏ ⵏ ⵜⵙⴻⴷⴷⴰⵡⵉⵢⵉⵏ ⴷ ⵢⵉⵎⴻⵇⵇⵔⴰⵏⴻⵏ ⵏ ⵜⵏⴻⵯⵍⴰⴼⵜ ⵏ ⵜⵎⵙⴰⵍ ⵏ ⴱⴻⵔⵔⴰ, ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵙⵉⵍⴻⵡ ⵢⴻⵛⵛⵓⵔⴻⵏ ⵢⴻⵔⵏⴰ ⵢⴻⵊⵊⴻⵀⴷⴻⵏ.
ⴰⵔⵏⵓ ⵖⴻⵔ
