ⵉⵄⴰⵡⴻⴷ ⵉⵙⵔⴻⵚ ⵓⵏⴻⵖⵍⴰⴼ ⵏ ⵓⵡⴰⵏⴰⴽ, ⴰⵏⴻⵖⵍⴰⴼ ⵏ ⵜⴻⵎⵙⴰⵍ ⵏ ⴱⴻⵕⵕⴰ ⴷ ⵜⵓⴽⴽⵉⵙⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ ⴷ ⵜⴻⵎⵙⴰⵍ ⵏ ⵜⴻⴼⵔⵉⵇⵜ, ⵎⴰⵙⵙ ⴰⵃⵎⴻⴷ ⴰⵟⵟⴰⴼ, ⴰⵙⵙ-ⴰ ⵏ ⵍⵀⴻⴷ, ⵜⵓⵛⵛⵉⵜ ⵏ ⵍⴻⵣⵣⴰⵢⴻⵔ, ⵙ ⵜⵎⵓⵖⵍⵉ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵉ ⵓⵙⴻⴶⵀⴻⴷ ⵏ ⵓⵎⴰⵀⵉⵍ ⴰⴼⵔⵉⴽⴰⵏ ⴰⵎⴻⵣⴷⴰⵢ, ⵉⵎⵉ ⵢⵓⵎⴻⵏ ⴱⴻⵍⵍⵉ ⵜⴻⴼⵔⵉⵇⵜ ⴷ "ⵜⴰⵎⵏⴰⵟ ⵏ ⵢⵉⵎⴰⵍ ⴰⵎⴻⴳⴳⴰⵢ".
ⴰⵟⵟⴰⴼ ⵉⵙⵙⴻⴼⵀⴻⵎ-ⴷ, ⴷⴻⴳ ⵜⵎⴻⵙⵍⴰⵢⵜ-ⵉⵙ ⴷⴻⴳ ⵓⴱⵉⵕⵓ ⵏ ⵜⵏⴻⵖⵍⴰⴼⵜ, ⴱⴻⵍⵍⵉ ⴰⵙⵙ-ⴰⴳⵉ ⴷ ⵜⴰⵍⵍⵉⵜ ⵉⵡⴰⴽⴽⴻⵏ ⴰⴷ ⴷ-ⵏⴻⵙⵎⴻⴽⵜⵉ ⴰⵙⴻⵏⴼⴰⵔ ⴰⵙⴻⵔⵜⵉ, ⴰⵙⵔⴰⵜⵉⴷⵊⵉ ⴷ ⵡⵉⵏ ⵏ ⵜⵖⴻⵔⵎⴰ ⵉ ⵢⴻⵙⴷⵓⴽⴽⵍⴻⵏ ⵓ ⵉ ⵉⵜⴻⴷⴷⵓⵏ ⵉ ⵓⴷⵓⴽⴽⴻⵍ ⵏ ⵜⵎⵓⵔⴰ ⴷ ⵢⵉⴳⵓⵔⴻⴼ ⵏ ⵜⴻⴼⵔⵉⵇⵜ ⵙⴻⴳ ⵡⴰⵙⵎⵉ ⵉ ⵜⴻⵜⵜⵡⴰⵙⴱⴻⴷⴷ ⵜⵓⴷⴷⵙⴰ ⵏ ⵜⴷⵓⴽⵍⵉ ⵏ ⵜⴻⴼⵔⵉⵇⵜ (OUA). ⴰⵙⴻⵏⴼⴰⵔ-ⴰⴳⵉ ⵉⵕⴻⵙ ⵖⴻⴼ ⵓⵙⵍⴻⵍⵍⵉ, ⴰⵙⴱⴻⴷⴷⵉ ⵏ ⵢⵉⵡⵓⵏⴰⴽ ⵜⴰⵖⴻⵍⵏⴰⵡⵉⵏ ⴷ ⵓⵙⴻⴶⵀⴻⴷ ⵏ ⵡⴻⵎⴽⴰⵏ ⵏ ⵜⵎⴻⵏⵏⴰⵟ ⴰⵎ ⵓⵎⵛⴻⴷⴷⵉ ⵉⵕⴻⵙⵙⴰⵏ ⴷⴻⴳ ⵓⵎⴰⴹⴰⵍ.
ⵉⵙⵙⴻⴽⵏⴻⴷ ⴷⴻⴳ ⵓⵏⵏⴰⵔ-ⴰⴳⵉ ⴱⴻⵍⵍⵉ ⴰⵙⵎⴰⵢⵏⵓⵜ ⵏ ⵜⵙⴻⵔⵜⵉⵜ ⵜⴰⴼⵔⵉⴽⴰⵏⵜ ⵏ ⵍⴻⵣⵣⴰⵢⴻⵔ ⵉⴱⴰⵏ-ⴷ ⵙ ⵜⵉⴷⴷⵢ ⵉ ⴷ-ⵢⴻⴼⴽⴰ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉ ⵜⴷⵉⵒⵍⵓⵎⴰⵙⵉⵜ ⵜⴰⵣⵣⴰⵢⵔⵉⵜ ⴷⴻⴳ ⵓⵃⵔⵉⵛ-ⵉⵙ ⴰⴼⵔⵉⴽⴰⵏ. ⵉⵙⵙⴻⴼⵀⴻⵎ-ⴷ ⴱⴻⵍⵍⵉ ⵓⵎⴹⴰⵏ ⵏ ⵜⵎⴰⵙⵓⵏⵉⵏ ⵏ ⵍⴻⵣⵣⴰⵢⴻⵔ ⴷⴻⴳ ⵜⴻⴼⵔⵉⵇⵜ ⵢⵓⵍⵉ ⵙⴻⴳ 29 ⵖⴻⵔ 38, ⵙⴻⵍⴷ ⵓⵍⴷⴰⵢ ⵏ 9 ⵏ ⵜⵎⴰⵙⵓⵏⵉⵏ ⵜⵉⵎⴰⵢⵏⵓⵜⴻⵏ ⴷⴻⴳ ⵢⵉⵙⴻⴳⴳⴰⵙⴻⵏ-ⴰⴳⵉ ⵉⵏⴻⴳⴳⵓⵔⴰ.
ⵉⵙⵎⴻⴽⵜⵉ-ⴷ ⴷⴰⵖⴻⵏ ⴰⵙⵏⴻⴼⵍⵉ ⵏ ⵓⵣⴻⵟⵟⴰ ⵏ ⵜⵓⵇⵇⵏⴰ ⵏ ⵓⵙⴰⴼⴰⴳ ⵏ ⵜⵙⵏⵓⵔⴻⴼⵜ "Air Algérie" ⴷⴻⴳ ⵜⴻⴼⵔⵉⵇⵜ, ⴰⵏⵉⴷⴰ ⴰⵎⴹⴰⵏ ⵏ ⵢⵉⵎⴰⵍⴻⵏ (destinations) ⵢⵓⵍⵉ ⵙⴻⴳ 5 ⵖⴻⵔ 12 ⵏ ⵢⵉⵎⴰⵍⴻⵏ ⵜⵓⵔⴰ, ⵢⴻⵔⵏⴰ ⵙⵙⴰⵔⴰⵎⴻⵏ ⴰⴷ ⵢⴰⵡⴻⴹ 20 ⴷⴻⴳ ⵡⴰⴽⵓⴷ ⴰⵎⵉⵣⵢⴰⵏ. ⴷⴻⴳ ⵓⵏⵏⴰⵔ ⵏ ⵓⵙⴰⵜⵉⴳ ⵏ ⵢⵉⴳⴻⵔⵔⵔⵓⵊⴻⵏ ⵏ ⵜⴰⵍⵙⴰ, ⵍⴻⵣⵣⴰⵢⴻⵔ ⵜⴻⵔⵏⴰ ⴰⵎⵓⵔ-ⵉⵙ ⴷⴻⴳ ⵓⵙⵉⵍⴻⵖ ⵏ ⵢⵉⵍⴻⵎⵣⵢⴻⵏ ⵏ ⵜⴻⴼⵔⵉⵇⵜ ⵙ 8000 ⵏ ⵜⴰⵍⵍⴻⵍⵜ ⵏ ⵓⵍⵎⵓⴹ ⴷⴻⴳ ⵓⵙⴻⴳⴳⴰⵙ.
ⵖⴻⴼ ⵜⴰⵎⴰ ⵜⴰⴷⴰⵎⵙⴰⵏⵜ, ⴰⵏⴻⵖⵍⴰⴼ ⵉⵙⵙⴻⵃⵔⴻⵙ ⵖⴻⴼ ⵓⵜⴻⴽⴽⵉ ⵉⵕⴻⵙⵙⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵍⵎⴻⴶⵀⵓⴷⴰⵜ ⵏ ⵓⵙⵉⴷⵔⴻⵡ ⴰⴷⴰⵎⵙⴰⵏ (intégration économique), ⵍⴰⴷⵖⴰ ⵙ ⵢⵉⵙⴻⵏⴼⴰⵔⴻⵏ ⵉⵙⵔⴰⵜⵉⴷⵊⵉⵢⴻⵏ ⴰⵎ ⵓⴱⵔⵉⴷ ⵉⵣⴻⴳⵔⴻⵏ ⴰⵏⴻⵥⵔⵓⴼ, ⴰⵙⴻⵏⴼⴰⵔ ⵏ ⵓⵏⴱⵉ ⵏ ⵍⴳⴰⵣ ⵉⵣⴻⴳⵔⴻⵏ ⴰⵏⴻⵥⵔⵓⴼ, ⴷ ⵜⴻⵣⵔⴰⵡⵜ ⵏ ⵓⵙⵙⴻⵎⵖⴻⵔ ⵏ ⵓⵣⴻⵟⵟⴰ ⵏ ⵙⵙⴻⴽⴽⴰ ⵏ ⵓⵣⵣⴰⵍ ⵖⴻⵔ ⵜⵎⵓⵔⴰ ⵏ ⵙⴰⵀⴻⵍ.
ⴷⴻⴳ ⵓⵃⵔⵉⵛ ⴰⵙⴻⵔⵜⵉ ⴷ ⵡⵉⵏ ⵏ ⵜⵎⴰⵏⴻⴳⵜ, ⴰⵟⵟⴰⴼ ⵉⵄⴰⵡⴻⴷ ⵉⵙⵔⴻⵚ ⴱⴻⵍⵍⵉ ⵍⴻⵣⵣⴰⵢⴻⵔ ⵜⴻⵟⵟⴻⴼ ⴷⴻⴳ ⵍⵍⵙⴰⵙⴻⵏ ⵏ ⵓⵎⴰⵀⵉⵍ ⴰⴼⵔⵉⴽⴰⵏ ⴰⵎⴻⵣⴷⴰⵢ, ⴷⴻⴳ ⵓⵇⴻⵔⵔⵓ-ⵏⵙⴻⵏ ⴰⵣⵔⴻⴼ ⵏ ⵢⵉⴳⵓⵔⴻⴼ ⴷⴻⴳ ⵓⵙⴻⵏⵏⴻⴷ ⵏ ⵢⵉⵎⴰⵏ ⵓⵇⴰⴷⴻⵔ ⵏ ⵜⵉⵎⵓⵎⴻⵏⵜ ⵏ ⵜⵎⵓⵔⴰ ⴷ ⵓⵔ-ⵓⵏⵡⴰⵍ ⴷⴻⴳ ⵜⴻⵎⵙⴰⵍ-ⵏⵙⴻⵏⵜ ⵏ ⴷⴰⵅⴻⵍ.
ⵖⴻⴼ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ (ⵙⴰⵀⴰⵔⴰ ⵓⵛⵛⵉⴷⴻⵏⵜⴰⵍ), ⵉⵙⵙⴻⴼⵀⴻⵎ-ⴷ ⴱⴻⵍⵍⵉ ⵢⴰⴽⴽ ⴰⵢⴻⵏ ⵉ ⴷ-ⵉⴹⴻⵔⵔⵓⵏ ⵜⵓⵔⴰ ⵜⴻⵙⵙⴻⵏⴽⴰⴷ ⴰⵢⴻⵏ ⵉ ⵜⴻⵙⵙⵓⵜⵜⵓⵔ ⵍⴻⵣⵣⴰⵢⴻⵔ ⵙⴻⴳ 50 ⵏ ⵢⵉⵙⴻⴳⴳⴰⵙⴻⵏ: ⴰⴷ ⴷ-ⵉⵍⵍⵉⵏⵜ ⵜⵉⵎⴻⵏⵢⴰⵏⵉⵏ ⵜⵓⵙⵔⵉⴷⵉⵏ ⴳⴰⵔ ⵜⴳⴻⵍⴷⴰ ⵏ ⵍⵎⴻⵔⵔⵓⴽ ⴷ ⵊⵉⴱⵀⴰⵜ ⴻⵍ-ⵒⵓⵍⵉⵙⴰⵔⵉⵓ. ⵉⵙⵙⴻⴽⵏⴻⴷ ⴱⴻⵍⵍⵉ ⵍⴻⵣⵣⴰⵢⴻⵔ ⵜⴻⵙⵙⴰⵔⴰⵎ ⴰⴷ ⴷ-ⵢⵉⵍⵉ ⵓⴼⵔⵓⵔⴻⵢ ⵏ ⵓⵣⴻⵔⴼ ⵉ ⵓⵟⵎⴰⵏ ⵏ ⵓⵣⵔⴻⴼ ⵏ ⵓⵖⵔⴻⴼ ⴰⵚⴻⵃⵔⴰⵡⵉ ⴷⴻⴳ ⵓⵙⴻⵏⵏⴻⴷ ⵏ ⵢⵉⵎⴰⵏ ⵙ ⵓⵇⴰⴷⴻⵔ ⵏ ⵜⵏⴻⵖⵜⴰⵙⵉⵏ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.
ⴷⴻⴳ ⵜⴰⴳⴳⴰⵔⴰ, ⴰⵏⴻⵖⵍⴰⴼ ⵉⵙⵍⴻⵎ-ⴷ ⵙ ⵓⴼⵔⴰⵏ ⵏ ⵜⴷⵓⴽⵍⵉ ⵏ ⵜⴻⴼⵔⵉⵇⵜ ⵉ ⵜⴻⵎⵙⴰⵍⵜ ⵏ "ⵜⴰⵏⴰⵜⵉⵜ ⵏ ⵡⴰⵎⴰⵏ" ⴰⵎ ⴰⵙⴻⵏⵜⴻⵍ ⵉⵕⴻⵙⵙⴰⵏ ⵉ ⵓⵙⴻⴳⴳⴰⵙ 2026, ⵉⵡⴰⵍⴰ ⴱⴻⵍⵍⵉ ⵜⴰⵎⵙⴰⵍⵜ-ⴰⴳⵉ ⵉⵛⵓⴷⴷ ⵙ ⵍⴶⴻⵀⴷ ⵖⴻⵔ ⵍⴻⵀⵏⴰ, ⵜⴰⵎⴰⵏⴻⴳⵜ ⴷ ⵡⵓⵔⴰⴽⵓ ⴷⴻⴳ ⵜⴻⴼⵔⵉⵇⵜ ⴷ ⵓⵎⴰⴹⴰⵍ ⵎⴻⵕⵕⴰ.
ⴰⵔⵏⵓ ⵖⴻⵔ
