ⵉⵎⴰⵙⵓⵏⵏⴻⵏ ⵏ ⵜⴻⴼⵔⵉⵇⵜ ⵙⵏⴻⴽⴷⴻⵏ ⴷⴻⴳ ⵜⵉⵏⴷⵓⴼ ⵜⵉⴷⴷⵉ ⵉⴶⴻⵀⴷⴻⵏ ⵏ ⵢⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ ⴳⴰⵔ ⵍⴻⵣⵣⴰⵢⴻⵔ ⴷ ⵜⵎⵓⵔⴰ ⵏ ⵜⵎⴻⵏⵏⴰⵟ

ⵙⵏⴻⴽⴷⴻⵏ (ⵙⵍⵎⴻⵏ) ⵡⴰⵟⴰⵙ ⵏ ⵢⵉⵎⴰⵙⵓⵏⵏⴻⵏ ⵏ ⵜⵎⵓⵔⴰ ⵏ ⵜⴻⴼⵔⵉⵇⵜ ⵜⵉⴷⴷⵉ ⵉⴶⴻⵀⴷⴻⵏ ⵉ ⵥⵔⴰⵏ ⵢⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ ⴳⴰⵔ ⵍⴻⵣⵣⴰⵢⴻر ⴷ ⵜⵎⵓⵔⴰ ⵏ ⵜⴻⴼⵔⵉⵇⵜ. ⴰⵢⴰⴳⵉ ⵢⵓⵙⴰ-ⴷ ⵙ ⵍⴻⴱⵖⵉ ⴰⵙⴻⵔⵜⵉ ⴷ ⵜⵎⵓⵖⵍⵉ ⵜⴰⵙⵔⴰⵜⵉⴷⵊⵉⵜ ⵉ ⵓⵙⵙⴻⵎⵓⵣⵣⴻⴳ ⵏ ⵜⴷⴰⵎⵙⴰ ⴷ ⵓⵙⴻⴶⵀⴻⴷ ⵏ ⵓⵎⵢⴻⵛⵛⴻⵔ ⵓⴼⴼⵉⵔ ⵏ ⵢⵉⵎⴻⵔⵢⴰⵏ.

ⵉⵙⵙⴻⴼⵀⴻⵎ-ⴷ ⵢⵉⵎⴰⵙⵓⵏⵏⴻⵏ-ⴰⴳⵉ, ⴷⴻⴳ ⵔⵔⵉⴼ ⵏ ⵓⵙⴰⵢⴻⵙ ⵏ ⵢⵉⵎⴻⵥⵍⴰ ⴷ ⵢⵉⴼⴰⵔⴰⵙⴻⵏ ⵏ ⵍⴻⵣⵣⴰⵢⴻⵔ ⵉ ⵓⵙⵓⴼⴼⴻⵖ ⵉ ⵉⵜⴻⴷⴷⵓⵏ ⴷⴻⴳ ⵜⵉⵏⴷⵓⴼ, ⴱⴻⵍⵍⵉ ⵜⵉⴳⴳⴰⵜⵉⵏ ⵉ ⴷ-ⵜⴻⵙⵙⴻⵔⵔⴻⵙ ⵍⴻⵣⵣⴰⵢⴻⵔ, ⵍⴰⴷⵖⴰ ⵙ ⵓⵙⵓⴷⴷⴻⵙ ⵏ ⵢⵉⵙⴰⵢⴻⵙⴻⵏ ⵉⴷⴰⵎⵙⴰⵏⴻⵏ ⴷ ⵓⵙⵏⴻⵔⵏⵉ ⵏ ⵜⴻⵎⵍⵉⵍⵉⵢⵉⵏ ⵏ ⵙⵉⵏ, ⵄⴰⵡⵏⴻⵏⵜ ⴷⴻⴳ ⵓⵍⴷⴰⵢ ⵏ ⵜⵎⵓⵖⵍⵉⵡⵉⵏ ⵜⵉⵎⴰⵢⵏⵓⵜⴻⵏ ⵉ ⵢⵉⵎⵉⴳⴰⵡⴻⵏ ⵉⴷⴰⵎⵙⴰⵏⴻⵏ ⵓ ⵙⴶⴻⵀⴷⴻⵏⵜ ⵜⵉⵍⵉⵜ ⵏ ⵢⵉⴼⴰⵔⴰⵙⴻⵏ ⵍⴻⵣⵣⴰⵢⵔⵉⵢⴻⵏ ⴷⴻⴳ ⵉⴳⴻⴷⴻⵣⴻⵏ ⵏ ⵜⴻⴼⵔⵉⵇⵜ, ⵍⴰⴷⵖⴰ ⴷⴻⴳ ⵓⵜⵔⴰⵎ ⵏ ⵜⵎⴻⵏⵏⴰⵟ.

ⵉⵙⵔⴻⵚ-ⴷ ⵓⵎⴰⵙⵓⵏ ⵏ ⵜⴻⴳⴷⵓⴷⴰ ⵜⵉⵏⴻⵙⵍⴻⵎⵜ ⵏ ⵎⵓⵔⵉⵟⴰⵏⵢⴰ ⴷⴻⴳ ⵍⴻⵣⵣⴰⵢⴻⵔ, ⵎⴰⵙⵙ ⵙⵉⴷⵉ ⵎⵓⵀⴰⵎⴻⴷ ⴰⴱⴷⴻⵍⵍⴰⵀ, ⴱⴻⵍⵍⵉ ⵜⴰⵎⴷⵉⵏⵜ ⵏ ⵜⵉⵏⴷⵓⴼ ⵜⵓⵖⴰⵍ ⴷ ⵜⴰⵡⵡⵓⵔⵜ ⵜⴰⵙⵔⴰⵜⵉⴷⵊⵉⵜ ⵏ ⵍⴻⵣⵣⴰⵢⴻⵔ ⵖⴻⵔ ⵉⴳⴻⴷⴻⵣⴻⵏ ⵏ ⵜⴻⴼⵔⵉⵇⵜ ⵏ ⵓⵜⵔⴰⵎ. ⵉⵙⵍⴻⵎ-ⴷ ⵙ ⵓⵎⴰⵀⵉⵍ ⵏ ⵓⵙⴰⵢⴻⵙ ⵏ ⵢⵉⴼⴰⵔⴰⵙⴻⵏ ⵏ ⵓⵙⵓⴼⴼⴻⵖ ⵉ ⵓⵙⴰⵍⵉ ⵏ ⵢⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ ⴳⴰⵔ ⵍⴻⵣⵣⴰⵢⴻⵔ ⴷ ⵎⵓⵔⵉⵟⴰⵏⵢⴰ, ⵉⵙⵙⴻⴽⵏⴻⴷ ⴱⴻⵍⵍⵉ ⵜⴰⴳⵏⵉⵜ-ⴰⴳⵉ ⵜⴰⴷⴰⵎⵙⴰⵏⵜ ⵜⴻⵙⵙⴰⵡⴻⴹ ⴰⵙⴰⵍⴰⵏ ⵏ ⵓⴼⴰⵔⵉⵙ ⴰⵣⵣⴰⵢⵔⵉ ⵖⴻⵔ ⵉⴳⴻⴷⴻⵣⴻⵏ ⵉ ⴷⴻⴳ ⵍⵍⴰⵏ ⵓⴳⴰⵔ ⵏ 150 ⵏ ⵢⵉⵎⴻⵍⵢⴰⵢⴻⵏ ⵏ ⵢⵉⵎⵓⵙⴻⴼⴼⴻⵇⴻⵏ.

ⵢⴻⵔⵏⴰ-ⴷ ⵓⵎⴻⵙⵍⴰⵢ ⴱⴻⵍⵍⵉ ⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ ⴳⴰⵔ ⵍⴻⵣⵣⴰⵢⴻⵔ ⴷ ⵎⵓⵔⵉⵟⴰⵏⵢⴰ ⵓⵡⵢⴻⵏ ⴰⵣⴰⵍ ⵏ 500 ⵏ ⵢⵉⵎⴻⵍⵢⴰⵢⴻⵏ ⵏ ⵢⵉⴷⵓⵍⴰⵕⴻⵏ, ⵓ ⵙⵙⴰⵔⴰⵎⴻⵏ ⴰⴷ ⵙⵙⴰⵍⵉⵏ ⵓⴳⴰⵔ ⵙⴻⵍⴷ ⵎⵉ ⴰⴷ ⵢⴻⴼⴽⴻⵔ ⵓⴱⵔⵉⴷ ⵏ ⵍⵇⴰⵄⴰ ⵉ ⵢⴻⵙⴷⵓⴽⴽⵓⵍⴻⵏ ⵜⵉⵏⴷⵓⴼ ⴷ ⵣⵡⵉⵔⴰⵜ. ⴰⵎⴰⵙⵓⵏ ⵉⵙⵎⴻⴽⵜⵉ-ⴷ ⴱⴻⵍⵍⵉ ⴰⴼⴰⵔⵉⵙ ⴰⵣⵣⴰⵢⵔⵉ ⵉⵟⵟⵡⴰⵇⴱⴻⵍ ⵙ ⵍⴶⴻⵀⴷ ⴷⴻⴳ ⵓⴳⴻⴷⴻⵣ ⵏ ⵎⵓⵔⵉⵟⴰⵏⵢⴰ, ⵙⵢⵉⵏⵏⴰ ⵉⵟⵟⵡⴰⵏⴻⵎⵉⵍ ⵖⴻⵔ ⵜⵎⵓⵔⴰ ⵏ ⵜⴻⴼⵔⵉⵇⵜ ⵏ ⵓⵜⵔⴰⵎ.

ⵙⴻⴳ ⵜⴰⵎⴰ-ⵙ, ⴰⵎⴰⵙⵓⵏ ⵏ ⵜⴻⴳⴷⵓⴷⴰ ⵏ ⵙⵉⵏⵉⴳⴰⵍ ⵉⵙⵙⴻⴽⵏⴻⴷ ⴱⴻⵍⵍⵉ ⴰⵙⴱⴻⴷⴷⵉ ⵏ ⵍⴱⴰⵏⴽⴰ ⵜⴰⵣⵣⴰⵢⵔⵉⵜ-ⵜⴰⵙⵉⵏⵉⴳⴰⵍⵜ ⴷ ⴰⵣⴰⵎⵓⵍ ⵏ ⵍⵎⴻⴶⵀⵓⴷⴰⵜ ⵉ ⵓⴼⵙⵉⵙ ⵏ ⵓⵙⵙⴻⵜⵎⴻⵔ ⴷ ⵢⵉⵎⵓⴱⴱⴰⴷⴷⴻⵍⴻⵏ ⵏ ⵜⵏⴻⵣⵣⵓⵜ. ⵉⵙⵙⴻⵃⵔⴻⵙ ⵖⴻⴼ ⵡⴰⵣⴰⵍ ⵏ ⵓⵙⴻⴶⵀⴻⴷ ⵏ ⵓⵎⵢⴻⵛⵛⴻⵔ-ⴰⴳⵉ ⴷⴻⴳ ⵓⵣⴻⵏⵣⵉⵖ ⵏ ⵜⴻⵎⵏⴰⵟ ⵏ ⵜⵏⴻⵣⵣⵓⵜ ⵜⵉⵍⴻⵍⵍⵉⵜ ⵏ ⵜⴻⴼⵔⵉⵇⵜ (ⵥⵍⴻⵛⴰⴼ).

ⴰⵎⴰⵙⵓⵏ ⵏ ⵙⵉⵔⴰ ⵍⵢⵓⵏ ⴷ ⵓⵎⵙⴻⴳⵍⴰⵡⴰⵢ ⴰⵎⴻⵏⵣⵡⴰⵔⵓ ⵏ ⵜⴰⵎⴰⵙⵓⵏⵜ ⵏ ⴳⵉⵏⵢⴰ, ⵙⵏⴻⴽⴷⴻⵏ ⴷⴰⵖⴻⵏ ⴰⵣⴰⵍ ⵏ ⵓⵙⵉⴷⵔⴻⵡ ⴰⴷⴰⵎⵙⴰⵏ ⵏ ⵜⵎⴻⵏⵏⴰⵟ ⴷ ⵓⵙⴻⵎⵔⴻⵙ ⵓⴼⵔⵉⵏ ⵏ ⵢⵉⵙⴰⴼⴰⵔⴻⵏ ⵉⵕⴻⵙⵙⴰⵏⴻⵏ ⵉ ⵙⵄⴰ ⵓⵎⴰⴹⴰⵍ ⵏ ⵜⴻⴼⵔⵉⵇⵜ.

ⵉⵡⴰⴽⴽⴻⵏ ⴰⴷ ⵏⵣⴻⵔ, ⵉⵎⴰⵀⵉⵍⴻⵏ ⵏ ⵓⵙⴰⵢⴻⵙ-ⴰⴳⵉ ⴷⴷⵓⵏ ⵙ ⵓⵣⴻⵏⵣⵉⵖ "ⵜⵉⵏⴷⵓⴼ ⴷ ⵜⴰⵡⵡⵓⵔⵜ ⵏ ⵓⵙⵓⴼⴼⴻⵖ ⵖⴻⵔ ⵜⵎⵓⵔⴰ ⵏ ⵜⴻⴼⵔⵉⵇⵜ ⵏ ⵓⵜⵔⴰⵎ", ⵙ ⵓⵜⴻⴽⴽⵉ ⵏ 104 ⵏ ⵜⵎⵓⵙⵏⵉⵡⵉⵏ ⵏ ⵓⴼⴰⵔⵉⵙ ⴷ ⵢⵉⵎⴻⵥⵍⴰ, ⴷ 45 ⵏ ⵜⵎⵓⵙⵏⵉⵡⵉⵏ ⵏ ⵓⴼⵓⵙ, ⵉⵡⴰⴽⴽⴻⵏ ⴰⴷ ⴷ-ⵙⴱⴰⵏⴻⵏ ⵜⵉⵣⴻⵎⵎⴰⵔ ⵜⴰⵖⴻⵍⵏⴰⵡⵉⵏ ⴷ ⵓⵙⴻⵏⵎⴻⵔ ⵏ ⵓⴼⴰⵔⵉⵙ ⴰⵣⵣⴰⵢⵔⵉ ⵙ ⵢⴰⴽⴽ ⴰⵏⴰⵡⴻⵏ-ⵉⵙ.