ⵢⴻⵛⴽⴻⵔ ⵓⵏⴻⴼⴼⵓⵙ ⴰⵎⴰⵜⵓ ⵏ ⵜⴻⴷⴷⵓⴽⵍⴰ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⵣⵣⴰⵢⵔⵉⵢⴻⵏ (UGTA), ⵄⴰⵎⴰⵔ ⵜⴰⵇⴶⵓⵜ, ⴰⵙⵙ-ⴰ ⵏ ⵍⴻⵜⵏⴰⵢⴻⵏ, ⴰⵢⴻⵏ ⵉ ⴷ-ⵜⴻⵡⵡⵉ ⵍⴻⵣⵣⴰⵢⴻⵔ ⴷⴻⴳ ⵢⵉⵙⴻⴳⴳⴰⵙⴻⵏ ⵉⵏⴻⴳⴳⵓⵔⴰ ⴷⴻⴳ ⵓⵃⵔⵉⵛ ⵓⵎⴻⵜⵜⵉ ⴷ ⵓⴷⴰⵎⵙⴰⵏ. ⴰⵢⴰ ⵢⴻⵙⴽⴰⵏ-ⵢⵉⴷ "ⵜⴰⵎⵓⵖⵍⵉ ⵢⴻⴼⵔⴻⵣⵏ ⵉ ⵓⵙⵏⴻⵔⵏⵉ ⵏ ⵜⵎⵓⵔⵜ ⴷ ⵓⵃⴰⴷⴻⵔ ⵏ ⵜⵉⵣⵎⴻⵔⵜ ⵏ ⵜⵓⵖⵉⵏ (pouvoir d'achat) ⵏ ⵢⵉⵖⴻⵔⵎⴰⵏⴻⵏ".
ⵢⴻⵏⵏⴰ-ⴷ ⵜⴰⵇⴶⵓⵜ, ⴷⴻⴳ ⵢⵉⵡⴻⵏ ⵓⴳⵔⴰⵡ ⴷⴻⴳ ⵓⵎⵔⴰⵢ ⵏ ⵓⵖⵎⵉⵙ "El Moudjahid", ⵓⵇⴱⴻⵍ ⴰⵙⴼⵓⴶⴻⵍ ⵏ ⵓⵎⴻⴽⵜⴰⵢ ⴰⴼⴻⵔⵔⴰⵏ ⵏ ⵓⵙⵏⵓⵍⴼⵓ ⵏ ⵜⴻⴷⴷⵓⴽⵍⴰ ⴷ ⵓⵙⵙⴻⵖⵔⴻⴷ ⵏ ⵢⵉⵎⵔⵓⴶⴻⵏ (24 ⴼⵓⵔⴰⵔ), ⴱⴻⵍⵍⵉ "ⵍⵍⴰⵏⵜ ⵍⴼⴰⵢⴷⴰⵜ ⵜⵉⵎⵓⵇⵔⴰⵏⵉⵏ ⵉ ⴷ-ⵢⴻⵍⵍⴰⵏ ⴷⴻⴳ ⵢⵉⵙⴻⴳⴳⴰⵙⴻⵏ ⵉⵏⴻⴳⴳⵓⵔⴰ, ⴰⵎ ⵓⵙⵉⵍⵉ ⵏ ⵍⴻⵅⵍⴰⵚ, ⵍⴻⵅⵍⴰⵚ ⵏ ⵔⵔⴰⵃⴰ (retraites), ⴷ ⵜⴰⵍⵍⴻⵍⵜ ⵏ ⵍⴱⴰⵟⴰⵍ, ⵢⴻⵔⵏⴰ ⴷ ⵢⵉⵙⴻⵏⴼⴰⵔⴻⵏ ⵏ ⵜⵙⵜⵔⴰⵜⵉⵜ ⵉⵎⵓⵇⵔⴰⵏⴻⵏ ⵏ ⵍⴱⴻⵏⵢⴰ ⴷ ⵢⵉⵎⴰⴹⴻⵏ ".
ⵢⴻⵏⵏⴰ-ⴷ ⴱⴻⵍⵍⵉ ⴰⴽⴽ ⴰⵢⴻⵏ ⵉ ⴷ-ⵢⴻⵍⵍⴰⵏ ⵢⴻⵙⴽⴰⵏ-ⵢⵉⴷ "ⵜⴰⵎⵓⵖⵍⵉ ⵉⵡⴰⴽⴽⴻⵏ ⴰⴷ ⵜⴻⴶⵀⴻⴷ ⵜⴰⴷⴰⵎⵙⴰ ⵏ ⵜⵎⵓⵔⵜ ⵢⴻⵔⵏⴰ ⴰⴷ ⵢⴻⵜⵜⵡⴰⵃⴰⴷⴻⵔ ⵓⵖⴻⵔⵎⴰⵏ", ⵢⴻⵙⵙⴻⴷⵀⴻⵔ-ⴷ ⴷⴰⵖⴻⵏ ⴱⴻⵍⵍⵉ ⵢⴻⵙⵙⴻⴼⴽ ⴰⴷ ⵏⵃⴰⴷⴻⵔ ⵖⴻⴼ ⵡⴰⵢⴻⵏ ⴰⴽⴽ ⵉ ⴷ-ⵏⴻⵡⵡⵉ.
ⵎⴰⵙⵙ ⵜⴰⵇⴶⵓⵜ ⵢⴻⵙⵙⴰⵡⴻⵍ ⴷⴰⵖⴻⵏ ⵖⴻⴼ ⵡⴰⵣⴰⵍ ⵏ ⵓⴷⴷⵉⵡⴻⵏ ⴰⵎⴻⵜⵜⵉ (dialogue social) ⵉ ⵢⴻⵍⵍⴰⵏ ⴷ "ⵍⵙⴰⵙ ⵏ ⵓⵙⵜⴻⵇⴻⵔ ⴷ ⵍⵀⴻⵏⵏⴰ", ⵉⵎⵉ ⴷ ⴰⴱⵔⵉⴷ ⵉ ⵓⵙⵎⴻⵇⵔⴻⴱ ⵏ ⵜⵎⵓⵖⵍⵉⵡⵉⵏ ⴷ ⵓⴼⴰⵢ ⵏ ⵜⵉⴼⵔⴰⵜ ⵉ ⵢⴻⵄⵏⴰⵏ ⴰⴽⴽ ⵢⵉⵅⴻⴷⴷⴰⵎⴻⵏ ⴷ ⵓⵀⴻⴳⴳⵉ ⵏ ⵜⵎⵓⵔⵜ.
ⴷⴻⴳ ⵢⵉⵡⴻⵏ ⵓⵃⵔⵉⵛ ⵏⵏⵉⴹⴻⵏ, ⵢⴻⴱⴷⴻⵔ-ⴷ ⵉⴱⴻⴷⴷⵉⵍⴻⵏ ⵉ ⵢⴻⵄⵏⴰⵏ ⵜⴰⵎⵓⴷⴷⵓⵙⵜ ⵏ ⵜⴻⴷⴷⵓⴽⵍⴰ ⴷ ⵓⵙⵎⴻⵙⴰⵙⴰ ⵏ ⵓⵅⴻⴷⴷⵉⵎ ⴰⵏⴻⵇⵇⴰⴱⵉ ⴷ ⵍⵇⴰⵏⵓⵏ ⴰⵎⴰⵢⵏⵓ, ⵢⴻⵏⵏⴰ-ⴷ ⴱⴻⵍⵍⵉ "ⴰⵢⴰ ⵎⴰⵣⴰⵍ-ⵉⵜ ⴷⴻⴳ ⵓⵎⵙⵉⵡⴻⵍ ⴷ ⵓⵣⵔⴰⵄ".
ⴷⴻⴳ ⵓⵎⴻⴽⵜⴰⵢ ⵡⵉⵙ ⵙⴻⴱⵄⵉⵏ (70) ⵏ ⵓⵙⵏⵓⵍⴼⵓ ⵏ ⵜⴻⴷⴷⵓⴽⵍⴰ ⵜⴰⵎⴰⵜⵓⵜ ⵏ ⵢⵉⴶⴻⴷⴷⴰⵎⴻⵏ ⵉⵣⵣⴰⵢⵔⵉⵢⴻⵏ, ⵜⴰⵇⴶⵓⵜ ⵢⴻⵙⵎⴻⴽⵜⵉ-ⴷ ⴱⴻⵍⵍⵉ ⵜⴰⵎⵓⴷⴷⵓⵙⵜ-ⴰ ⵜⴻⴷⴷⴰ-ⴷ ⴷ ⵢⵉⵅⴻⴷⴷⴰⵎⴻⵏ ⴷⴻⴳ ⵢⴰⵍ ⵜⴰⵍⵍⵉⵜ ⵢⴻⵔⵏⴰ ⵜⵃⵓⴷⴻⵔ ⵖⴻⴼ ⵍⴼⴰⵢⴷⴰ-ⵏⵙⴻⵏ.
ⴰⵔⵏⵓ ⵖⴻⵔ
