ⵢⴻⵙⵙⴻⴱⴳⴻⵏ-ⴷ ⵓⵏⴻⵎⵀⴰⵍ ⴰⵎⴻⵙⵖⴰⵔ ⵏ ⵜⴻⵙⵇⴰⵎⵓⵜ ⵜⴰⴼⵔⵉⵇⵉⵜ ⵏ ⵜⴻⵣⵎⴻⵔⵜ "ⴰⴼⵔⴻⵛ" ⵔⴰⵛⵉⴷ ⵄⵍⵉ ⵄⴻⴱⴷⴻⵍⵍⴰⵃ, ⵜⴰⵣⵎⴻⵔⵜ ⵏ ⵍⴻⵣⵣⴰⵢⴻⵔ ⵉⵡⴰⴽⴽⴻⵏ ⴰⴷ ⵜⵜⴻⴽⴽⵉ ⴷⴻⴳ ⵜⵖⴻⵍⵍⵉⵙⵜ ⵏ ⵜⴻⵣⵎⴻⵔⵜ ⵏ ⵓⵎⴻⵏⵣⴰⵡ ⵙ ⵙⵙⴻⴱⴱⴰ ⵏ ⵜⴻⵔⵎⵉⵜ-ⵉⵙ ⵡⴻⵙⵙⵉⵄⴻⵏ ⴷⴻⴳ ⵓⵏⵏⴰⵔ ⵏ ⵢⵉⵎⵔⵓⵔⵖⴻⵏ, ⴰⴽⴽⴻⴷ ⵡⴰⵀⵉⵍⴻⵏ-ⵉⵙ ⵉⵎⴻⵇⵇⵔⴰⵏⴻⵏ ⴷⴻⴳ ⵓⵏⵏⴰⵔ ⵏ ⵜⴻⵣⵎⴻⵔⵜ ⵢⴻⵜⵜⵡⴰⵊⵊⴷⴰⴷⴻⵏ, ⵔⵏⵓ ⵖⴻⴼ ⵡⴰⵢⴰ ⴰⵎⴽⴰⵏ-ⵉⵙ ⴰⵙⵜⵔⴰⵜⵉⵊⵉ ⴰⵎⴻⵇⵇⵔⴰⵏ.
ⵢⴻⵙⵙⴻⴳⵣⴰ-ⴷ ⵓⵎⴰⵙⴰⵢ-ⴰ ⴷⴻⴳ ⵡⴰⵡⴰⵍ ⵉ ⴷ-ⵢⴻⴼⴽⴰ ⴷⴻⴳ ⵡⴻⵎⴽⴰⵏ-ⵉⵙ ⵓⵙⴻⵍⵡⴰⵢ ⵏ ⵓⵃⵔⵉⵛ ⵏ ⵢⵉⵏⴰⴳⵔⴰⵡⴻⵏ ⵏ ⵢⵉⵙⴰⵍⵍⴻⵏ ⵏ ⵜⴻⵣⵎⴻⵔⵜ ⴷ ⵜⵙⵉⴹⵏⵉⵏ ⴷⴻⴳ ⵜⴻⵙⵇⴰⵎⵓⵜ-ⴰ, ⵙⴰⵎⵙⵓⵏ ⵏⵓⵖⴱⵓⴷⵓⵀⵡⵉ, ⵖⴻⴼ ⵜⴻⴳⵏⵉⵜ ⵏ ⵢⵉⵎⴻⵏⵙⵉ ⵏ ⵍⴻⴼⴹⵓⵔ ⵉ ⴷ-ⵢⴻⵙⵙⵓⴷⴷⴻⵙ, ⵉⴹⴻⵍⵍⵉ ⵏ ⵙⵙⴻⴱⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⵖⴰⵢⵜ, ⵡⴰⵎⵎⴰⵙ ⴰⵄⵔⴰⴱ-ⴰⴼⵛⵔⵉⵇ ⵉ ⵓⵙⴽⴰⵙⵉ ⴷ ⵓⵙⵏⴻⵔⵏⵉ, ⵙ ⴷⴷⴰⵡ ⵏ ⵢⵉⵙⵡⵉⵢⴻⵏ "ⵜⵉⵣⵎⴻⵔⵜ ⴷ ⵡⴰⵎⴰⵏ ⵉ ⵍⴻⴱⵏⵉ ⵏ ⵜⴻⵏⵎⵉⵡⵜ", ⴷ ⴰⴽⴽⴻⵏ "ⵍⴻⵣⵣⴰⵢⴻⵔ ⵜⴻⵟⵟⴻⴼ ⴰⵎⴽⴰⵏ ⴰⵙⵜⵔⴰⵜⵉⵊⵉ ⴷⴻⴳ ⵜⴻⵊⵏⵉⵢⵓⵔⵜ ⵏ ⵜⴻⵣⵎⴻⵔⵜ ⵏ ⵜⴻⴼⵔⵉⵇⵜ", ⵢⴻⵔⵏⴰ-ⴷ ⴷ ⴰⴽⴽⴻⵏ "ⵙ ⵙⵙⴻⴱⴱⴰ ⵏ ⵜⴻⵔⵎⵉⵜ-ⵉⵙ ⴷⴻⴳ ⵓⵏⵏⴰⵔ ⵏ ⵢⵉⵎⵔⵓⵔⵖⴻⵏ, ⵉⵙⵡⵉⵢⴻⵏ-ⵉⵙ ⵢⴻⵜⵜⵏⴻⵔⵏⵉⵏ ⴷⴻⴳ ⵜⵉⵥⵎⴰⵔ ⵢⴻⵜⵜⵡⴰⵊⵊⴷⴰⴷⴻⵏ, ⴷ ⵡⴻⵎⴽⴰⵏ-ⵉⵙ ⴰⵔⴰⴽⴰⵍ ⵉ ⴷ-ⵢⴻⵇⵇⵏⴻⵏ ⴳⴰⵔ ⵜⴻⴼⵔⵉⵇⵜ, ⵜⵓⵕⵓⴼⵜ ⴷ ⵢⵉⵍⴻⵍ ⴰⴳⵔⴰⴽⴰⵍ, ⵜⴻⵙⵄⴰ ⵜⴰⵣⵎⴻⵔⵜ ⵉⵡⴰⴽⴽⴻⵏ ⴰⴷ ⵜⵜⴻⴽⴽⵉ ⴷⴻⴳ ⵍⴰⵎⴰⵏ ⵏ ⵜⴻⵣⵎⴻⵔⵜ ⵏ ⵓⵎⴻⵏⵣⴰⵡ ⴷ ⵓⵙⴻⴵⵀⴻⴷ ⵏ ⵓⴽⵎⵉⵍⵉ".
ⵙⴻⵍⴷ ⵎⵉ ⴷ-ⵉⵡⴻⵀⵀⴰ ⵖⴻⵔ ⵜⴻⵔⵎⵉⵜ ⵏ ⵍⴻⵣⵣⴰⵢⴻⵔ ⴷⴻⴳ ⵓⵏⵏⴰⵔ ⵏ ⵜⴻⵣⵎⴻⵔⵜ, ⵉ ⴰⵙ-ⵢⴻⴼⴽⴰⵏ ⵜⴰⵣⵎⴻⵔⵜ ⴰⴷ ⵜⴰⵡⴻⴹ ⵖⴻⵔ ⵜⴰⵎⵉⵡⵉⵏ ⵏ ⵓⵖⵓⵎⵎⵓ ⵜⵉⵎⴻⵇⵇⵔⴰⵏⵉⵏ, ⵍⴰⴷⵖⴰ ⴷⴻⴳ ⵓⵏⵏⴰⵔ ⵏ ⵜⴻⵣⵎⴻⵔⵜ ⵏ ⵜⵔⵉⵙⵉⵜⵉ, ⵢⴻⵙⵙⴻⴱⴳⴻⵏ-ⴷ ⵓⵏⴻⵎⵀⴰⵍ ⴰⵎⴻⵙⵖⴰⵔ ⴰⵣⴰⵍ ⵏ ⵔⵔⴰⵢ ⵏ ⵓⵙⵖⴻⵍ ⵏ ⵢⵉⵎⵔⵓⵔⵖⴻⵏ (24 ⴼⵓⵔⴰⵔ 1971) ⴷ ⵢⵉⵙⵡⵉⵢⴻⵏ-ⵉⵙ, ⵢⴻⵡⵡⴻⴽⴽⴻⴷ-ⴷ ⴷ ⴰⴽⴽⴻⵏ "ⵓⵔ ⵢⴻⵍⵍⵉ ⴰⵔⴰ ⵢⴻⵄⵏⴰ ⴽⴰⵏ ⵍⴱⵉⵜⵔⵓⵍ ⴷ ⵍⵖⴰⵣ, ⵎⴻⵄⵏⴰ ⴷ ⵔⵔⴰⵢ ⵢⴻⵄⵏⴰⵏ ⵜⵉⵎⵓⵏⴻⵏⵜ, ⴰⴷ ⵜⴻⵟⵟⴻⴼ ⵔⵔⴰⵢ ⴰⵖⴻⵍⵏⴰⵡ, ⴷ ⵓⴱⴻⴷⴷⴻⵍ ⵏ ⵜⴻⵖⴱⵓⵍⴰ ⵜⵉⴳⴰⵎⴰⵏⵉⵏ ⵖⴻⵔ ⵡⴰⵍⵍⴰⵍⴻⵏ ⵏ ⵜⴻⵏⵎⵉⵡⵜ ⵜⴰⵖⴻⵍⵏⴰⵡⵜ".
ⵙ ⵡⴰⵢⴰ, ⵢⴻⵔⵏⴰ-ⴷ ⵓⵎⴰⵙⴰⵢ-ⴰ "ⵜⴻⵙⵙⴻⴱⴳⴻⵏ-ⴷ ⵍⴻⵣⵣⴰⵢⴻⵔ ⴷ ⴰⴽⴽⴻⵏ ⵍⴽⵓⵔⴰⵊ ⴰⵙⴻⵔⵜⴰⵏ ⴷ ⵜⵎⵓⵖⵍⵉ ⵜⴰⵙⵜⵔⴰⵜⵉⵊⵉⵜ ⴷ ⵙⵉⵏ ⵏ ⵢⵉⴼⴻⵔⴷⵉⵙⴻⵏ ⵉⴳⴻⵊⴷⴰⵏⴻⵏ ⵉⵡⴰⴽⴽⴻⵏ ⴰⴷ ⵏⴰⵡⴻⴹ ⵖⴻⵔ ⵜⵎⵓⵏⴻⵏⵜ ⵜⴰⴷⴰⵎⵙⴰⵏⵜ", ⵢⴻⵙⵙⴻⴳⵣⴰ-ⴷ ⴷ ⴰⴽⴽⴻⵏ "ⴰⵙⵙ-ⴰ, ⵙ ⴷⴷⴰⵡ ⵏ ⵢⵉⵡⴻⵏ ⵏ ⵓⵏⵏⴰⵔ ⵏ ⵜⴻⵣⵎⴻⵔⵜ ⴰⴳⵔⴰⵖⵍⴰⵏ ⵢⴻⵜⵜⴱⴻⴷⴷⵉⵍⴻⵏ ⵙ ⵣⵔⴻⴱ, ⵢⴻⵜⵜⴰⵡⵉⵢⴻⵏ ⵍⵃⵉⵔ ⴰⵊⵢⵓⵙⴻⵔⵜⴰⵏ, ⴰⵖⵉⵡⴻⵍ ⵏ ⵓⴱⴻⴷⴷⴻⵍ ⵏ ⵜⴻⵣⵎⴻⵔⵜ, ⵉⵙⵓⵜⵓⵔⴻⵏ ⵏ ⵓⵏⴻⵣⵡⵓ, ⴷ ⵓⵙⵏⴻⵔⵏⵉ ⴰⵜⵉⴽⵏⵓⵍⵓⵊⵉ, ⵜⵖⴻⵍⵍⵉⵙⵜ ⵏ ⵜⴻⵣⵎⴻⵔⵜ ⴰⴷ ⵜⴻⵇⵇⵉⵎ ⴷ ⵜⴰⵍⵓⴼⵜ ⵜⴰⴳⴻⵊⴷⴰⵏⵜ ⵉ ⵜⴻⴼⵔⵉⵇⵜ".
ⴷⴻⴳ ⵢⵉⵡⴻⵏ ⵏ ⵡⴻⵍⵖⵓ ⵉ ⵜⵖⴰⵎⵙⴰ, ⵉⵡⵡⴻⴽⴽⴻⴷ-ⴷ ⵎⴰⵙⵙ ⵏⵓⵖⴱⵓⴷⵓⵀⵡⵉ ⴷ ⴰⴽⴽⴻⵏ "ⴰⵎⴻⵏⵣⴰⵡ ⵏ ⵜⴻⴼⵔⵉⵇⵜ ⵢⴻⵃⵡⴰⵊ ⴰⵟⴰⵙ ⴰⴷ ⵢⴻⵙⵙⴻⵇⴷⴻⵛ ⵙ ⵡⵓⴷⴻⵎ ⵢⴻⵍⵀⴰⵏ ⴷ ⵓⵃⵔⵉⵛ ⵜⵉⵖⴱⵓⵍⴰ-ⵉⵏⴻⵙ ⵢⴻⵍⵍⴰⵏ (ⵍⴱⵉⵜⵔⵓⵍ, ⵍⵖⴰⵣ, ⵜⵉⵥⵎⴰⵔ ⵢⴻⵜⵜⵡⴰⵊⵊⴷⴰⴷⴻⵏ..), ⵉⵡⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ ⵜⴰⵎⵉⵡⵉⵏ ⵏ ⵓⵖⵓⵎⵎⵓ ⵉⵡⵓⵍⵎⴻⵏ ⵉ ⵢⴻⴳⴷⵓⴷⴻⵏ-ⵉⵙ", ⵢⴻⵙⵙⴰⵡⴻⵍ-ⴷ ⵖⴻⵔ "ⵡⴰⵣⴰⵍ ⵏ ⵓⵙⴻⵎⴽⴻⵍ ⵏ ⵍⴻⵇⴷⵉⵛⴰⵜ, ⴷ ⵓⵙⴻⵇⴷⴻⵛ ⵏ ⵜⴻⵔⵎⵉⵢⵉⵏ ⵏ ⵜⵎⵓⵔⴰ ⵏ ⵜⴻⴼⵔⵉⵇⵜ ⵉ ⵢⴻⵡⵡⴹⴻⵏ ⴰⴷ ⵅⴻⴷⵎⴻⵏⵜ ⴰⵙⵏⴻⵔⵏⵉ ⵏ ⵜⵉⴷⴻⵜ ⴷⴻⴳ ⵓⵏⵏⴰⵔ-ⴰ, ⴰⵎ ⵍⴻⵣⵣⴰⵢⴻⵔ".
ⵙⵉ ⵜⴰⵎⴰ-ⵙ, ⵢⴻⵙⵙⴻⴱⴳⴻⵏ-ⴷ ⵓⵙⴻⵍⵡⴰⵢ ⵏ ⵡⴰⵎⵎⴰⵙ ⴰⵄⵔⴰⴱ-ⴰⴼⵛⵔⵉⵇ ⵉ ⵓⵙⴽⴰⵙⵉ ⴷ ⵓⵙⵏⴻⵔⵏⵉ, ⵎⵓⵃⴻⵎⵎⴻⴷ ⴰⵎⵉⵏ ⴱⵓⵟⴰⵍⴱⵉ, ⴷ ⴰⴽⴽⴻⵏ ⴰⵀⴻⴳⴳⵉ ⵏ ⵜⴻⵥⵔⵉⴳⵜ ⵜⵉⵙ 12 ⵏ ⵡⴻⴳⵔⴰⵡ ⵏ ⵜⴻⴼⵔⵉⵇⵜ ⵉ ⵓⵙⴽⴰⵙⵉ ⴷ ⵜⵏⴻⵣⵣⵓⵜ ⴰⴷ ⵢⵉⵍⵉ ⴷⴻⴳ ⵡⵓⵙⵙⴰⵏ ⵏ 9 ⴷ 10 ⴷⴻⴳ ⵎⴰⴳⵓ 2026 ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⵖⴰⵢⵜ ⵙ ⴷⴷⴰⵡ ⵏ ⵢⵉⵙⵡⵉⵢⴻⵏ "ⵍⵡⴰⵃⵉⴷ ⴰⴷ ⵏⴻⵍⴷⵉ ⵍⴻⵙⵡⴰⵇ", ⵙ ⵜⵜⴻⴽⴽⵉ ⵏ ⵓⴳⴰⵔ ⵏ 43 ⵏ ⵜⵎⵓⵔⴰ.
ⵉⵡⴻⵀⵀⴰ-ⴷ ⵎⴰⵙⵙ ⴱⵓⵟⴰⵍⴱⵉ ⵖⴻⵔ ⵓⵊⴻⵔⵔⴻⴷ ⵏ ⵡⴰⵣⴰⵍ ⵏ 380 ⵏ ⵢⵉⵎⵡⵓⵍⴻⵏ ⵉⴷⴰⵎⵙⴰⵏⴻⵏ ⴷⴻⴳ ⵓⴱⴰⴷⵓ ⵢⴻⵜⵜⵡⴰⵅⴻⴷⵎⴻⵏ ⵉ ⵡⴰⵢⴰ ⵙⴻⴳ ⴱⴻⵕⵕⴰ ⵏ ⵜⵎⵓⵔⵜ ⴰⵍⴰⵎⵎⴰ ⴷ ⴰⵙⵙ-ⴰ ⵏ ⵙⵙⴻⴱⵜ, ⵙ ⵡⴰⵢⴻⵏ ⵢⴻⵜⵜⵓⵔⴰⴵⵓⵏ ⴰⴷ ⵢⴰⵡⴻⴹ ⵓⵎⴹⴰⵏ ⴰⵎⴰⵜⵓ ⴰⵔ 1500, ⵙ ⵜⵓⵔⴰⴵⵉ ⵏ ⵓⵡⴻⵟⵟⵉ ⵏ ⵡⴰⵣⴰⵍ ⵏ ⵢⵉⵎⵜⴰⵡⴰⵢⴻⵏ ⵉ ⴷ-ⵢⴻⵜⵜⵡⴰⵙⵜⴻⵏⵢⴰⵏ ⴳⴰⵔ 1.4 ⴷ 1.8 ⵏ ⵢⵉⵎⴻⵍⵢⴰⵔⴻⵏ ⵏ ⴷⵓⵍⴰⵕ.
ⴰⴷ ⵜⵃⴰⵣ ⵜⴻⵥⵔⵉⴳⵜ-ⴰ ⵢⴰⴽⴽ ⵉⵃⵔⵉⵛⴻⵏ, ⵙ ⵓⵡⴻⴽⴽⵉ ⵖⴻⴼ ⵓⵏⵏⴰⵔ ⵏ ⵜⴻⵣⵎⴻⵔⵜ ⵖⴻⴼ ⵍⴻⵃⵙⴰⴱ ⵏ ⵜⴻⵣⵎⴻⵔⵜ ⵜⴰⵎⴻⵇⵇⵔⴰⵏⵜ ⵉ ⵜⴻⵙⵄⴰ ⵍⴻⵣⵣⴰⵢⴻⵔ, ⵉ ⵜⵜ-ⵢⴻⵜⵜⴰⴵⴵⴰⵏ ⴰⴷ ⵜⵓⵔⴰⵔ ⵜⴰⵎⵍⵉⵍⵉⵜ ⵜⴰⴳⴻⵊⴷⴰⵏⵜ ⴷⴻⴳ ⵓⵎⴻⵏⵣⴰⵡ ⴷⴻⴳ ⵓⵏⵏⴰⵔ-ⴰ. ⵜⵉⵎⵍⵉⵍⵉⵜ-ⴰ ⴰⴷ ⵜⵉⵍⵉ ⴷ "ⴰⵎⴹⵉⵇ ⵏ ⵍⴰⵎⴰⵏ ⴷ ⵓⵙⵡⵉⵏⴳⴻⵎ ⵉⵛⴻⵔⴽⴻⵏ ⵉ ⵡⴻⵙⵏⴻⵔⵏⵉ ⵏ ⵓⵙⴽⴰⵙⵉ, ⴰⵡⵡⴰⴹ ⵖⴻⵔ ⵜⴻⵏⵎⵉⵡⵜ, ⴰⵙⴻⴵⵀⴻⴷ ⵏ ⵓⵎⵢⴰⵡⴻⵙ, ⴷ ⵓⵙⵏⵓⵍⴼⵓ ⵏ ⵢⵉⵎⴰⵍ ⵢⴻⵇⵡⴰⵏ ⴷ ⵓⵔⴻⴽⴷⵉ ⵉ ⵜⵎⵓⵔⴰ ⵏ ⵓⵎⴻⵏⵣⴰⵡ",
ⵢⴻⵙⵙⴻⴱⴳⴻⵏ-ⴷ ⴷ ⴰⴽⴽⴻⵏ "ⵜⴰⴼⵔⵉⵇⵜ ⵙ ⵡⴰⵢⴻⵏ ⵜⴻⵙⵄⴰ ⵏ ⵜⴻⵣⵎⴻⵔⵜ, ⵜⵉⵖⴱⵓⵍⴰ ⴷ ⵜⴻⴳⵏⴰⵜⵉⵏ ⵢⴻⵍⵀⴰⵏ, ⵜⴻⵙⵄⴰ ⵜⴰⵣⵎⴻⵔⵜ ⴰⴷ ⵜⵓⵖⴰⵍ ⴷ ⴰⵎⴻⴷⵢⴰ ⵏ ⵜⵉⴷⴻⵜ ⵉ ⵜⴻⵏⵎⵉⵡⵜ ⵢⴻⵜⵜⴽⴻⵎⵎⵉⵍⴻⵏ, ⵎⴰ ⵜⴻⵙⵙⴻⵇⴷⴻⵛ ⵙ ⵡⵓⴷⴻⵎ ⵢⴻⵍⵀⴰⵏ ⵜⵉⵥⵎⴰⵔ-ⵉⵙ ⴷ ⵓⴽⵎⵉⵍⵉ-ⵉⵏⴻⵙ". ⴰⴷ ⴷ-ⵏⴻⵙⵎⴻⴽⵜⵉ ⴷ ⴰⴽⴽⴻⵏ ⵉⵎⴻⵏⵙⵉ-ⴰ ⵏ ⵍⴻⴼⴹⵓⵔ ⵢⴻⵍⵍⴰ-ⴷ ⵙ ⵓⵃⴹⴰⵔ ⵏ ⵢⵉⵎⴹⴻⴱⴱⵔⴻⵏ ⵏ ⵡⴰⵟⴰⵙ ⵏ ⵢⵉⵃⵔⵉⵛⴻⵏ ⵉⵖⵍⵉⴼⴰⵏⴻⵏ ⴷ ⵜⵏⴻⴳⴳⴰⵔⵉⵡⵉⵏ, ⵉⵎⴹⴻⴱⴱⵔⴻⵏ ⵏ ⵓⴱⴰⵔⵍⴰⵎⴰⵏ ⵙ ⵙⵏⴰⵜ ⵏ ⵜⵣⴻⵖⵡⴰ-ⵉⵏⴻⵙ, ⵉⵎⴰⵙⵙⴰⵏⴻⵏ ⴷ ⵢⵉⵎⴰⵣⵣⴰⴳⴻⵏ, ⴷ ⵢⵉⵎⴹⴻⴱⴱⵔⴻⵏ ⵏ ⵓⵙⵡⵉⵔ ⴰⴷⵉⴱⵍⵓⵎⴰⵙ ⵉ ⴷ-ⵢⴻⵜⵜⵡⴰⵇⴻⴱⵍⴻⵏ ⴷⴻⴳ ⵍⴻⵣⵣⴰⵢⴻⵔ.
ⴰⵔⵏⵓ ⵖⴻⵔ
