ⵉⵙⵙⴻⴽⵏⴻⴷ ⵓⵙⴻⵍⵡⴰⵢ ⵏ ⵜⴰⴷⴱⴻⵍⵜ ⵜⴰⵖⴻⵍⵏⴰⵡⵜ ⵜⵉⵍⴻⵍⵍⵉⵜ ⵏ ⵜⴻⴼⵔⴰⵏⵉⵏ ⵙ ⵜⵏⴰⵎⴰⵍⵜ, ⵎⴰⵙⵙ ⴽⴰⵔⵉⵎ ⴽⵀⴰⵍⴼⴰⵏ, ⴰⵙⵙ-ⴰ ⵏ ⵙⵙⴻⴱⵜ ⵙⴻⴳ ⵜⵡⵉⵍⴰⵢⵜ ⵏ ⵜⵉⵒⴰⵣⴰ, ⴱⴻⵍⵍⵉ ⵉⵀⴻⴳⴳⵉⵢⴻⵏ ⵉ ⵉⵜⴻⴷⴷⵓⵏ ⵉ ⵜⴻⴼⵔⴰⵏⵉⵏ ⵏ ⵓⵙⴻⵍⴳⴻⵏ ⴰⵔⴰ ⴷ-ⵢⵉⵍⵉⵏ ⴰⵙⵙ ⵏ 2 ⵢⵓⵍⵢⵓ ⵉ ⴷ-ⵉⵜⵜⴻⴷⴷⵓⵏ, ⵜⵜⴻⴷⴷⵓⵏ ⴷⴻⴳ ⵜⴻⴳⵏⴰⵜⵉⵏ ⵏ ⵓⵙⵓⴷⴷⴻⵙ ⵉⵕⴻⵙⵙⴰⵏⴻⵏ ⴷⴻⴳ ⵢⴰⴽⴽ ⵜⵏⴻⴼⴼⵓⵜⵉⵏ ⵏ ⵜⵡⵉⵍⴰⵢⵉⵏ.
ⵎⴰⵙⵙ ⴽⵀⴰⵍⴼⴰⵏ ⵉⵙⵙⴻⴼⵀⴻⵎ-ⴷ ⴷⴻⴳ ⵢⵉⵡⴻⵜ ⵏ ⵜⵎⴻⵙⵍⴰⵢⵜ ⵉ ⵜⵏⴻⵖⵎⴰⵙⵜ ⵙⴻⵍⴷ ⵜⵉⵔⵣⵉ ⵏ ⵓⵎⴰⵀⵉⵍ ⵉ ⵢⴻⵅⴷⴻⵎ ⵖⴻⵔ ⵓⴱⵉⵕⵓ ⵏ ⵜⴰⴷⴱⴻⵍⵜ ⴷⴻⴳ ⵜⵉⵒⴰⵣⴰ, ⴱⴻⵍⵍⵉ ⵉⵙⴼⵓⵍⴻⵍ (monitors) "ⵢⴰⵍ ⴰⵙⵙ" ⵜⵉⴷⴷⵢ ⵏ ⵓⵀⴻⴳⴳⵉ ⵉ ⵜⴻⴼⵔⴰⵏⵉⵏ ⵉ ⴷ-ⵉⵜⵜⴻⴷⴷⵓⵏ, ⵍⴰⴷⵖⴰ ⴰⵍⵍⵓⵙ ⵓⴼⴼⵉⵔ ⵏ ⵜⵉⴳⴳⵓⵔⴰ ⵏ ⵜⴻⴼⵔⴰⵏⵉⵏ, ⴰⵊⴻⵔⵔⴻⴷ, ⵓⵡⵡⵉ ⵏ ⵢⵉⴼⴰⵢⵍⴻⵏ ⵏ ⵓⵎⴻⵙⵜⵉⵔ, ⴰⴳⴻⵎⵎⴻⵔ ⵏ ⵢⵉⵙⵜⴻⵢⵏⵉⵢⴻⵏ, ⴷ ⵓⵙⴻⵔⵙⵉ ⵏ ⵢⵉⴼⴰⵢⵍⴻⵏ ⴰⵔⴰ ⵢⵉⴷⵓⵎⴻⵏ ⴰⵔⵎⵉ ⴷ ⵜⵜⵏⴰⵚⴼⴰ ⵏ ⵍⵍⵉⴹ (00:00) ⵏ ⵡⴰⵙⵙ-ⴰ.
ⵉⵙⵙⴻⴽⵜⵉ-ⴷ ⴱⴻⵍⵍⵉ ⵉⵀⴻⴳⴳⵉⵢⴻⵏ ⵉ ⵓⵎⴻⵣⵔⴰⵢ-ⴰⴳⵉ ⵏ ⵜⴻⴼⵔⴰⵏⵉⵏ ⵜⵜⴻⴷⴷⵓⵏ ⵙ ⵓⵎⵙⴰⵙⴻⵢ ⴷ ⵢⵉⵎⵉⴳⴰⵡⴻⵏ ⵎⴻⵕⵕⴰ, ⵓⵍⴰ ⴷ ⵉⴽⴰⴱⴰⴱⴻⵏ ⵉⵙⴻⵔⵜⵉⵢⴻⵏ ⵉ ⴷ-ⵉⵟⵟⴻⴷⴷⵓⵏ ⴷⴻⴳ ⵓⴷⵉⵡⴻⵏⵏⵉ ⴷ ⵜⴰⴷⴱⴻⵍⵜ ⵜⵉⵍⴻⵍⵍⵉⵜ.
ⵖⴻⴼ ⵡⴰⵢⴻⵏ ⵢⴻⵄⵏⴰⵏ ⵜⴰⵡⵉⵍⴰⵢⵜ ⵏ ⵜⵉⵒⴰⵣⴰ ⵉ ⴷⴻⴳ ⵉⵥⵔⴰ ⵜⵉⵣⴻⵎⵎⴰⵔ ⵏ ⵓⴱⵉⵕⵓ ⵏ ⵜⵡⵉⵍⴰⵢⵜ, ⴽⵀⴰⵍⴼⴰⵏ ⵉⵙⵙⴻⴽⵏⴻⴷ ⵍⴼⴻⵕⵃ-ⵉⵙ ⵙ "ⵜⵓⵛⵛⵉⵜ ⵜⴰⵎⴰⵜⵓⵜ" ⴷ "ⵓⵙⵓⴷⴷⴻⵙ ⵉⵕⴻⵙⵙⴰⵏ" ⵏ ⵓⵀⴻⴳⴳⵉ ⵉ ⵜⴻⴼⵔⴰⵏⵉⵏ ⵏ 2 ⵢⵓⵍⵢⵓ ⵉ ⴷ-ⵉⵜⵜⴻⴷⴷⵓⵏ.
ⵉⵙⵙⴻⴽⵏⴻⴷ ⴱⴻⵍⵍⵉ ⵊⵔⴻⴷⴷⴻⵏ 457.668 ⵏ ⵢⵉⴼⵔⴰⵏⴻⵏ ⴷⴻⴳ ⵜⵡⵉⵍⴰⵢⵜ-ⴰⴳⵉ, ⴱⴹⴰⵏ ⴷⴻⴳ 207 ⵏ ⵡⴰⵎⵎⴰⵙⴻⵏ ⵏ ⵓⵙⵉⴼⵔⴻⵏ ⴷ 1113 ⵏ ⵢⵉⴱⵉⵕⵓⵜⴻⵏ ⴷⴻⴳ ⵢⴰⴽⴽ ⵜⵖⵉⵡⴰⵏⵜⵉⵏ ⵏ ⵜⵡⵉⵍⴰⵢⵜ.
ⵉⵙⵙⴻⴳⵔⴰ ⵓⵙⴻⵍⵡⴰⵢ ⵏ ⵜⴰⴷⴱⴻⵍⵜ ⵙ ⵜⵏⴰⵎⴰⵍⵜ ⵜⵉⵔⵣⵉ-ⵉⵙ ⵙ ⵜⵉⴷⴷⵉⵏ ⵖⴻⵔ ⵓⴱⵉⵕⵓ ⵏ ⵜⴰⴷⴱⴻⵍⵜ ⴷⴻⴳ ⵛⵛⴻⵔⵛⴰⵍ ⵉⵡⴰⴽⴽⴻⵏ ⴰⴷ ⵉⵥⴻⵔ ⴰⵎⴻⴽ ⵜⵜⴻⴷⴷⵓⵏ ⵉⵀⴻⴳⴳⵉⵢⴻⵏ ⵏ ⵜⵉⴳⴳⴰⵡⵜ ⵏ ⵜⴻⴼⵔⴰⵏⵉⵏ ⴷⵉⵏⵏⴰ.
ⴰⵔⵏⵓ ⵖⴻⵔ
