ⵓⵎⴹⴰⵏ ⵏ ⵜⴻⴳⵔⵓⵎⵎⴰ ⵏ ⵢⵉⴼⵔⴰⵏⵉⵏ ⴷⴻⴳ ⵍⴻⵣⵣⴰⵢⴻⵔ, ⵙⴻⵍⴷ ⵎⵉ ⴷ-ⵢⴻⵍⵍⴰ ⵡⴰⵍⵍⵓⵙ ⵓⴼⴼⵉⵔ (révision exceptionnelle) ⵏ ⵜⵉⴳⴳⵓⵔⴰ ⵏ ⵜⴻⴼⵔⴰⵏⵉⵏ, ⵉⵡⴰⴽⴽⴻⵏ ⴰⴷ ⴷ-ⵀⴻⴳⴳⵉⵏ ⵉ ⵜⴻⴼⵔⴰⵏⵉⵏ ⵏ ⵓⵙⴻⵍⴳⴻⵏ ⵏ 2 ⵢⵓⵍⵢⵓ ⵉ ⴷ-ⵉⵜⵜⴻⴷⴷⵓⵏ, ⵢⴰⵡⴻⴹ 24.727.041 ⵏ ⵢⵉⴼⵔⴰⵏⵉⵏ. ⴰⵢⴰⴳⵉ ⵉ ⴷ-ⵜⴻⵙⵙⵓⴼⴼⴻⵖ ⵜⴰⴷⴱⴻⵍⵜ ⵜⴰⵖⴻⵍⵏⴰⵡⵜ ⵜⵉⵍⴻⵍⵍⵉⵜ ⵏ ⵜⴻⴼⵔⴰⵏⵉⵏ (ANIE), ⴰⵙⵙ-ⴰ ⵏ ⵍⴻⵜⵏⵉⵢⴻⵏ, ⴷⴻⴳ ⵢⵉⵡⴻⵜ ⵏ ⵓⵙⵉⵡⴹ.
ⵉⵙⵙⴻⴼⵀⴻⵎ-ⴷ ⵓⵖⴱⴰⵍⵓ-ⵏⵏⵉ ⴱⴻⵍⵍⵉ ⵓⵎⴹⴰⵏ ⵏ ⵢⵉⴼⵔⴰⵏⵉⵏ, ⵙⴻⵍⴷ ⵡⴰⵍⵍⵓⵙ ⵓⴼⴼⵉⵔ, ⵢⴰⵡⴻⴹ "24.727.041 ⵏ ⵢⵉⴼⵔⴰⵏⵉⵏ, ⴳⴰⵔ-ⴰⵙⴻⵏ 23.872.756 ⵏ ⵢⵉⴼⵔⴰⵏⵉⵏ ⴷⴻⴳ ⴷⴰⵅⴻⵍ ⵏ ⵜⵎⵓⵔⵜ ⴷ 854.285 ⵏ ⵢⵉⴼⵔⴰⵏⵉⵏ ⵏ ⵜⵓⴽⴽⵉⵙⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ".
ⵜⴻⴳⵔⵓⵎⵎⴰ ⵏ ⵢⵉⴼⵔⴰⵏⵉⵏ ⵜⴻⵙⵙⵉⴹⴻⵏ ⴰⴽⴽⴰ: "13.255.949 ⵏ ⵢⵉⵔⴳⴰⵣⴻⵏ ⴷ 11.471.091 ⵏ ⵜⵍⴰⵡⵉⵏ".
ⵖⴻⴼ ⵡⴰⵢⴻⵏ ⵢⴻⵄⵏⴰⵏ ⵍⴻⵄⵎⴻⵔ, ⵜⴰⵙⴻⴷⴷⴰⵔⵜ ⵏ ⵢⵉⴼⵔⴰⵏⵉⵏ ⴳⴰⵔ 18 ⴷ 25 ⵏ ⵢⵉⵙⴻⴳⴳⴰⵙⴻⵏ ⵜⴻⵡⵡⵉ "1.276.683 ⵏ ⵢⵉⴼⵔⴰⵏⵉⵏ". ⵎⴰ ⴷ ⵡⵉⴷ ⵢⴻⵙⵄⴰⵏ ⴳⴰⵔ 25 ⴷ 40 ⵏ ⵢⵉⵙⴻⴳⴳⴰⵙⴻⵏ ⵓⵡⵢⴻⵏ "7.094.108 ⵏ ⵢⵉⴼⵔⴰⵏⵉⵏ". ⵎⴰ ⴷ ⵜⴰⵙⴻⴷⴷⴰⵔⵜ ⵏ 40 ⵏ ⵢⵉⵙⴻⴳⴳⴰⵙⴻⵏ ⴷ ⵓⴳⴰⵔ ⵜⴻⵡⵡⵉ "16.356.251 ⵏ ⵢⵉⴼⵔⴰⵏⵉⵏ", ⴰⴽⴽⴻⵏ ⵉ ⴷ-ⵜⴻⵏⵏⴰ ⵜⴰⴷⴱⴻⵍⵜ ⵜⵉⵍⴻⵍⵍⵉⵜ.
ⵜⴰⴷⴱⴻⵍⵜ ⵜⴻⵙⵙⴻⴽⵏⴻⴷ-ⴷ ⴱⴻⵍⵍⵉ "ⵓⵎⴹⴰⵏ ⵏ ⵡⵉⴷ ⵉ ⴷ-ⵢⴰⵡⴻⴹⴻⵏ 18 ⵏ ⵢⵉⵙⴻⴳⴳⴰⵙⴻⵏ ⴰⵙⵙ ⵏ ⵓⵙⵉⴼⵔⴻⵏ ⵢⴰⵡⴻⴹ 27.234 ⵏ ⵢⵉⵊⴻⵔⵔⴰⴷⴻⵏ, ⵎⴰ ⴷ ⵡⵉⴷ ⵢⴻⵔⵔⴰⵏ ⵉⵙⴻⵎ-ⵏⵙⴻⵏ ⵉ ⵜⵉⴽⴽⴻⵍⵜ ⵜⴰⵎⴻⵏⵣⵓⵜ ⵓⵡⵢⴻⵏ ⴰⵣⴰⵍ ⵏ 291.584 ⵏ ⵢⵉⵊⴻⵔⵔⴰⴷⴻⵏ ⵉⵎⴰⵢⵏⵓⵜⴻⵏ".
ⴷⴻⴳ ⵓⵣⴻⵏⵣⵉⵖ-ⴰⴳⵉ, ⵜⴰⴷⴱⴻⵍⵜ ⵜⴻⵙⵙⴻⵏⴽⴰⴷ ⴱⴻⵍ "ⵓⵎⴹⴰⵏ ⵏ ⵡⵉⴷ ⵉ ⴷ-ⵢⵓⵔⴰⵏ ⵙ ⵙⴻⴱⴱⴰ ⵏ ⵓⴱⴻⴷⴷⴻⵍ ⵏ ⵜⵏⴻⵣⴷⵓⵖⵜ (adresse) ⵢⴰⵡⴻⴹ 223.928 ⵏ ⵢⵉⵊⴻⵔⵔⴰⴷⴻⵏ", ⵎⴰ ⴷ ⵡⵉⴷ ⵢⴻⵜⵜⵡⴰⴽⴽⵙⴻⵏ ⵙ ⵙⴻⴱⴱⴰ ⵏ ⵓⴱⴻⴷⴷⴻⵍ ⵏ ⵜⵏⴻⵣⴷⵓⵖⵜ ⵏⵏⴰⵏ-ⴷ 263.689 ⵏ ⵢⵉⵎⴼⵓⴷⴻⵏ". ⴷⴰⵖⴻⵏ ⵜⵜⵓⵙⴼⴻⴷⴷⴻⵏ "52.554 ⵏ ⵢⵉⵎⴷⴰⵏⴻⵏ ⵙ ⵙⴻⴱⴱⴰ ⵏ ⵍⵎⵓⵜ, ⴷ 2522 ⵏ ⵢⵉⵎⴷⴰⵏⴻⵏ ⵙ ⵙⴻⴱⴱⴰ ⵏ ⴱⴻⴽⴽⵓ ⵏ ⵓⵣⵔⴻⴼ ⵏ ⵓⴼⵔⴰⵏ".
ⵉⵍⴰⵇ ⴰⴷ ⵏⵣⴻⵔ ⴱⴻⵍⵍⵉ ⵜⴻⴳⵔⵓⵎⵎⴰ ⵏ ⵢⵉⴼⵔⴰⵏⵉⵏ ⵓⵇⴱⴻⵍ ⵡⴰⵍⵍⵓⵙ ⵓⴼⴼⵉⵔ ⵜⴻⵍⵍⴰ ⵙ ⵍⵇⴻⴷⴷ ⵏ 24.503.060 ⵏ ⵢⵉⴼⵔⴰⵏⵉⵏ, ⴷⴻⴳ-ⵙⴻⵏ 23.633.818 ⴷⴻⴳ ⴷⴰⵟⴻⵍ ⵏ ⵜⵎⵓⵔⵜ ⴷ 869.242 ⴷⴻⴳ ⴱⴻⵕⵕⴰ.
ⴰⵔⵏⵓ ⵖⴻⵔ
