ⵜⴰⵏⴻⵇⵇⴰⵙⵜ ⵜⴰⵣⵣⴰⵢⵔⵉⵜ ⵉ ⵓⵙⴻⴱⵖⴻⵙ ⵏ ⵓⵙⵉⴷⴼⴻⵔ ⴷ ⵜⴽⴻⴱⴱⴰⵏⵉⵜ ⵜⴰⵟⵟⴰⴼⴰⵏⵜ ⵜⴰⵣⵣⴰⵢⵔⵉⵜ ⵏ ⵜⵓⵣⵣⵍⵉⵡⵉⵏ ⵜⵉⴽⵔⵓⵔⵉⵢⵉⵏ ⵜⵜⵎⴻⵙⵍⴰⵢⴻⵏⵜ ⵖⴻⴼ ⵜⵜⴰⵡⵉⵍⴰⵜ ⵏ ⵓⵙⴻⵍⴽⴻⵎ ⵏ ⵢⵉⵙⴻⵏⴼⴰⵔⴻⵏ ⵉⵎⴻⴳⴳⴰⵏⴻⵏ ⵉⵙⴻⵜⵔⴰⵜⵉⵊⵉⵢⴻⵏ

ⵢⴻⵙⵏⵓⴱⴳⴻⵜ-ⴷ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⵇⵇⴰⵙⵜ ⵜⴰⵣⵣⴰⵢⵔⵉⵜ ⵉ ⵓⵙⴻⴱⵖⴻⵙ ⵏ ⵓⵙⵉⴷⴼⴻⵔ (AAPI), ⵄⵓⵎⴰⵔ ⵔⴻⴽⴽⴰⵛ, ⴰⵙⵙ ⵏ ⵍⵃⴻⴷⴷ ⴷⵉ ⵍⴻⵣⵣⴰⵢⴻⵔ ⵜⴰⵎⴰⵏⴻⴳⵜ, ⴰⴽⴰⴱⴰⵔ ⵏ ⵜⴽⴻⴱⴱⴰⵏⵉⵜ ⵜⴰⵟⵟⴰⴼⴰⵏⵜ ⵜⴰⵣⵣⴰⵢⵔⵉⵜ ⵏ ⵜⵓⵣⵣⵍⵉⵡⵉⵏ ⵜⵉⴽⵔⵓⵔⵉⵢⵉⵏ "ACS", ⵙ ⵓⵇⴻⵔⵔⵓⵢ ⵏ ⵓⵙⴻⵍⵡⴰⵢ ⴰⵏⴻⵎⵀⴰⵍ ⴰⵎⴰⵜⵓ ⵏ ⵡⴻⴳⵔⴰⵡ-ⴰ, ⵙⴰⵎⵉⵔ ⵢⴻⵃⵢⴰⵡⵉ, ⵉ ⵡⴰⴽⴽⴻⵏ ⴰⴷ ⵡⴰⵍⵉⵏ ⵜⵜⴰⵡⵉⵍⴰⵜ ⵏ ⵓⵙⴻⵍⴽⴻⵎ ⵏ ⵜⴻⴳⵏⴰⵜⵉⵏ ⵏ ⵓⵙⵉⴷⴼⴻⵔ ⵢⴻⵜⵜⴰⵡⵉⵏ ⵖⴻⵔ ⵍⵅⵉⵕ, ⴰⴽⴽⴻⵏ ⵉ ⴷ-ⵢⴻⵡⵡⵉ ⵓⵍⵖⵓ ⵏ ⵜⵏⴻⵇⵇⴰⵙⵜ.

ⵢⴻⴽⵛⴻⵎ ⵜⴻⵎⵍⵉⵍⵉⵜ-ⴰ, ⵙ ⵡⴰⴽⴽⴻⵏ ⵉ ⴷ-ⵢⴻⵏⵏⴰ ⵓⵍⵖⵓ, ⴷⴻⴳ ⵓⵃⵔⵉⵛ ⵏ ⵜⴻⵎⵍⵉⵍⵉⵢⵉⵏ ⵏ ⵡⴻⵎⵛⴰⵡⴰⵕ ⵉ ⵜⴻⴱⴷⴰ ⵜⵏⴻⵇⵇⴰⵙⵜ ⴰⴽⴽⴻⴷ ⵢⵉⵎⵙⴻⴹⵔⵓⵢⴻⵏ ⵉⴷⴰⵎⵙⴰⵏⴻⵏ ⵢⴻⵎⵅⴰⵍⵍⴰⴼⴻⵏ, "ⵉⵙⵡⵉ-ⵙ ⴷ ⴰⵙⵉⵍⴻⵖ ⵏ ⵢⵉⵙⵉⴷⴼⴻⵔ ⵉⴼⴰⵔⴻⵙⴻⵏ ⵖⴻⵔ ⵢⵉⵔⵎⵓⴷⴻⵏ ⵉⵙⴻⵣⵡⵉⵢⴻⵏ, ⴷ ⵓⵙⴻⴵⵀⴻⴷ ⵏ ⵓⵙⴻⵎⵙⴰⵙⴰ ⴰⴽⴽⴻⴷ ⵢⵉⵎⴷⴰⵏⴻⵏ (ⵉⴼⴰⵄⵍⵉⵢⴻⵏ) ⴷⴻⴳ ⵢⵉⴳⴻⵣⴷⴰⵏ ⴰⵣⴰⵢⴻⵣ ⴷ ⵓⵙⵍⵉⴳ, ⵙ ⵡⴰⵢⴻⵏ ⴰⵔⴰ ⵢⴻⵏⴼⵄⴻⵏ ⵜⴰⴷⴰⵎⵙⴰ ⵜⴰⵖⴻⵍⵏⴰⵡⵜ".

ⴷⴻⴳ ⵓⵏⴻⵊⵎⵓⵄ-ⴰ, ⵢⴻⴼⴽⴰ-ⴷ ⵢⴻⵃⵢⴰⵡⵉ ⴰⴱⴻⵇⵇⴻⴹ ⴰⵎⴰⵜⵓ ⵖⴻⴼ ⵢⵉⵔⵎⵓⴷⴻⵏ ⵏ ⵜⴽⴻⴱⴱⴰⵏⵉⵜ ⵜⴰⵟⵟⴰⴼⴰⵏⵜ ⵉ ⴷ-ⵉⵊⴻⵎⵄⴻⵏ ⴽⵓⵥ (4) ⵏ ⵢⵉⴳⵔⴰⵡⴻⵏ ⵉⵎⴻⴳⴳⴰⵏⴻⵏ ⴷ ⵙⴰ (7) ⵏ ⵜⵎⴻⵍⵍⴰⵍⵉⵏ ⵜⵉⵣⴰⵢⴻⵣⵏⵉⵏ ⵉⵅⴻⴷⴷⵎⴻⵏ ⴷⴻⴳ ⵢⴻⵃⵔⵉⵛⴻⵏ ⵏ ⵓⴱⵍⴰⵙⵜⵉⴽ, ⴰⴽⴰⵖⴻⴹ, ⴰⵊⴰⵊ ⴷ ⵢⵉⵙⵉⵣⴷⵉⴳⴻⵏ, ⵔⵏⵓ ⵖⴻⵔ-ⵙ ⵉⵙⵓⴼⴰⵔ ⴰⵣⴳⴻⵏ-ⵉⵙⴰⴼⵔⴰⴽⴻⵏ (para-pharmaceutiques).

ⵉⵡⴰⵍⴰ ⴷⴰⵖⴻⵏ ⵉⵙⴻⵏⴼⴰⵔⴻⵏ ⵉⴳⴻⵊⴷⴰⵏⴻⵏ ⵉ ⵡⵓⵎⵉ ⵜⵜⵏⴻⵛⵛⴰⴷⴻⵏ ⵖⴻⵔ ⵣⴷⴰⵜ, ⵍⴰⴷⵖⴰ ⴰⴼⴰⵔⴻⵙ ⵏ ⵜⵉⴼⵙⵉⵢⵉⵏ ⵏ ⵡⴰⵊⴰⵊ (fibres de verre), ⵜⵉⴼⵙⵉⵢⵉⵏ ⵜⵉⵎⵥⵔⵉⵢⴰⵏⵉⵏ (fibres optiques), ⴽⴰⵔⴱⵓⵏⴰⵜ ⵏ ⵙⵓⴷⵢⵓⵎ, ⵜⵉⴳⴻⵍⵎⴰⵏⵉⵏ ⵏ ⵜⵓⵣⵉⵜ ⵜⴰⵎⴻⵏⵣⴰⵖⵜ (membranes d'osmose inverse), ⴰⴽⴽⴻⴷ ⵓⵙⴻⵏⴼⴰⵔ ⵏ ⵓⴼⴰⵔⴻⵙ ⵏ ⵙⵎⴻⵅ.

ⴷⴻⴳ ⵓⵃⵔⵉⵛ-ⴰ, ⵉⴱⴻⴳⴳⴻⵏ-ⴷ ⵢⴻⵃⵢⴰⵡⵉ ⴱⴻⵍⵍⵉ ⵜⴽⴻⴱⴱⴰⵏⵉⵜ ⵜⴰⵟⵟⴰⴼⴰⵏⵜ "ⵜⵇⴻⴷⴷⴻⵛ ⵖⴻⴼ ⵓⵏⴰⴷⵉ ⵏ ⵢⵉⵎⴻⵏⴷⵉⵢⴻⵏ (partenaires) ⵉⵖⴻⵍⵏⴰⵡⴻⵏ ⵏⴻⵖ ⵉⴱⴻⵔⵔⴰⵏⵉⵢⴻⵏ ⵉ ⵡⴰⴽⴽⴻⵏ ⴰⴷ ⴱⴷⵓⵏ ⴷⴻⴳ ⵓⵙⴻⵍⴽⴻⵎ ⵏ ⵢⵉⵙⴻⵏⴼⴰⵔⴻⵏ-ⴰ", ⵢⴻⵔⵏⴰ ⵢⴻⴼⴽⴰ-ⴷ ⴰⵙⵉⵔⴻⵎ-ⵉⵙ ⵉ ⵡⴰⴽⴽⴻⵏ ⴰⴷ ⵢⴻⵙⵜⴻⵏⴼⴰⵄ ⵙⴻⴳ ⵓⴱⴻⴷⴷⵉ ⴷ ⵜⵎⵓⵖⵍⵉ ⵏ ⵜⵏⴻⵇⵇⴰⵙⵜ ⴷⴻⴳ ⵜⵙⵓⵔⴰⴼ ⵏ ⵓⵏⴻⴳⵣⵓⵎ ⵎⴻⵕⵕⴰ.

ⵙⴻⴳ ⵜⴰⵎⴰ-ⵙ, ⵢⴻⵙⵙⴻⴷⵀⴰ-ⴷ ⵔⴻⴽⴽⴰⵛ ⵜⵓⵣⵣⵎⴰ ⵏ ⵜⵏⴻⵇⵇⴰⵙⵜ ⵉ ⵓⴱⴻⴷⴷⵉ ⵖⴻⵔ ⵜⴰⵎⴰ ⵏ ⵜⴽⴻⴱⴱⴰⵏⵉⵜ "ACS" ⵉ ⵓⵙⴻⵍⴽⴻⵎ ⵏ ⵢⵉⵙⴻⵏⴼⴰⵔⴻⵏ-ⵉⵙ ⵏ ⵓⵙⵉⴷⴼⴻⵔ, ⵙ ⵓⵙⴻⵡⵊⴻⴷ ⵏ ⵜⵜⴰⵡⵉⵍⴰⵜ ⵎⴻⵕⵕⴰ ⵢⴻⵍⵣⵎⴻⵏ ⵉ ⵓⵙⴻⴵⵀⴻⴷ ⵏ ⵡⴻⴱⵔⵉⴷ-ⵉⵙ, ⵢⴻⵔⵏⴰ ⵢⴻⵏⵏⴰ-ⴷ ⴱⴻⵍⵍⵉ ⵉⵙⴻⵏⴼⴰⵔⴻⵏ-ⴰ ⵢⴻⵜⵜⵓⵙⵓⵎⵔⴻⵏ ⴷ "ⵜⵉⴳⵏⴰⵜⵉⵏ ⵢⴻⵍⵀⴰⵏ ⵉ ⵓⵙⵏⴻⵔⵏⵉ ⵏ ⵓⴼⴰⵔⴻⵙ ⴰⴷⵉⴳⴰⵏ ⵏ ⵢⵉⵙⵓⴼⴰⵔ ⵉⵎⴻⵏⵣⴰ ⵉ ⵢⴻⴽⴻⵛⵎⴻⵏ ⴷⴻⴳ ⵜⴻⵎⴳⵓⵔⵉⵡⵉⵏ ⵜⵉⵏⴰⵚⵍⵉⵢⵉⵏ, ⴰⵢⴻⵏ ⴰⵔⴰ ⵢⴻⵙⴵⵀⴷⴻⵏ ⵜⵉⵣⵔⴰⵔⵉⵏ ⵏ ⵡⴰⵣⴰⵍ ⴰⵖⴻⵍⵏⴰⵡ, ⵢⴻⵔⵏⴰ ⴰⴷ ⵢⵉⵄⵉⵡⴻⵏ ⴷⴻⴳ ⵓⵙⴻⵏⵇⴻⵙ ⵏ ⵓⵟⴽⴻⵍ ⵖⴻⴼ ⵡⴻⵙⵏⴻⴽⵛⴻⵎ ⵙⴻⴳ ⴱⴻⵕⵕⴰ".

ⵢⴻⵎⵎⴻⵙⵍⴰⵢ-ⴷ ⵙ ⵍⵅⵉⵕ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⵇⵇⴰⵙⵜ ⵖⴻⴼ ⵜⵣⴻⵎⵎⴰⵔ ⵉ ⵅⴻⴷⵎⴻⵏ ⵢⵉⵎⴰⵙⴰⵢⴻⵏ ⵏ ⵡⴻⴳⵔⴰⵡ-ⴰ ⵉ ⵓⵙⴰⵍⵉ ⵏ ⵓⵅⴻⴷⴷⵉⵎ ⵏ ⵡⴻⴳⵔⴰⵡ-ⴰ ⴰⵙⴻⵜⵔⴰⵜⵉⵊⵉ ⴷ ⵓⵙⴻⴵⵀⴻⴷ ⵏ ⵜⵜⴻⴽⴽⵉ-ⵙ ⴷⴻⴳ ⵓⵙⵏⴻⵔⵏⵉ ⵏ ⵜⴻⵎⴳⵓⵔⵉⵡⵉⵏ ⵜⵉⴽⵔⵓⵔⵉⵢⵉⵏ ⴷ ⵓⵙⴻⴱⵖⴻⵙ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ, ⵖⴻⴼ ⵡⴰⵣⴰⵍ ⵏ ⵓⴳⴻⵣⴷⵓ ⵏ ⵜⴻⵎⴳⵓⵔⵉⵡⵉⵏ ⵜⵉⴽⵔⵓⵔⵉⵢⵉⵏ, ⵉ ⵢⴻⵜⵜⵡⴰⵃⴻⵙⴱⴻⵏ ⴷ ⵢⵉⵡⴻⵏ ⵙⴻⴳ ⵢⵉⴳⴻⵣⴷⴰⵏ ⵉⵙⴻⵜⵔⴰⵜⵉⵊⵉⵢⴻⵏ ⵉⵙⴻⵣⵡⵉⵢⴻⵏ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.