ⴰⵙⴼⵓⴶⴻⵍ ⵏ ⵓⵎⴻⴽⵜⴰⵢ ⵡⵉⵙ 55 ⵏ ⵓⵙⵙⴻⵖⵔⴻⴷ ⵏ ⵢⵉⵎⵔⵓⴶⴻⵏ (ⵍⴰ ⵏⴰⵜⵉⵓⵏⴰⵍⵉⵙⴰⵜⵉⵓⵏ), ⵉ ⵢⴻⵜⵜⵡⴰⵇⴻⵚⴷⴻⵏ ⴰⵣⴻⴽⴽⴰ ⵏ ⵜⵍⴰⵜⴰ, ⵢⵓⵙⴰ-ⴷ ⴷⴻⴳ ⵢⵉⵡⴻⵏ ⵡⴰⴷⴷⴰⴷ ⵉⴷⴻⴳ ⴷⴷⵓⵍⴰ ⵜⴻⴱⵖⴰ ⴰⴷ ⵜⴻⴽⵎⴻⵍ ⵉⵙⴻⵏⴼⴰⵔⴻⵏ ⵉⵎⵓⵇⵔⴰⵏⴻⵏ ⵉⵡⴰⴽⴽⴻⵏ ⴰⴷ ⵜⴻⵙⵏⴻⵔⵏⵉ ⵔⵔⵣⴻⵇ ⵏ ⵜⵎⵓⵔⵜ. ⴰⵢⴰ ⵢⴻⵙⴽⴰⵏ-ⵢⵉⴷ ⵜⵉⴱⵖⵉⵜ ⵏ ⵓⵀⴻⴳⴳⵉ ⵏ ⵢⵉⵡⴻⵜ ⵏ ⵜⴷⴰⵎⵙⴰ ⵢⴻⵎⴳⴰⵔⴰⴷⴻⵏ.
ⴰⵎⴻⴽⵜⴰⵢ-ⴰ ⵏ 24 ⴼⵓⵔⴰⵔ 1971, ⵉⴷⴻⴳ ⴰⵙⴻⵍⵡⴰⵢ ⵢⴻⵎⵎⵓⵜⴻⵏ ⵀⵓⵡⴰⵔⵉ ⴱⵓⵎⴻⴷⵢⴻⵏ ⵢⴻⵍⵍⴰ-ⴷ ⵢⴻⵙⵙⴻⴼⵔⴰ-ⴷ ⴰⵙⵙⴻⵖⵔⴻⴷ ⵏ ⵍⴱⴻⵜⵔⵓⵍ, ⵢⵓⵙⴰ-ⴷ ⴷⴻⴳ ⵜⴰⵍⵍⵉⵜ ⵉⴷⴻⴳ ⵍⵍⴰⵏ ⵍⴻⵎⵇⴰⴷⵔⵉⵏ ⵉⵎⵓⵇⵔⴰⵏⴻⵏ ⵉ ⵓⵀⴻⴳⴳⵉ ⵏ ⵢⵉⵙⴻⵏⴼⴰⵔⴻⵏ ⵏ ⵓⵙⵎⵉⵀⴷⴻⵔ (refining) ⴷ ⵍⴱⴻⵜⵔⵓⴽⵉⵎⵉ. ⵉⵙⵡⵉ ⵏⵏⵙⴻⵏ ⴷ ⴰⵙⴻⴹⵔⵓ ⵏ ⵍⵀⴰⴶⴰ ⵏ ⵓⵖⴻⵔⴼ ⴷ ⵓⵙⴰⵍⵉ ⵏ ⵜⵉⵏⵉⴳⵉⵏ ⵖⴻⵔ ⵍⴱⴻⵔⵔⴰ.
ⵉⵙⴻⵏⴼⴰⵔⴻⵏ-ⴰⴳⵉ ⴷⴷⴰⵏ ⴷ ⵓⴱⴻⴷⴷⴻⵍ ⵏ ⵜⴷⴰⵎⵙⴰ ⵉ ⴷ-ⵢⴻⵡⵡⵉ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴰⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵉⵡⴰⴽⴽⴻⵏ ⴰⴷ ⵢⴻⵙⵏⴻⵔⵏⵉ ⵔⵔⵣⴻⴇ ⵏ ⵜⵎⵓⵔⵜ ⵢⴻⵔⵏⴰ ⴰⴷ ⵢⴻⵙⵙⴻⴶⵀⴻⴷ ⴰⵎⴽⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵙⵙⵓⵇ ⴰⴳⵔⴰⵖⵍⴰⵏ.
ⴷⴻⴳ ⵡⴰⵙⵙ-ⵏⵏⵉ ⵏ 1971, ⵍⴻⵣⵣⴰⵢⴻⵔ ⵜⴻⵡⵡⵉ-ⴷ 51% ⵏ ⵔⵔⵣⴻⴇ ⵏ ⵜⴽⴻⵔⴱⴰⵏⵉⵏ ⵏ ⵍⴱⴻⵜⵔⵓⵍ ⵏ ⴼⵔⴰⵏⵙⴰ ⵉ ⵢⴻⵍⵍⴰⵏ ⴷⴻⴳ ⵓⵏⵥⵓⵍ, ⴷ ⵡⴰⴽⴽ ⵢⵉⵖⴱⵓⵍⴰ ⵏ ⵍⴳⴰⵣ. ⴰⵢⴰ ⵢⴻⴼⴽⴰ-ⴷ ⵜⵉⵣⵎⴻⵔⵜ ⵏ ⵢⵉⴷⵔⵉⵎⴻⵏ ⵉ ⴷⴷⵓⵍⴰ ⵉⵡⴰⴽⴽⴻⵏ ⴰⴷ ⵜⴻⴱⵏⵓ ⵜⴰⴷⴰⵎⵙⴰ-ⵙ.
ⵜⴰⴽⴻⵔⴱⴰⵏⵉⵜ ⵜⴰⵖⴻⵍⵏⴰⵡⵜ "ⵙⵓⵏⴰⵟⵔⴰⴽ" , ⵉ ⴷ-ⵢⴻⵍⵍⴰⵏ ⴷⴻⴳ 31 ⴷⵓⴶⴻⵎⴱⴻⵔ 1963, ⵜⵓⵖⴰⵍ ⴷ ⵍⵙⴰⵙ ⵏ ⵜⵙⴻⵔⵜⵉⵜ ⵏ ⵜⴰⵥⵓⵔⴳⴻⵏⵜ ⵏ ⵜⵎⵓⵔⵜ.
ⵉⵡⴰⴽⴽⴻⵏ ⴰⴷ ⵜⴻⵇⵇⴰⴱⴻⵍ ⵍⵀⴰⴶⴰ ⵏ ⵢⵉⵎⴰⵍ, ⵍⴻⵣⵣⴰⵢⴻⵔ ⵜⴻⵙⵙⴻⵔⵙ 60 ⵏ ⵍⵎⵉⵍⵢⴰⵔ ⵏ ⴷⴷⵓⵍⴰⵔ ⵉ ⵓⵙⵙⴰⵔⵓ ⴷⴻⴳ ⵜⴰⵍⵍⵉⵜ ⵏ 2025-2029. ⵉⵙⵡⵉ ⴷ ⴰⵙⴰⵍⵉ ⵏ ⵓⵙⵎⵉⵀⴷⴻⵔ ⵏ ⵍⴱⴻⵜⵔⵓⵍ ⵙⴻⴳ 32% ⴰⵔ 50% ⴷⴻⴳ ⵓⵙⴻⴳⴳⴰⵙ ⵏ 2029.
ⵍⵍⴰⵏ ⴷⴰⵖⴻⵏ ⵢⵉⵙⴻⵏⴼⴰⵔⴻⵏ ⵏ ⵍⴱⴻⵜⵔⵓⴽⵉⵎⵉ ⴰⵎ ⵓⴼⴰⵔⴻⵙ ⵏ "ⴱⵓⵍⵉⴱⵔⵓⴱⵉⵍⵉⵏ" ⴷ ⵍⴼⵓⵙⴼⴰⵜ ⵉⵎⵓⵇⵔⴰⵏ, ⴰⴽⴽ ⴷ ⵓⵙⵎⵉⵀⴷⴻⵔ ⵏ ⵍⴱⴻⵜⵔⵓⵍ ⴷⴻⴳ ⵃⴰⵙⵉ ⵎⴻⵙⵄⵓⴷ ⴷ ⵡⴰⵔⵣⵉⵡ.
ⵜⴻⵔⵏⴰⵜ ⵖⴻⴼ ⵡⴰⵢⴰ, ⵍⵍⴰⵏ ⵢⵉⵙⴻⵏⴼⴰⵔⴻⵏ ⵏ ⵢⵉⵎⴰⴹⴻⵏ ⴰⵎ ⵡⵓⵣⵣⴰⵍ ⵏ "ⴶⴰⵔⴰ ⴶⴱⵉⵍⴻⵜ" ⴷ ⵍⴼⵓⵙⴼⴰⵜ ⴷⴻⴳ ⵜⴱⴻⵙⵙⴰ ⴷ ⵙⵓⵇ ⴰⵀⵔⴰⵙ. ⴰⵢⴰ ⴰⴷ ⵢⴻⴼⴽ ⴰⴼⵓⵙ ⵉ ⵜⵎⴰⵏⴻⴳⵜ ⵜⴰⵖⴻⵍⵏⴰⵡⵜ ⴷ ⵓⵙⴻⵍⵍⴻⴷ ⵏ ⵜⴷⴰⵎⵙⴰ ⵏ ⵜⵎⵓⵔⵜ ⵖⴻⵔ ⵡⴰⴷⴷⴰⴷ ⵏ ⵜⵎⵓⵔⴰ ⵉⵏⴻⵔⵏⵉⵏ.
ⴰⵔⵏⵓ ⵖⴻⵔ
