ⵍⵣⵣⴰⵢⴻⵔ ⵜⴰⵎⴰⵏⴻⵯⵜ – ⵜⴻⵙⴱⴻⴷⴷ ⵜⴷⵓⴽⴽⵍⵉ ⵜⴰⵣⵣⴰⵢⵔⵉⵜ ⵏ ⵜⴽⵓⵔⵜ ⵏ ⵓⴹⴰⵔ (FAF), ⴰⵎⵓⵔⴰⵔ ⴰⵇⴱⵓⵔ ⵏ ⵜⵔⴰⴱⵄⵜ ⵜⴰⵖⴻⵍⵏⴰⵡⵜ, ⵎⴰⵙⵙ ⵔⴰⴼⵉⵇ ⵚⴰⵢⴼⵉ, ⴷ ⴰⵙⵍⵖⴰⵢ ⴰⵎⴰⵢⵏⵓ ⵏ ⵜⵔⴰⴱⵄⵜ ⵜⴰⵖⴻⵍⵏⴰⵡⵜ ⵜⵓⵍⵓⵎⴱⵉⵜ. ⴰⵢⴰ ⵉ ⴷ-ⵢⴻⵏⵏⴰ ⵡⴰⵍⵯⵓ ⵏ ⵜⵎⴻⵔⵙⴻⵍⵜ ⴰⵙⵙ-ⴰ ⵏ ⵍⵃⴻⴷ.
ⵜⴰⵖⵜⴻⵙⵜ-ⴰⴳⵉ ⵜⴻⴹⵔⴰ-ⴷ ⴷⴻⴳ ⵜⵉⵎⵍⵉⵍⵉⵜ ⵏ ⵡⴰⵙⵉⵔⴰ ⴰⴼⵉⴷⵉⵔⴰⵍⵉ ⵏ ⵜⴷⵓⴽⴽⵍⵉ, ⵉ ⴷ-ⵢⴻⵍⵍⴰⵏ ⵉⴹⴻⵍⵍⵉ ⵏ ⵙⵙⴻⴱⵜ ⴷⴻⴳ ⵡⴰⵎⵎⴰⵙ ⴰⵜⴻⴽⵏⵉⴽ ⴰⵖⴻⵍⵏⴰⵡ ⵏ ⵙⵉⴷⵉ ⵎⵓⵙⴰ, ⵙ ⵏⵏⵡⴰⵢⴰ ⵏ ⵓⵎⵙⴻⵍⵡⴰⵢ ⵏ ⵜⵎⴻⵔⵙⴻⵍⵜ, ⵎⴰⵙⵙ ⵡⴰⵍⵉⴷ ⵚⴰⴷⵉ.
ⵉⵙⵡⵉ ⴰⵎⴻⵇⵇⵔⴰⵏ ⵏ ⵚⴰⵢⴼⵉ, ⵢⴻⵙⵄⴰⵏ 51 ⵏ ⵢⵉⵙⴻⴳⴳⴰⵙⴻⵏ, ⴷ ⴰⵀⴻⴳⴳⵉ ⵏ ⵜⵔⴰⴱⵄⵜ ⵜⴰⵣⵣⴰⵢⵔⵉⵜ ⵉ ⵡⴰⴽⴽⴻⵏ ⴰⴷ ⵜⴻⴽⴽ ⴷⴻⴳ ⵡⵓⵔⴰⵔⴻⵏ ⵓⵍⵓⵎⴱⵉⵢⴻⵏ ⵏ ⵓⵙⴻⴳⴳⴰⵙ 2028 ⴰⵔⴰ ⴷ-ⵢⵉⵍⵉⵏ ⴷⴻⴳ ⵜⵖⵉⵡⴰⵏⵜ ⵏ "ⵍⵓⵙ ⴰⵏⵊⴻⵍⵓⵙ" (USA).
ⵔⴰⴼⵉⵇ ⵚⴰⵢⴼⵉ, ⵉ ⵢⵓⵔⴰⵔⴻⵏ ⵣⵉⴽ ⴷⴻⴳ ⵜⵔⴰⴱⵄⵜ ⵏ "ⵜⵔⵓⵡⴰ" ⴷⴻⴳ ⴼⵔⴰⵏⵙⴰ, ⵢⴻⵙⵄⴰ ⵜⵓⴳⴳⴰ ⵜⵓⵏⵏⵉⴳⵜ ⵏ ⵓⵙⴻⵍⵖⵓ "ⴽⴰⴼ ⴱⵔⵓ" (CAF Pro). ⵢⴻⵇⴷⴻⵛ ⵢⴰⴽⴰ ⴷ ⴰⵎⵄⴰⵡⴻⵏ ⵏ ⵓⵙⵍⵖⴰⵢ ⴷⴻⴳ ⵜⵔⴰⴱⵄⵜ-ⵉⵙ ⵜⴰⵇⴱⵓⵔⵜ "ⵎⵓⵍⵓⴷⵉⵢⴰ ⵏ ⵍⵣⵣⴰⵢⴻⵔ" (2017-2018), ⵓⵇⴱⴻⵍ ⴰⴷ ⵢⴻⵟⵟⴻⴼ ⵜⴰⵎⴰⵙⵉⵜ ⵏ ⵓⵙⵍⵖⴰⵢ ⴰⵎⴰⵢⵏⵓ ⴷⴻⴳ ⵢⵉⵡⴻⵏ ⵓⵣⵎⴻⵣ ⵓⵣⵣⵉⵍ ⴷⴻⴳ ⵓⵙⴻⴳⴳⴰⵙ 2018-2019.
ⵢⴻⵍⵀⴰ ⴰⴷ ⴷ-ⵏⴻⵙⵙⴻⴽⵜⵉ ⴱⴻⵍⵍⵉ ⵜⵉⴽⴻⵍⵜ ⵜⴰⵏⴻⴳⴳⴰⵔⵓⵜ ⵉ ⴷⴻⴳ ⵜⴻⴽⴽⴰ ⵜⵔⴰⴱⵄⵜ ⵜⴰⵖⴻⵍⵏⴰⵡⵜ ⵏ ⵜⴽⵓⵔⵜ ⵏ ⵓⴹⴰⵔ ⴷⴻⴳ ⵡⵓⵔⴰⵔⴻⵏ ⵓⵍⵓⵎⴱⵉⵢⴻⵏ ⵜⴻⵍⵍⴰ-ⴷ ⴷⴻⴳ ⵓⵙⴻⴳⴳⴰⵙ ⵏ 2016 ⴷⴻⴳ ⵜⵖⵉⵡⴰⵏⵜ ⵏ "ⵔⵢⵓ ⴷⵉ ⵊⴰⵏⵉⵔⵓ".
ⴰⵔⵏⵓ ⵖⴻⵔ
