ⵜⴻⵔⴱⴻⵃ ⵜⴻⵔⴱⴰⵄⵜ ⵜⴰⵖⴻⵍⵏⴰⵡⵜ ⵏ ⵜⵍⴰⵡⵉⵏ ⵎⴳⴰⵍ ⵜⵉⵏ ⵏ ⵎⴰⵚⴻⵔ ⵙ ⵜⴳⵎⵓⴹⵜ ⵏ 3 ⵖⴻⵔ 0, ⴷⴻⴳ ⵜⴻⵎⵍⵉⵍⵉⵜ ⵜⴰⵎⴻⵣⵡⴰⵔⵓⵜ ⵏ ⵜⵎⵉⴷⵡⴰ ⵉ ⵜⴻⵏⵜ-ⵢⴻⵙⴷⵓⴽⴽⵍⴻⵏ ⵉⴹⴻⵍⵍⵉ ⵏ ⵙⵙⴻⴱⵜ ⴷⴻⴳ ⵡⴰⵎⵎⴰⵙ ⵏ ⵜⴻⵔⴱⵓⵢⴰⵄ ⵜⵉⵖⴻⵍⵏⴰⵡⵉⵏ ⴷⴻⴳ ⵍⵇⴰⵀⵉⵔⴰ, ⴰⵎ ⵓⵃⵔⵉⵛ ⵙⴻⴳ ⵡⴰⵀⵉⵍ ⵏ ⵓⵙⴻⵡⵊⴻⴷ ⵓⵇⴱⴻⵍ ⵜⵜⴻⴽⴽⵉ ⵏ ⵜⵍⴰⵡⵉⵏ ⵏ "ⵢⵉⵣⴻⴳⵣⴰⵡⴻⵏ" ⴷⴻⴳ ⵜⴻⴳⵔⴰⵔⵉⵡⵉⵏ ⵏ ⵜⴻⵇⴱⵓⵛⵜ ⵏ ⵜⴻⴼⵔⵉⵇⵜ ⵏ ⵢⴻⵖⵍⴰⵏⴻⵏ ⵉ ⵜⵍⴰⵡⵉⵏ 2026.
ⴼⴽⴰⵏⵜ-ⴷ ⵜⴻⵎⵢⵓⵔⴰⵔⵉⵏ ⵜⵉⵣⵣⴰⵢⵔⵉⵢⵉⵏ ⵓⵔⴰⵔ ⵢⵓⴼⵔⴰⵔⴻⵏ ⴷⵉ ⵜⴻⵖⵣⵉ ⵏ ⵜⴻⵎⵍⵉⵍⵉⵜ-ⴰ, ⴷ ⴰⵢⴻⵏ ⵉ ⵜⴻⵏⵜ-ⵢⴻⵙⵙⴰⵡⴹⴻⵏ ⴰⴷ ⵃⴻⴽⵎⴻⵏⵜ ⴷⴻⴳ ⵓⵏⵏⴰⵔ ⵢⴻⵔⵏⴰ ⴰⴷ ⵔⴻⴱⵃⴻⵏⵜ ⵙ ⵜⵍⴰⵜⴰ ⵏ ⵢⵉⵙⵡⵉⵢⴻⵏ ⵉⵣⴻⴷⴷⵉⴳⴻⵏ ⵉ ⴷ-ⵙⵙⴽⴻⵛⵎⴻⵏⵜ: ⵍⵉⵏⴰ ⴱⵓⵙⴰⵃⴰ (ⴷ49), ⵉⵏⴰⵙ ⵅⵉⵔⵉ (ⴷ55) ⴰⴽⴽⴻⴷ ⵏⵉⵀⴰⴷ ⵏⴰⵢⵍⵉ (ⴷ87).
ⴰⴷ ⵎⵍⵉⵍⴻⵏⵜ ⵙⵏⴰⵜ ⵏ ⵜⴻⵔⴱⵓⵢⴰⵄ-ⴰ ⴷⴻⴳ ⵜⴻⵎⵍⵉⵍⵉⵜ ⵏ ⵜⵎⵉⴷⵡⴰ ⵜⵉⵙ ⵙⵏⴰⵜ ⴰⵣⴻⴽⴽⴰ ⵏ ⵍⴻⵜⵏⴰⵢⴻⵏ ⵙⴻⴳ ⵜⵙⴰⵄⴻⵜ ⵜⵉⵙ 21:30, ⴷⴻⴳ ⵡⴰⵎⵎⴰⵙ-ⵏⵏⵉ.
ⴰⴷ ⵜⵓⵖⴰⵍ ⵜⴻⵔⴱⴰⵄⵜ ⵜⴰⵖⴻⵍⵏⴰⵡⵜ ⵖⴻⵔ ⵍⴻⵣⵣⴰⵢⴻⵔ ⴰⵙⵙ ⵏ 4 ⴷⴻⴳ ⵎⴻⵖⵔⴻⵙ, ⵉⵡⴰⴽⴽⴻⵏ ⴰⴷ ⵜⴽⴻⵎⵎⴻⵍ ⴰⵙⴻⵡⵊⴻⴷ ⴷⴻⴳ ⵡⴰⵎⵎⴰⵙ ⴰⵜⵉⴽⵏⵉⴽ ⴰⵖⴻⵍⵏⴰⵡ ⵏ ⵙⵉⴷⵉ ⵎⵓⵙⴰ ⴰⵍⴰⵎⵎⴰ ⴷ ⵜⴰⴳⴳⴰⵔⴰ ⵏ ⵓⵀⴻⴳⴳⵉ ⴷⴻⴳ 7 ⵎⴻⵖⵔⴻⵙ ⴷ-ⵉⵜⴻⴷⴷⵓⵏ.
ⵜⵜⴻⴽⴽⵉ-ⴰ ⴰⴷ ⵢⵉⵍⵉ ⴷ ⵡⵉⵙ 7 ⴷⴻⴳ ⵓⵎⴻⵣⵔⵓⵢ ⵏ ⵍⴻⵣⵣⴰⵢⴻⵔ ⴷⴻⴳ ⵜⴻⴳⵔⴰⵔⵉⵡⵉⵏ ⵏ ⵜⴻⵇⴱⵓⵛⵜ ⵏ ⵜⴻⴼⵔⵉⵇⵜ ⵏ ⵢⴻⵖⵍⴰⵏⴻⵏ, ⴷ ⵡⵉⵙ ⵙⵉⵏ ⵖⴻⴼ ⵎⴹⴰⴼⴰⵔ ⵙⴻⵍⴷ ⵜⴰⵥⵔⵉⴳⵜ ⵏ 2024, ⴰⵏⴷⴰ ⵙⵙⴰⵡⴹⴻⵏⵜ ⵜⴻⵎⵢⵓⵔⴰⵔⵉⵏ ⵏ ⵓⵙⵍⴻⵖⵎⴰⵢ ⴰⵖⴻⵍⵏⴰⵡ, ⴼⴰⵔⵉⴷ ⴱⴻⵏ ⵙⵜⵉⵜⵉ, ⵖⴻⵔ ⵢⵉⵡⴻⵏ ⵏ ⵡⴻⵎⴽⴰⵏ ⴰⵎⴻⵣⵔⴰⵢ ⵙ ⵓⵡⵡⴰⴹ ⵖⴻⵔ ⵔⵔⴻⴱⵄ ⵏ ⵜⴰⴳⴳⴰⵔⴰ, ⵓⵇⴱⴻⵍ ⴰⴷ ⵜⵜⵡⴰⵇⵚⴻⵏⵜ ⵎⴳⴰⵍ ⵖⴰⵏⴰ (0-0, ⵙ ⵜⵉⵢⵉⵜⵉⵡⵉⵏ ⵏ ⵜⵓⴽⵣⴰ 2-4).
ⵜⵜⵡⴰⴱⴹⴰⵏⵜ 16 ⵏ ⵜⴻⵔⴱⵓⵢⴰⵄ ⵉ ⴷ-ⵢⴻⵡⵡⵉⵏ ⴰⵎⴽⴰⵏ ⵖⴻⵔ CAN 2026, ⵖⴻⴼ ⵔⴻⴱⵄⴰ ⵏ ⵜⴻⴳⵔⴰⵡⵉⵏ, ⵢⴰⵍ ⵢⵉⵡⴻⵜ ⵜⴻⴳⴱⴻⵔ ⵔⴻⴱⵄⴰ ⵏ ⵜⴻⵔⴱⵓⵢⴰⵄ.
ⵙⴻⵍⴷ ⴰⵎⴻⵛⵡⴰⵔ ⵏ ⵜⴻⴳⵔⴰⵡⵉⵏ, ⴰⴷ ⵉⵄⴻⴷⴷⵉ ⵡⴰⵎⴻⵣⵡⴰⵔⵓ ⴷ ⵡⵉⵙ ⵙⵉⵏ ⵙⴻⴳ ⵢⴰⵍ ⵜⴰⴳⵔⴰⵡⵜ ⵖⴻⵔ ⴷⴷⵓⵔ ⵏ ⵓⵇⴰⵙⵉ ⴰⵔⴰ ⵢⴻⴳⴱⵔⴻⵏ: ⵔⵔⴻⴱⵄ ⵏ ⵜⴰⴳⴳⴰⵔⴰ, ⴰⵣⴳⴻⵏ ⵏ ⵜⴰⴳⴳⴰⵔⴰ, ⵜⴰⵎⵍⵉⵍⵉⵜ ⵏ ⵓⴼⴻⵔⵔⴻⵣ ⵏ ⵡⴻⵎⴽⴰⵏ ⵡⵉⵙ ⵜⵍⴰⵜⴰ, ⵜⴰⴳⴳⴰⵔⴰ (ⴰⴼⵉⵏⴰⵍ), ⵔⵏⵓ ⵖⴻⴼ ⵡⴰⵢⴰ ⵜⵉⵎⵍⵉⵍⵉⵢⵉⵏ ⵏ ⵙⵙⴻⴷ ⵉ ⴷ-ⵢⴻⵜⵜⴰⵡⵉⵢⴻⵏ ⵖⴻⵔ ⵜⴻⵇⴱⵓⵛⵜ ⵏ ⵓⵎⴰⴹⴰⵍ ⵉ ⵜⵍⴰⵡⵉⵏ (FIFA) ⴷⴻⴳ ⴱⵔⵉⵣⵉⵍ 2027.
ⴰⴷ ⴷ-ⵜⵉⵍⵉⵏⵜ ⵜⴻⴳⵔⴰⵔⵉⵡⵉⵏ ⵏ ⵜⴻⵇⴱⵓⵛⵜ ⵏ ⵜⴻⴼⵔⵉⵇⵜ ⵏ ⵢⴻⵖⵍⴰⵏⴻⵏ ⵉ ⵜⵍⴰⵡⵉⵏ 2026 ⴳⴰⵔ 17 ⵎⴻⵖⵔⴻⵙ ⴷ 3 ⵢⴻⴱⵔⵉⵔ ⴷ-ⵉⵜⴻⴷⴷⵓⵏ.
ⴰⵔⵏⵓ ⵖⴻⵔ
