ⵜⴻⵍⴷⵉ ⵜⵎⴻⴷⴷⵉⵜ ⵏ ⵡⴰⵙⵙ ⵏ ⵍⴵⴻⵎⵄⴰ ⴷⴻⴳ ⵡⴰⵎⵎⴰⵙ ⴰⴷⴻⵍⵙⴰⵏ "ⵄⵉⵙⴰ ⵎⴻⵙⵄⵓⴷⵉ" ⴷⴻⴳ ⵃⵓⵙⵉⵏ ⴷⴰⵢ, ⵜⴻⵥⵔⵉⴳⵜ ⵜⵉⵙ 4 ⵏ ⵜⴼⴰⵙⴽⴰ ⵏ ⵛⵛⵏⴰ ⵏ ⵛⵛⴻⵄⴱⵉ ⵉ ⴷ-ⵢⴻⵜⵜⵡⴰⵀⴻⴳⴳⴰⵏ ⵉ ⵢⵉⵍⵎⴻⵥⵢⴻⵏ ⵏ ⵍⵡⵉⵍⴰⵢⴰ ⵏ ⵍⴻⵣⵣⴰⵢⴻⵔ, ⵙ ⵓⵃⴹⴰⵔ ⵏ ⵡⴰⵏⴻⵖⵍⴰⴼ ⵏ ⵢⵉⵍⵎⴻⵥⵢⴻⵏ ⵉ ⵢⴻⵜⴽⴻⵍⵍⴼⴻⵏ ⵙ ⵓⵙⵇⴰⵎⵓ ⵓⵏⵏⵉⴳ ⵏ ⵢⵉⵍⵎⴻⵥⵢⴻⵏ, ⵎⵓⵚⵟⴰⴼⴰ ⵃⵉⴷⴰⵡⵉ.
ⵜⴼⴰⵙⴽⴰ-ⴰ, ⴰⵔⴰ ⵉⴽⴻⵎⵎⵍⴻⵏ ⴰⵍⴰⵎⵎⴰ ⴷ 12 ⴷⴻⴳ ⵎⴻⵖⵔⴻⵙ ⴷ-ⵉⵜⴻⴷⴷⵓⵏ, ⵜⴻⵙⵄⴰ ⵉⵙⵡⵉ ⴰⴷ ⵜⵃⴰⴷⴻⵔ ⵖⴻⴼ ⵚⵚⴻⵏⴼ-ⴰ ⵏ ⵓⵥⴰⵡⴰⵏ ⴰⴽⴽⴻⴷ ⵓⵏⵇⴰⵍ-ⵉⵙ ⵙ ⵓⵙⵏⵉⵔⴻⵎ ⵏ ⵜⵓⵖⴰⵛ ⵜⵉⵎⴰⵢⵏⵓⵜⵉⵏ ⴷ ⵜⵣⴻⵎⵎⴰⵔ ⵜⵉⵍⴻⵎⵥⵉⵢⵉⵏ.
ⵢⴻⵙⵎⴻⴽⵜⴰ-ⴷ ⵎⴰⵙⵙ ⵃⵉⴷⴰⵡⵉ ⴰⵣⴰⵍ ⵏ ⵓⵃⴰⴷⴻⵔ ⵖⴻⴼ ⵛⵛⵏⴰ ⵏ ⵛⵛⴻⵄⴱⵉ ⵉ ⵢⴻⵍⵍⴰⵏ ⴷ ⴰⵃⵔⵉⵛ ⴰⵎⴻⵇⵇⵔⴰⵏ ⴷⴻⴳ ⵜⴳⴻⵎⵎⵉ ⵏ ⵓⵥⴰⵡⴰⵏ ⴰⵣⵣⴰⵢⵔⵉ ⴰⵥⴰⵕⴰⵏ, ⵢⴻⵙⵙⴰⵡⴻⵍ-ⴷ ⵖⴻⴼ ⵢⵉⵎⴻⵇⵇⵔⴰⵏⴻⵏ ⵉ ⴷ-ⵉⴱⴰⵏⴻⵏ ⴷⴻⴳ ⵚⵚⴻⵏⴼ-ⴰ ⵏ ⵛⵛⵏⴰ ⵉ, ⴰⴽⴽⴻⵏ ⵉ ⴷ-ⵢⴻⵏⵏⴰ, "ⵃⴻⵔⵚⴻⵏ ⴷⴻⴳ ⵢⴻⵣⵔⵉ ⴰⴷ ⵜ-ⵔⵔⴻⵏ ⴷ ⴰⵎⴻⵣⵖⵉ ⵢⴻⵔⵏⴰ ⴰⴷ ⵜ-ⵉⴷ-ⵙⵙⵉⵡⴹⴻⵏ ⴳⴰⵔ ⵜⵙⵓⵜⵡⵉⵏ".
ⵢⴻⵏⵏⴰ-ⴷ ⵡⴰⵏⴻⵖⵍⴰⴼ: "ⵙ ⵜⴼⴰⵙⴽⴰ-ⴰ ⴷ ⵡⴰⵟⴰⵙ ⵏ ⵍⴻⵇⴷⵉⵛⴰⵜ ⵏ ⵢⵉⴷⵍⴻⵙ ⵉ ⴷ-ⵢⴻⵜⵜⵡⴰⵀⴻⴳⴳⴰⵏ ⵉ ⵢⵉⵍⵎⴻⵥⵢⴻⵏ, ⵏⴻⴱⵖⴰ ⴰⴷ ⴷ-ⵏⴻⵙⵏⵓⵍⴼⵓ ⵢⵉⵡⴻⵏ ⵏ ⵓⵏⵏⴰⵔ ⵏ ⵜⵥⵓⵔⵉ ⴰⵎⴰⵢⵏⵓⵜ ⵉ ⴷ-ⵢⴻⴱⴷⴰⵏ ⵢⴻⵜⵜⴱⴰⵏ-ⴷ ⵙ ⵢⵉⵙⴽⴰⵏⴻⵏ ⵢⵓⴼⵔⴰⵔⴻⵏ ⵉ ⴷ-ⵜⵜⴰⴽⴻⵏⵜ ⵜⵣⴻⵎⵎⴰⵔ-ⴰ ⵜⵉⵍⴻⵎⵥⵉⵢⵉⵏ".
ⵖⴻⴼ ⵜⴻⴳⵏⵉⵜ-ⴰ, ⵢⴻⵜⵜⵡⴰⵙⴻⵏⵄⴻⵜ-ⴷ ⵢⵉⵡⴻⵏ ⵏ ⵓⵙⴰⵔⵓ ⴰⵡⵍⵉⵣ ⵖⴻⴼ ⵍⴻⵇⴷⵉⵛⴰⵜ ⵏ ⵢⵉⴷⵍⴻⵙ ⵏ ⵜⵎⴻⵀⵍⴰ ⵏ ⵢⵉⵍⵎⴻⵥⵢⴻⵏ ⴷ ⵡⴰⴷⴷⵉⵏ ⵏ ⵍⵡⵉⵍⴰⵢⴰ ⵏ ⵍⴻⵣⵣⴰⵢⴻⵔ ⴷⴻⴳ ⵡⴰⴳⴳⵓⵔ ⵏ ⵔⴻⵎⴹⴰⵏ, ⴷ ⵡⴰⵢⴻⴹ ⵖⴻⴼ ⵜⴻⵥⵔⵉⴳⵉⵏ ⵢⴻⵣⵔⵉⵏ ⵏ ⵜⴼⴰⵙⴽⴰ-ⴰ.
ⵙⴻⵍⴷ ⵡⴰⵢⴰ, ⵣⵀⴰⵏⵜ ⵡⴰⵍⵍⴻⵏ ⵏ ⵍⵖⴰⵛⵉ ⵙ ⵢⵉⵙⴽⴰⵏⴻⵏ ⵏ ⵜⵥⵓⵔⵉ ⵙⴻⴳ ⵜⴳⴻⵎⵎⵉ ⵏ ⵛⵛⴻⵄⴱⵉ ⵉ ⴷ-ⵛⴻⵏⵏⵓⵏ ⵎⴻⵔⵡⴰⵏ ⵣⴻⵖⵔⴰⵡⵉ, ⵄⵍⵉ ⵔⴻⵎⵟⴰⵏ, ⵙⵓⵎⵉⵢⴰ ⵏⴰⴱⵜⵉ ⴰⴽⴽⴻⴷ ⵃⵓⵙⵉⵏ ⵙⴻⵄⴷⵉ.
ⵙⵉ ⵜⴰⵎⴰ-ⵙ, ⵢⴻⵙⵙⴻⴼⵀⴻⵎ-ⴷ ⵓⵏⴻⵎⵀⴰⵍ ⵏ ⵢⵉⵍⵎⴻⵥⵢⴻⵏ ⴷ ⵡⴰⴷⴷⵉⵏ ⵏ ⵍⵡⵉⵍⴰⵢⴰ ⵏ ⵍⴻⵣⵣⴰⵢⴻⵔ, ⴰⵎⵉⵏ ⵙⴰⵄⴷ, ⴷ ⴰⴽⴽⴻⵏ "ⵜⴰⵥⵔⵉⴳⵜ ⵜⵉⵙ 4 ⵏ ⵜⴼⴰⵙⴽⴰ-ⴰ ⵜⵊⴻⵔⵔⴻⴷ ⵓⴳⴰⵔ ⵏ 80 ⵏ ⵢⵉⵎⵜⵜⴻⴽⴽⵉⵢⴻⵏ, ⴳⴰⵔ-ⴰⵙⴻⵏ ⵉⵛⴻⵏⵏⴰⵢⴻⵏ ⵉⵍⵎⴻⵥⵢⴻⵏ, ⵜⵉⴷⵓⴽⴽⵍⵉⵡⵉⵏ ⴷ ⵜⴻⵔⴱⵓⵢⴰⵄ ⵏ ⵛⵛⴻⵄⴱⵉ, ⴰⵔⴰ ⵢⴻⵜⵜⴻⴽⴽⵉⵏ ⴷⴻⴳ ⵢⵉⴽⴰⵢⴰⴷⴻⵏ ⵏ ⵡⴻⴼⵔⴰⵏ ⴷⴻⴳ ⵢⴻⵎⴹⵉⵇⴻⵏ ⵉⵣⴰⵢⴰⵣⴻⵏ ⵢⴻⵎⵅⴰⵍⴰⴼⴻⵏ ⴷ ⵜⵣⴻⵖⵡⴰ ⵏ ⵢⵉⵙⴽⴰⵏⴻⵏ".
ⵢⴻⵔⵏⴰ-ⴷ ⴷ ⴰⴽⴽⴻⵏ ⵜⴻⵙⵇⴰⵎⵓⵜ ⵏ ⵢⵉⵏⴻⴱⴹⴰ ⵉ ⴷ-ⵢⴻⵙⴷⵓⴽⴽⵍⴻⵏ ⵉⵎⴰⵣⵣⴰⴳⴻⵏ ⴷⴻⴳ ⵛⵛⵏⴰ ⵏ ⵛⵛⴻⵄⴱⵉ, ⴰⴷ ⵜⴻⴼⵔⴻⵏ 24 ⵏ ⵢⵉⵎⵜⵜⴻⴽⴽⵉⵢⴻⵏ ⵉⵡⴰⴽⴽⴻⵏ ⴰⴷ ⵀⴻⴳⴳⵉⵏ ⵜⵉⵢⵉⴹⵉⵏ ⵜⵉⵏⴻⴳⴳⵓⵔⴰ ⵏ ⵜⴼⴰⵙⴽⴰ-ⴰ ⵉ ⴷ-ⵢⴻⵜⵜⵡⴰⵅⴻⵚⵚⴻⵚⴻⵏ ⵉ ⵓⵃⴰⴷⴻⵔ ⵖⴻⴼ ⵚⵚⴻⵏⴼ-ⴰ ⵏ ⵓⵥⴰⵡⴰⵏ ⴷ ⵡⴻⵙⵏⴻⵔⵏⵉ-ⵉⵏⴻⵙ ⴷ ⵡⵓⵣⵣⴰⵏ-ⵉⵏⴻⵙ ⴳⴰⵔ ⵜⵙⵓⵜⵡⵉⵏ.
ⴰⵔⵏⵓ ⵖⴻⵔ
